सोमवार, 12 ऑक्टोबर 2026
परराज्यातील अवैध मद्य वाहतुकीवर राज्य उत्पादन शुल्क विभागाचा दणका! एकास अटक, १.३० लाखांचा मुद्देमाल जप्त
बेलापूर-ठाणे मार्गावरून परराज्यातील अवैध मद्याची वाहतूक होणार असल्याची गोपनीय माहिती राज्य उत्पादन शुल्क विभागाच्या कोकण विभागीय भरारी पथकाला मिळाली होती. या माहितीच्या आधारे निरीक्षक दिगंबर शेवाळे यांच्या मार्गदर्शनाखाली पथकाने ऐरोली रेल्वेस्थानकासमोर सापळा रचला.यावेळी चॉकलेटी आणि पांढऱ्या रंगाचा टाटा कंपनीचा बारा चाकी ट्रक (क्रमांक एमएच-१०-एडब्ल्यू-५२९४) संशयास्पदरीत्या जात असल्याचे पथकाच्या निदर्शनास आले. अधिकाऱ्यांनी ट्रक अडवून वाहनचालकाकडे चौकशी केली.
पथकाने ट्रकमधील मालाबाबत विचारणा केली असता वाहनचालकाने ट्रकमध्ये साबणाचे बॉक्स असल्याचे सांगितले. मात्र, अधिकाऱ्यांना संशय आल्याने त्यांनी वाहनाची कसून तपासणी केली. तपासणीदरम्यान ट्रकमध्ये मोठ्या प्रमाणात खाकी रंगाचे बॉक्स आढळून आले. अधिकाऱ्यांनी हे बॉक्स उघडून पाहिले असता त्यामध्ये साबणाऐवजी मद्याच्या बाटल्या असल्याचे स्पष्ट झाले. या बॉक्समध्ये गोवा राज्यात निर्मित ‘रॉयल ब्ल्यू माल्ट व्हिस्की’च्या १८० मिली क्षमतेच्या बाटल्या आढळल्या. संबंधित मद्याची महाराष्ट्रात विक्री करण्यास बंदी असल्याचे उत्पादन शुल्क विभागाने नमूद केले आहे.
ट्रकच्या तपासणीत एकूण एक हजार बॉक्स आढळले. या बॉक्समध्ये ४८ हजार मद्याच्या बाटल्या ठेवण्यात आल्या होत्या. विशेष म्हणजे, जप्त केलेल्या बाटल्यांवर बॅच क्रमांक आणि कमाल किरकोळ किंमत (MRP) नमूद नसल्याचेही तपासणीदरम्यान निदर्शनास आले. राज्य उत्पादन शुल्क विभागाने संपूर्ण मद्यसाठा आणि वाहतुकीसाठी वापरलेला ट्रक जप्त केला आहे. या कारवाईतील मुद्देमालाची एकूण किंमत १ कोटी ३० लाख ६० हजार रुपये असल्याची माहिती विभागाकडून देण्यात आली.
या प्रकरणी जावेदखान नवाबखान पिंजारी (वय २४, रा. गधडदेव, पोस्ट बोराडी, तालुका शिरपूर, जिल्हा धुळे) याला अटक करण्यात आली आहे. आरोपीविरुद्ध महाराष्ट्र दारूबंदी कायदा, १९४९ मधील कलम ६५ (अ), ६५ (ई), ८०, ८१, ८३, ९० आणि १०३ अन्वये गुन्हा नोंदवण्यात आला आहे. या मद्यसाठ्याच्या वाहतुकीमागे आणखी कोणाचा सहभाग आहे का, मद्य कोठून आणण्यात आले आणि ते कोणत्या ठिकाणी पोहोचवण्यात येणार होते, याबाबत पुढील तपासातून माहिती समोर येण्याची शक्यता आहे.
राज्य उत्पादन शुल्क आयुक्त डॉ. राजेश देशमुख, सहआयुक्त प्रसाद सुर्वे, कोकण विभागाचे विभागीय उपायुक्त प्रदीप पवार आणि ठाणे-१ चे अधीक्षक प्रवीण तांबे यांच्या निर्देशानुसार ही कारवाई करण्यात आली. या मोहिमेत निरीक्षक दिगंबर शेवाळे, दुय्यम निरीक्षक एच. बी. यादव, व्ही. व्ही. सकपाळ तसेच जवान ए. पी. राठोड, हर्षल खरबस, हनुमंत गाढवे आणि अमोल सानप यांनी सहभाग घेतला.
परराज्यातून महाराष्ट्रात अवैधरीत्या मद्य आणण्याचा हा प्रयत्न राज्य उत्पादन शुल्क विभागाच्या सतर्कतेमुळे उघडकीस आला आहे.
साबणाच्या बॉक्सच्या नावाखाली मोठ्या प्रमाणावर मद्याची वाहतूक होत असल्याचे तपासणीत समोर आल्याने या प्रकरणाचे गांभीर्य वाढले आहे. या प्रकरणाचा पुढील तपास दुय्यम निरीक्षक एच. बी. यादव करीत आहेत. अवैध मद्याच्या वाहतुकीत सहभागी असलेल्या इतर व्यक्तींचा शोध आणि मद्यसाठ्याच्या पुरवठा साखळीचा तपास महत्त्वाचा ठरणार आहे.
