काळीज पिळवटून टाकणारी घटना! डोंगरावरून उडी घेणाऱ्या मुलाला वाचवताना आई-वडिलांचाही मृत्यू, संभाजीनगर हादरलं
Chhatrapati Sambhajinagar : छत्रपती संभाजीनगरच्या तिसगाव परिसरातील खवड्या डोंगरावर शुक्रवारी (21 ऑगस्ट 2026) अत्यंत दुर्दैवी आणि हृदयद्रावक घटना घडली. १८ वर्षीय तरुणाने डोंगरावरून उडी घेण्याचा प्रयत्न केला. त्याला रोखण्यासाठी आई-वडिलांसह स्थानिक नागरिक, पोलीस आणि अग्निशमन दलाचे जवान घटनास्थळी पोहोचले. मात्र, मुलाला वाचवण्याच्या प्रयत्नात वडिलांचाही दरीत पडून मृत्यू झाला. त्यानंतर या धक्कादायक घटनेमुळे आईनेही डोंगरावरून खाली उडी घेतल्याचे समोर आले आहे.
मिळालेल्या माहितीनुसार, कुणाल मुरलीधर चांदवडे (१८) हा शुक्रवारी सकाळी सुमारे दहा वाजता खवड्या डोंगरावर गेला होता. तो डोंगरावरून खाली उडी घेण्याचा प्रयत्न करत असल्याची माहिती त्याच्या आई-वडिलांना मिळाल्यानंतर ते तातडीने घटनास्थळी पोहोचले.
कुणालला वाचवण्यासाठी त्याचे आई-वडील तसेच परिसरातील नागरिकांनी त्याची समजूत काढण्याचा प्रयत्न केला. सकाळी सुमारे दहा वाजल्यापासून त्याला उडी न घेण्याची विनंती करण्यात येत होती. पोलीस आणि अग्निशमन दलाचे जवानही घटनास्थळी दाखल झाले होते. मात्र, कुणाल कोणाचेही ऐकण्याच्या मनस्थितीत नसल्याचे सांगण्यात येत आहे. त्याला वाचवण्यासाठी त्याचे वडील मुरलीधर चांदवडे पुढे सरसावले. त्यांनी मुलाला पकडण्याचा प्रयत्न केला. मात्र, वडील त्याच्यापर्यंत पोहोचत असतानाच कुणालने खाली उडी घेतली.
कुणालला वाचवण्याच्या प्रयत्नात मुरलीधर चांदवडे यांचाही तोल गेला आणि ते दरीत खाली कोसळले. उंचावरून खाली पडल्याने कुणाल आणि त्याचे वडील मुरलीधर चांदवडे यांचा मृत्यू झाला. डोळ्यांसमोर मुलगा आणि पती दरीत कोसळल्याचे पाहून आई संगीता चांदवडे यांना मोठा धक्का बसला. त्यानंतर त्यांनीही डोंगरावरून खाली उडी घेतल्याचे समोर आले. यात त्यांचाही मृत्यू झाला.
या घटनेत कुणाल मुरलीधर चांदवडे, मुरलीधर चांदवडे आणि संगीता चांदवडे या तिघांचा मृत्यू झाला. हे कुटुंब देवळाई-सातारा परिसरातील असल्याची माहिती आहे. घटनेच्या वेळी उपस्थित असलेल्या नागरिकांसमोरच ही संपूर्ण घटना घडल्याने परिसरात मोठी खळबळ उडाली. एका मुलाला वाचवण्याच्या प्रयत्नात संपूर्ण कुटुंबावर काळाचा घाला घातला गेल्याने हळहळ व्यक्त होत आहे. कुणालने हे टोकाचे पाऊल का उचलले, याचे कारण अद्याप स्पष्ट झालेले नाही. या प्रकरणी संबंधित यंत्रणांकडून पुढील तपास केला जात आहे.
दिंडोरीत खळबळ! पैशांच्या वादातून तरुणाची निघृण हत्या; पोलिसांनी आरोपींना ठोकल्या बेड्या
.png "Videos"){kind=small}
