फोटो सौजन्य - Social Media
सीईटी परीक्षेत ९५ ते १०० पर्सेंटाइल गटातील १,३२२ विद्यार्थ्यांनी कॅप फेरीत प्रवेश घेतला नाही, तर ८५ ते ९५ पर्सेंटाइल गटातील २,६६१ विद्यार्थी प्रवेश प्रक्रियेतून बाहेर राहिले. या विद्यार्थ्यांपैकी अनेकांनी आयटीआय, पॉलिटेक्निक, डिजिटल टेक्नॉलॉजी आणि इतर व्यावहारिक कोर्सेसचा मार्ग स्वीकारला आहे.
राज्यातील नामांकित अभियांत्रिकी महाविद्यालयांमध्ये प्रवेशासाठी दरवर्षी तीव्र चुरस असते. राष्ट्रीय पातळीवरील जेईई मेन आणि अॅडव्हान्स्ड परीक्षांद्वारे आयआयटी, एनआयटीसारख्या संस्थांत प्रवेश दिला जातो, तर राज्य पातळीवर सीईटीद्वारे अभियांत्रिकी कॉलेजांमध्ये प्रवेश प्रक्रिया राबवली जाते. या वर्षी १५९ विद्यार्थ्यांनी अ-कॅप फेरीत, तर ६७ विद्यार्थ्यांनी संस्थात्मक फेरीत प्रवेश घेतला. ८५ ते ९५ पर्सेंटाइल गटातील ४६४ जणांनी अ-कॅप, तर ३२६ जणांनी संस्थात्मक फेरीत प्रवेश निश्चित केला आहे.
शिक्षणतज्ज्ञांच्या मते, बदलती औद्योगिक गरज, वाढता शिक्षणखर्च आणि तात्काळ रोजगाराच्या संधी यामुळे विद्यार्थी अभियांत्रिकीपेक्षा स्किल-बेस्ड शिक्षणाकडे वळत आहेत. हाताला काम, कमी कालावधीचा अभ्यासक्रम आणि स्थिर उत्पन्नाची खात्री देणारे आयटीआय कोर्स तरुणांना अधिक आकर्षक वाटत आहेत. परिणामी, अभियांत्रिकीपेक्षा व्यावहारिक शिक्षणाचा कल राज्यात झपाट्याने वाढताना दिसतो आहे.
