मुंबई: भारतीय शेअर बाजार (Share Market Update) सलग सातव्या दिवशी घसरण दिसून आली. आठवड्याच्या पहिल्या दिवशी शेअर बाजारात (Share Market) घसरणीला सुरुवात झाली होती. आजही तोच कल दिसून आला. आयटी सेक्टरमध्ये (IT Sector) विक्रीचा सपाटा दिसून आल्याने दोन टक्क्यांची घसरण झाली.
आज मुंबई शेअर बाजाराचा निर्देशांक सेन्सेक्स (BSE Sensex) 175 अंकांच्या घसरणीसह 59,288 अंकांवर स्थिरावला. तर, राष्ट्रीय शेअर बाजाराचा निर्देशांक निफ्टी (NSE Nifty) 73 अंकाच्या घसरणीसह 17,392 अंकांवर बंद झाला.
आज दिवसभरातील व्यवहारात बँकिंग क्षेत्रातील शेअर दरात तेजी दिसून आली. त्याशिवाय इतर सेक्टरमधील शेअर दरात घसरण झाली. ऑटो, आयटी, मेटल, एफएमसीजी, एनर्जी, कंझ्युमर ड्युरेबल्स, ऑइल अँड गॅस, फार्मा, हेल्थकेअर सेक्टरमधील स्टॉक्सचे शेअर्स घसरले. मिडकॅप आणि स्मॉलकॅप शेअर्सही घसरले. बीएसई सेन्सेक्समधील 30 पैकी 11 कंपन्यांच्या शेअर दरात तेजी दिसून आली. याशिवाय 19 कंपन्यांचे शेअरचे दर घसरले. निफ्टी 50 मधील 17 कंपन्यांच्या शेअर दरात तेजी दिसून आली. तर 33 कंपन्यांच्या शेअर दरात घसरण नोंदवण्यात आली. बाजारात सूचीबद्ध असलेल्या कंपन्यांपैकी 2511 कंपन्यांचे शेअर दर घसरले. तर, 944 कंपन्यांच्या शेअर दरात तेजी दिसून आली. मात्र 174 कंपन्यांच्या शेअर दरात कोणताही बदल झाला नाही.
आज दिवसभरातील व्यवहारात पॉवरग्रीडच्या शेअर दरात 2.02 टक्क्यांची तेजी दिसून आली. त्याशिवाय ICICI बँक 1.99 टक्के, कोटक महिंद्रा 1.82 टक्के, एसबीआय 1.34 टक्के, HDFC 0.83 टक्के, NTPC 0.79 टक्के, IndusInd Bank 0.64 टक्के, HDFC बँक 0.6 टक्के, एशियन पेंट्स 0.40 टक्क्यांच्या तेजीसह बंद झाला. तर, टाटा स्टील 3.37 टक्क्यांनी घसरला. त्याशिवाय, इन्फोसिसच्या शेअर दरात 2.71 टक्के, टाटा मोटर्स 2.29 टक्के, टीसीएस 2.01 टक्के, महिंद्रा अँड महिंद्राच्या शेअर दरात 1.81 टक्क्यांची घसरण दिसून आली.
