शनिवार, 17 ऑक्टोबर 2026
फोटो सौजन्य - सोशल मीडिया
वस्त्रोद्योग गुंतवणुकीसाठी राज्यशासनाचा मे.ओफए बी टेक प्रा.लिमिटेड कंपनीसोबत सामंजस्य करार उपमुख्यमंत्री फडणवीस यांच्या उपस्थितीत करण्यात आला. यावेळी बोलताना उपमुख्यमंत्री देवेंद्र फडणवीस म्हणाले की, वस्त्रोद्योग गुंतवणुकीसाठी राज्यशासनाच्या उद्योग विभागामार्फत मे.ओफएबी टेक प्रा.लिमिटेड कंपनीसोबत सामंजस्य करार करण्यात आला आहे. मे.ओफएबी टेक प्रा.लिमिटेड कंपनी ही भारतातील सर्वात मोठा बिझनेस टू बिझनेस स्वरूपाचा उद्योग असून जवळपास 25 हजार कोटींची उलाढाल आहे. या कराराच्या माध्यमातून वस्त्रोद्योगाला चालना व विस्तारासाठी वर्धा जिल्ह्यातील कारंजा (घा) एमआयडीसीमध्ये तब्बल 750 कोटी गुंतवणूक करून जवळपास 15 हजार रोजगार उपलब्ध होणार आहे.
यावेळी औद्योगिक विभागाचे प्रधान सचिव हर्षदीप कांबळे, सचिव विरेंद्र सिंग तसेच मे.ओफए बी टेक प्रा.लिमिटेड कंपनीचे अशिष मोहपात्रा, योगेश मंदानी, राजेश चावडे, विक्रम सिंग, अनुराग सोनी व एल.एल.सोनी उपस्थित होते.
वर्ध्यातील नवीन उद्योगांना मिळणार बळकटी होणार रोजगारनिर्मिती
राज्य शासनाकडून वस्त्रोद्योग गुंतवणुकीसाठी करण्यात आलेल्या या करारामुळे वस्त्रनिर्मितीसाठी मोठ्या सुविधा निर्माण केल्या जाणार आहेत. ज्यामध्ये मोठ्या प्रमाणात कच्चा माल, स्वस्त वीज, दळणवळणाच्या सोयी -सुविधा व अल्प दरात उपलब्ध औद्योगिक भूखंड यामुळे हा प्रकल्प लवकर कार्यान्वित होण्यासाठी पाठबळ मिळणार आहे. तसेच या प्रकल्पामुळे विदर्भातील औद्योगिकदृष्ट्या विकसित नसलेल्या वर्धा जिल्ह्यात नवीन उद्योगांना बळकटी मिळून रोजगार निर्माण होणार आहे. ज्याचा फायदा हा वर्ध्यातील तरुणांना मोठ्या प्रमाणात होणार आहे.
वस्त्रोद्योगामुळे ग्रामीण भागातील उद्योगांनाही मिळेल चालना
या वस्त्रोद्योग प्रकल्पामुळे वर्धा आणि आजुबाजूच्या परिसरातील महिला कारागीरांना मोठ्या प्रमाणावर रोजगार उपलब्ध होणार आहे. तसेच हब ॲण्ड स्पोक मॉडेलद्वारे ग्रामीण भागातही उद्योगांना चालना मिळणार आहे. महत्वाचे म्हणजे कच्चा माल आजूबाजूच्या ग्रामीण भागात मोठ्या प्रमाणावर उपलब्ध असल्यामुळे व त्याचा वापर वस्त्रोद्योगासाठी होणार आहे. या उद्योगामुळे येथील भागातील आर्थिक उन्नती देखील मोठ्या प्रमाणावर होताना दिसेल. तरुणांचा उत्कर्षही साधला जाईल.
