सायबर चोरट्यांकडून महिलेची फसवणूक; तब्बल दीड कोटींना घातला गंडा

शासकीय ठेकेदार असल्याची बनावट कागदपत्रे दाखवून एका महिलेला कंपनीत गुंतवणूक करण्यास भाग पाडत एका महिलेची तब्बल एक कोटी ४३ लाख ७५ हजार रुपयांची फसवणूक केल्याचा प्रकार समोर आला आहे.

पुणे : शासकीय ठेकेदार असल्याची बनावट कागदपत्रे दाखवून एका महिलेला कंपनीत गुंतवणूक करण्यास भाग पाडत एका महिलेची तब्बल एक कोटी ४३ लाख ७५ हजार रुपयांची फसवणूक केल्याचा प्रकार समोर आला आहे. महिलेला गुंतवणूकीवर ६ ते १२ टक्के प्रति महिना नफा देण्याचे आमिष दाखविण्यात आले होते. याप्रकरणी खडकी पोलिसांनी सत्यम जोशी, देविका सत्यम जोशी, राहुल एरंडवणे, हर्षल चैाधरी, कुलदीप कदम, वैभव इंगवले अशा नावाच्या व्यक्तींविरोधात गुन्हा दाखल करण्यात आला आहे. याबाबत ३८ वर्षीय महिलेने खडकी पोलीस ठाण्यात तक्रार दिली आहे.

पोलिसांच्या माहितीनुसार, तक्रारदार महिला खडकीतील औंध रस्ता परिसरात राहायला आहेत. त्या व्यावसायिक आहेत. यात २०२१ मध्ये तक्रारदार व यातील काही आरोपी हे एकत्रित व्यवसाय करत होते. त्यामुळे त्यांची ओळख होती. यावेळी आरोपींनी तक्रारदारांचा विश्वास संपादन केला होता. नंतर त्यांना आमच्या कंपनीला शासकीय कामाचा ठेका मिळाला आहे. या कामात गुंतवणूक केल्यास दरमहा सहा ते बारा टक्के व्याज देण्यात येईल, अशी बतावणी केली. नंतर आरोपींनी महिलेकडून वेळोवेळी एक कोटी ४३ लाख ७५ हजार रुपये घेतले.

महिलेने पैसे गुंतविल्यानंतर सुरुवातीला काही रक्कम परताव्या पोटी देण्यातही आली होती. त्यानंतर महिलेला परतावा देण्यात आला नाही. परतावा न मिळाल्याने आरोपींकडे गुंतविलेली रक्कम परत मागितली. तेव्हा आरोपींनी टाळाटाळ सुरू केली. फसवणूक झाल्याचे लक्षात आल्यानंतर महिलेने पोलिसांकडे नुकतीच तक्रार दिली. गुन्हे शाखेचे पोलीस निरीक्षक गजानन चोरमोले तपास करत आहेत.