शनिवार, 7 नोव्हेंबर 2026
Chandrapur News: ११ वर्षे सेवा, तरी दिवाळीत वेतन नाहीच; चंद्रपूर मनपातील कर्मचाऱ्यांचा आंदोलनाचा निर्णय, काम ठप्प होण्याची शक्यता
महानगरपालिकेच्या दैनंदिन कामकाजात यांत्रिकी विभागातील कंत्राटी कर्मचाऱ्यांची भूमिका महत्त्वपूर्ण आहे. गेल्या अकरा वर्षांपासून हे कर्मचारी नियमितपणे आपली जबाबदारी पार पाडत असून, शहरातील विविध यांत्रिकी कामकाज सुरळीत ठेवण्यासाठी योगदान देत आहेत. मात्र, त्यांच्या मेहनतीचा मोबदला वेळेवर मिळत नसल्याने त्यांच्यावर आर्थिक संकट ओढवले आहे. ‘मे. लिमरा सर्व्हिसेस, दारव्हा’ या कंत्राटदारामार्फत कार्यरत असलेल्या कर्मचाऱ्यांचे मागील महिन्याचे वेतन अद्याप अदा करण्यात आलेले नाही. त्यामुळे कर्मचाऱ्यांना घरखर्च, घरभाडे, मुलांचे शैक्षणिक खर्च, औषधोपचार आणि इतर दैनंदिन गरजा भागविताना मोठ्या अडचणींचा सामना करावा लागत आहे. (फोटो सौजन्य – AI Created)
विशेष म्हणजे, दिवाळीसारखा महत्त्वाचा सण असतानाही हातात वेतन नसल्याने कुटुंबासोबत सणाचा आनंद साजरा करणे त्यांच्यासाठी कठीण झाले आहे. कर्मचाऱ्यांनी गुरुवारपर्यंत थकीत वेतन अदा करण्याची मागणी केली होती. संबंधित कंत्राटदाराला वेतन देण्याबाबत तातडीने निर्देश द्यावेत, अशी मागणीही करण्यात आली होती. मात्र, निर्धारित मुदतीत वेतन जमा न झाल्याने कर्मचाऱ्यांचा संयम सुटला आहे. अखेर शुक्रवारपासून कामबंद आंदोलन सुरू करण्याचा निर्णय घेण्यात आला.
महानगरपालिकेच्या विविध कामकाजात महत्त्वाची जबाबदारी सांभाळणा-या कर्मचाऱ्यांना आपल्या हक्काच्या वेतनासाठी आंदोलनाचा मार्ग स्वीकारावा लागत असल्याने नाराजी व्यक्त होत आहे. ११ वर्षे सेवा देऊनही वेतनासाठी वारंवार पाठपुरावा करावा लागत असेल, तर कुटुंबाचा उदरनिर्वाह कसा करायचा, असा प्रश्न कर्मचाऱ्यांसमोर निर्माण झाला आहे. दरम्यान, कर्मचाऱ्यांचे थकीत वेतन तातडीने अदा करण्यासाठी महानगरपालिका प्रशासनाने हस्तक्षेप करावा आणि संबंधित कंत्राटदाराला आवश्यक निर्देश द्यावेत, अशी मागणी होत आहे. कामगारांच्या आंदोलनामुळे यांत्रिकी विभागाचे कामकाज विस्कळीत होण्याची शक्यता असून, प्रशासन आता यावर काय भूमिका घेते, याकडे सर्वांचे लक्ष लागले आहे.
