रविवार, 1 नोव्हेंबर 2026
US Iran war : १० मिनिटांत नष्ट करू! निवडणुकीपूर्वी इराणवर हल्ला करण्याच्या मूडमध्ये ट्रम्प, खामेनीने लक्ष्यांची यादी अद्ययावत केली ( फोटो सौजन्य : सोशल मीडिया )
मध्य पूर्वेतील तणाव पुन्हा एकदा पराकोटीला पोहोचला आहे. अमेरिकेचे राष्ट्राध्यक्ष डोनाल्ड ट्रम्प यांनी इराणविरुद्ध (US Iran war) पुन्हा एकदा कठोर लष्करी कारवाई करण्याचे स्पष्ट संकेत दिले आहेत. अमेरिकेत लवकरच पार पडणाऱ्या महत्त्वाच्या मध्यावधी निवडणुकांच्या (Midterm Elections) पार्श्वभूमीवर ट्रम्प यांचे हे विधान समोर आल्याने आंतरराष्ट्रीय राजकारणात मोठी खळबळ उडाली आहे. इराणच्या अणु ठिकाणांवर अमेरिका पूर्ण लक्ष ठेवून असून गरज पडल्यास अवघ्या १० मिनिटांत त्या ठिकाणांना उद्ध्वस्त केले जाऊ शकते, असा रोखठोक इशारा ट्रम्प यांनी दिला आहे.
शनिवारी फ्लोरिडा येथील आपल्या खाजगी निवासस्थानी माध्यमांशी संवाद साधताना राष्ट्राध्यक्ष ट्रम्प यांनी अमेरिकेच्या लष्करी सज्जतेची माहिती दिली. ट्रम्प म्हणाले की, “आम्ही यापूर्वीच्या कारवायांमध्ये इराणची अनेक प्रमुख अणु ठिकाणे उद्ध्वस्त केली आहेत. मात्र, अजूनही इराणमधील एक-दोन अशी ठिकाणे आहेत ज्यांच्यावर आमची सतत नजर आहे. जर इराणने अमेरिका किंवा आमच्या मित्रांवर कोणताही हल्ला करण्याचा प्रयत्न केला, तर आम्ही अवघ्या १० मिनिटांच्या आत क्षेपणास्त्रांचा मारा करून ती ठिकाणे पूर्णपणे नष्ट करू शकतो.”
विशेषतः इराणच्या प्रसिद्ध ‘पिकॅक्स माउंटेन’ (Pickaxe Mountain) या भूमिगत अणु ठिकाणाचा उल्लेख करत ट्रम्प यांनी सांगितले की, अमेरिकन सैन्य या ठिकाणाच्या प्रत्येक हालचालीवर लक्ष ठेवून आहे. या आठवड्यातच अमेरिका इराणवर नवीन हल्ला करणार का, असा प्रश्न पत्रकारांनी विचारला असता, ट्रम्प यांनी हा प्रश्न फेटाळून लावला. इराणसोबत राजनैतिक चर्चा सुरू असल्याचे त्यांनी मान्य केले असले, तरी इराणच्या भूमिकेवर पूर्ण विश्वास ठेवता येत नाही, असेही त्यांनी स्पष्ट केले.
जागतिक घडामोडी संबंधित बातम्या वाचण्यासाठी येथे क्लिक करा : US Midterms : अमेरिकेच्या राजकारणात ‘भारतीय तडका; निवडणुक प्रचारात कुणी बनवला डोसा तर कुणी मंदिरात टेकले डोके, VIDEO VIRAL
दुसऱ्या बाजूला, इराणमध्येही सत्तापालट आणि लष्करी घडामोडींना प्रचंड वेग आला आहे. अमेरिका आणि इस्रायलच्या संयुक्त लष्करी कारवाईत माजी सर्वोच्च नेते अयातुल्ला अली खामेनी यांच्या निधनानंतर, त्यांचे सुपुत्र मोजतबा खामेनी यांनी इराणची सूत्रे हाती घेतली आहेत. सूत्रे हाती घेतल्यानंतर मोजतबा खामेनी यांनी वरिष्ठ लष्करी अधिकाऱ्यांची तातडीची बैठक घेतली.
या बैठकीत मोजतबा खामेनी यांनी अमेरिकन धमक्यांना न घाबरता लष्कराला पूर्ण सज्ज राहण्याचे आदेश दिले. शत्रूकडून होणाऱ्या कोणत्याही चिथावणीला क्षणाचाही विलंब न लावता आणि कोणताही संकोच न बाळगता अत्यंत प्रभावीपणे प्रत्युत्तर दिले पाहिजे, असे खामेनी यांनी स्पष्ट केले.
मोजतबा खामेनी यांनी इराणच्या रिव्होल्यूशनरी गार्ड्स आणि लष्करी कमांडरांना अमेरिका तसेच ‘झायोनिस्ट शत्रू’ (इस्रायल) शी संबंधित सर्व महत्त्वाच्या लष्करी, आर्थिक आणि धोरणात्मक मालमत्तांची नवी यादी (Target List) तयार करण्याचे निर्देश दिले आहेत. या यादीत अमेरिका आणि इस्रायलच्या प्रत्यक्ष व अप्रत्यक्ष ठिकाणांचा समावेश करण्यात आला आहे.
दरम्यान, अमेरिकेचे परराष्ट्र सचिव मार्को रुबियो यांनीही परिस्थितीवर भाष्य करताना सांगितले की, राष्ट्राध्यक्षांनी अद्याप नवीन हल्ल्याबाबत अंतिम निर्णय घेतलेला नाही. परंतु, अमेरिकन सैन्य आपल्या मोहिमा साध्य करण्यासाठी पूर्णपणे सक्षम आहे. तसेच, इराण आंतरराष्ट्रीय सागरी मार्गांवर आणि व्यापारी जहाजांवर उघडपणे हल्ले करत असल्याचा आरोपही अमेरिकेने केला आहे.
जागतिक घडामोडी संबंधित बातम्या वाचण्यासाठी येथे क्लिक करा : Kim Jong Un : किम जोंग-उन यांना रोखण्यासाठी ‘या’ तीन महासत्ता एकत्र; उत्तर कोरियाच्या न्यूक्लीयर ताकदीविरोधात मोठी रणनीती
अमेरिकेतील मध्यावधी निवडणुकांच्या ऐन तोंडावर ट्रम्प यांच्या या इशाऱ्यामुळे जागतिक राजकारणात खळबळ उडाली आहे. एकीकडे ट्रम्प हे लष्करी कारवाईचा पर्याय खुला असल्याचे सांगत आहेत, तर दुसरीकडे इराणनेही थेट अमेरिका आणि इस्रायलच्या ठिकाणांना निशाणा बनवण्याची तयारी पूर्ण केली आहे. त्यामुळे येत्या काही दिवसांत मध्य पूर्वेत आणखी मोठा संघर्ष पेटण्याची गंभीर शक्यता वर्तवली जात आहे.
Ans: ट्रम्प यांनी स्पष्ट केले की अमेरिका इराणच्या अणु ठिकाणांवर सतत लक्ष ठेवून असून, गरज पडल्यास अवघ्या १० मिनिटांत क्षेपणास्त्र हल्ला करून ती ठिकाणे उद्ध्वस्त करू शकते.
Ans: मोजतबा खामेनी यांनी इराणच्या लष्करी कमांडरांना अमेरिका आणि इस्रायलशी संबंधित सर्व महत्त्वाच्या ठिकाणांची (Target List) नवी यादी अद्ययावत करण्याचे आदेश दिले आहेत.
Ans: डोनाल्ड ट्रम्प यांनी इराणच्या 'पिकॅक्स माउंटेन' (Pickaxe Mountain) या महत्त्वाच्या अणु प्रकल्पाचा उल्लेख करत त्यावर अमेरिकेची करडी नजर असल्याचे सांगितले.
