फोटो सौजन्य - Social Media
भारतीय वायूदलात भरती होण्याचे स्वप्न पाहणाऱ्या तरुणांसाठी आनंदाची बातमी आहे. ‘अग्निपथ योजना’ अंतर्गत अग्निवीर वायू इंटेक 1/2026 साठी भरती प्रक्रियेची घोषणा करण्यात आली असून ११ जुलै २०२५ पासून ऑनलाइन अर्ज प्रक्रिया सुरू होणार आहे. उमेदवार अधिकृत संकेतस्थळ agnipathvayu.cdac.in वर जाऊन अर्ज करू शकतात. याअंतर्गत २५ सप्टेंबर २०२५ रोजी ऑनलाइन परीक्षा होणार आहे.
या भरतीसाठी अर्ज करणाऱ्या उमेदवारांचे वय १ जानेवारी २००५ ते १ जानेवारी २००८ दरम्यान असणे आवश्यक आहे. म्हणजेच उमेदवाराचे किमान वय १७.५ वर्षे, तर कमाल वय २१ वर्षे असावे. काही विशेष प्रवर्गांना शासनाच्या नियमानुसार वयोमर्यादेत सूट दिली जाईल. शैक्षणिक पात्रतेबाबत बोलायचे झाल्यास, अर्जदारांनी १२वी उत्तीर्ण असावे आणि भौतिकशास्त्र, गणित आणि इंग्रजी या विषयांमध्ये किमान ५० टक्के गुण मिळवलेले असावेत. याशिवाय, मेकॅनिकल, इलेक्ट्रिकल, इलेक्ट्रॉनिक्स, कंप्युटर सायन्स यासारख्या ट्रेडमध्ये तीन वर्षांचा डिप्लोमा घेतलेले उमेदवार देखील अर्ज करू शकतात, परंतु त्यांच्याकडेही ५० टक्के गुण असणे आवश्यक आहे. दोन वर्षांचा व्होकेशनल कोर्स पूर्ण केलेले उमेदवारही पात्र आहेत, मात्र त्यामध्ये फिजिक्स, मॅथ्स व इंग्रजीत ५० टक्के गुण आवश्यक आहेत.
अग्निवीर वायू भरती प्रक्रिया चार टप्प्यांत होणार आहे. पहिल्या टप्प्यात ऑनलाइन लेखी परीक्षा घेतली जाईल, त्यानंतर फिजिकल फिटनेस टेस्ट (PST/PET), कागदपत्र पडताळणी आणि वैद्यकीय तपासणी होईल. या सर्व टप्प्यांमध्ये यशस्वी ठरलेल्या उमेदवारांची अंतिम मेरिट लिस्ट तयार केली जाईल. पगाराच्या बाबतीत, अग्निवीर वायूला पहिल्या वर्षी ३०,००० रुपये प्रति महिना पगार मिळेल. हा पगार दरवर्षी वाढून चौथ्या वर्षी ४०,००० रुपये प्रति महिना होईल. सेवा पूर्ण केल्यानंतर उमेदवारांना सुमारे १०.०८ लाख रुपये ‘सेवा निधी’ करमुक्त स्वरूपात दिली जाईल.
अर्ज करण्यासाठी उमेदवारांनी सर्वप्रथम agnipathvayu.cdac.in या संकेतस्थळावर जावे. “New Registration” वर क्लिक करून नोंदणी करावी. त्यानंतर लॉगिन करून आवश्यक माहिती भरावी, कागदपत्रे अपलोड करावी, अर्ज फी भरावी आणि अर्ज सबमिट करावा. अर्जाचा प्रिंटआउट भविष्यासाठी जतन करून ठेवावा.
