बुधवार, 23 सप्टेंबर 2026
फोटो सौजन्य- सोशल मीडिया
Devendra Fadnavis on MPSC : महाराष्ट्रात सरकारी नोकरीची तयारी करणाऱ्या लाखो तरुण-तरुणींसाठी एक अत्यंत दिलासादायक आणि आनंदाची बातमी समोर आली आहे. महाराष्ट्र लोकसेवा आयोगामार्फत (MPSC) होणाऱ्या आगामी परीक्षांमध्ये पदांची संख्या मोठ्या प्रमाणावर वाढवण्यात येणार आहे. अशी घोषणा मुख्यमंत्री देवेंद्र फडणवीस यांनी केली आहे. इतकेच नाही तर, गेल्या अनेक दिवसांपासून परीक्षा पद्धतीत बदल करण्याची मागणी करणाऱ्या विद्यार्थ्यांच्या मागणीवरही सरकार अत्यंत गांभीर्याने विचार करत आहे.
राज्य मंत्रिमंडळाच्या बैठकीनंतर प्रसारमाध्यमांशी बोलताना मुख्यमंत्री देवेंद्र फडणवीस यांनी स्पष्ट केले की, सरकार तरुणांना रोजगार उपलब्ध करून देण्याच्या बाबतीत कोणतीही कसर सोडणार नाही. मंत्रिमंडळ बैठकीत पाच वेगवेगळ्या विभागांनी आपल्याकडील रिक्त पदांबाबत सविस्तर सादरीकरण केले. आगामी भरतीत विशेषतः गट-क संवर्गातील क्लर्क-टायपिस्ट, टॅक्स असिस्टंट आणि असिस्टंट मोटर व्हेईकल इन्स्पेक्टर (AMVI) यांसारख्या अत्यंत महत्त्वाच्या पदांच्या संख्येत मोठी वाढ केली जाणार आहे.
पुढील भरती प्रक्रियेत इतक्या मोठ्या संख्येने पदे आणली जातील की MPSC च्या इतिहासातील सर्व जुने रेकॉर्ड मोडीत निघतील, असा ठाम विश्वास मुख्यमंत्र्यांनी व्यक्त केला. तसेच स्थानिक स्वराज्य संस्थांमधील रिक्त पदे भरण्यासाठीही स्वतंत्र आणि भक्कम व्यवस्था उभारण्यावर विचार सुरू असल्याचे त्यांनी सांगितले.
राज्यसेवा, कृषी, अभियांत्रिकी आणि एफएसओ (FSO) यांसारख्या परीक्षांची तयारी करणारे उमेदवार ‘वर्णनात्मक’ (Descriptive) पॅटर्न रद्द करून पुन्हा जुना ‘वस्तुनिष्ठ’ (Objective / MCQ) पॅटर्न लागू करण्याची मागणी करत आहेत. यावर भाष्य करताना मुख्यमंत्र्यांनी स्पष्ट केले की, आयोगाच्या कारभारात आणि परीक्षा पद्धतीत सुधारणा करण्यासाठी वरिष्ठ अधिकारी व्ही. राधा (V. Radha) यांच्या अध्यक्षतेखाली उच्चस्तरीय समिती स्थापन करण्यात आली आहे.
यापूर्वी दलवी समितीच्या शिफारशींनुसार डिस्क्रिप्टिव्ह पॅटर्न आणला गेला होता. मात्र, व्ही. राधा समितीने जर पुन्हा ऑब्जेक्टिव्ह (MCQ) पॅटर्न लागू करण्याची शिफारस केली, तर सरकार ती उघड्या मनाने स्वीकारण्यास तयार असल्याचे फडणवीस यांनी स्पष्ट केले.
Medical Admission : MBBS, BDS च्या दुसऱ्या फेरीत ९,२६५ प्रवेश निश्चित; १,९३१ जागा अद्याप
समितीला आतापर्यंत २०,००० पेक्षा जास्त ई-मेल आणि सूचना प्राप्त झाल्या आहेत. उत्तरपत्रिकांच्या तपासणीत पूर्ण पारदर्शकता असावी आणि दरवर्षी परीक्षा व निकालांचे एक निश्चित कॅलेंडर (Exam Calendar) जाहीर केले जावे, अशी प्रमुख मागणी विद्यार्थ्यांनी केली आहे.ही समिती केवळ परीक्षा पॅटर्नपुरती मर्यादित नसून प्रश्नपत्रिकांचे सुरक्षित वितरण, परीक्षेची मानक कार्यपद्धती (SOP), गुण गुणसूत्र पद्धती आणि अचानक परीक्षा रद्द झाल्यास निवड झालेल्या उमेदवारांच्या हितसंबंधांचे रक्षण यावरही ठोस नियमावली तयार करत आहे.
