Vaishnavi Hagawane Case : वैष्णवी हगवणे मृत्यूप्रकरणी मोठी अपडेट; तपासातून धक्कादायक माहिती उघड

न्यायालयाने शशांक, लता आणि करिष्मा हगवणे यांच्या पोलीस कोठडीत एक दिवस तर राजेंद्र आणि सुशील यांच्या पोलीस कोठडीत ३१ मेपर्यंत वाढ केली आहे.

संग्रहित फोटो

Follow Us:

Follow Us:

पुणे : बावधनमधील वैष्णवी हगवणे मृत्यूप्रकरणात पती शशांक व दीर सुशील या हगवणे बंधूनी त्यांची आई लता आणि बहिण करिष्मा यांचे मोबाईल या गुन्‍ह्यातील फरार आरोपी नीलेश चव्हाण याच्या मदतीने लंपास केले. मोबाईलमध्ये शशांक याने पत्नी वैष्णवी यांना मारहाण केल्याचे आणि आरोपींमधील संभाषणाचे पुरावे असू शकतात, अशी माहिती तपास अधिकाऱ्यांनी न्यायालयास दिली. दोन्ही बाजूचा युक्तीवाद झाल्यानंतर न्यायालयाने शशांक, लता आणि करिष्मा हगवणे यांच्या पोलीस कोठडीत एक दिवस तर राजेंद्र आणि सुशील यांच्या पोलीस कोठडीत ३१ मेपर्यंत वाढ केली आहे.

वैष्णवी हगवणे हिला आत्महत्येस प्रवृत्त केल्याप्रकरणी अटकेत असलेला पती शशांक राजेंद्र हगवणे (वय २७), सासू लता राजेंद्र हगवणे (वय ५४), नणंद करिष्मा राजेंद्र हगवणे (वय ३१), सासरा राजेंद्र तुकाराम हगवणे (वय ६३), दिर सुशील राजेंद्र हगवणे (वय २७) यांच्या पोलीस कोठडीची मुदत बुधवारी संपली. त्यामुळे पाचही आरोपींना बुधवारी न्यायालयात हजर करण्यात आले होते.

नीलेश चव्हाणचा राजेंद्र आणि सुशील यांच्या मदतीने शोध घेतला जात आहे. तर लता, करिष्मा व सुशिल हगवणे यांच्या मोबाईलचाही शोध सुरू आहे. चव्हाण व सुशिल हगवणे यांच्यामधील गुन्ह्याच्या अनुषंगाने झालेले चॅट, मेसेजस हे पुराव्यासाठी जप्त केले जात आहेत. वैष्णवी यांचा मृत्यू होण्यापूर्वी शशांकने त्यांना पाच आणि तीन दिवस आधी वेगवेगळ्या हत्याराने मारहाण केली. त्याने आणखी कोणत्या हत्याराने मारहाण केली याचा शशांककडे तपास करून ते हत्यार जप्त करायचे आहे. त्यामुळे शशांक, लता आणि करिष्मा हगवणे यांच्या पोलीस कोठडीचे हक्क अबाधित ठेवून एक दिवसांची तर राजेंद्र आणि सुशील यांच्या पोलीस कोठडीत सात दिवसांची वाढ करण्यात यावी, असा युक्तिवाद सरकारी वकील नितीन अडागळे यांनी केला. आरोपींच्या वतीने ॲड. विपुल दुशिंग यांनी युक्तिवाद केला.

सोन्याबाबतची माहिती स्वतः पोलिसांना दिली – बचाव पक्ष

पोलिसांनी पोलीस कोठडीची मागणी करताना जुनीच कारणे दिली आहेत. सोन्याबाबतची सर्व माहिती यापूर्वी आरोपींनी स्वतःहून पोलिसांना दिली आहे. व्यवसाय करण्यासाठी कुटुंबातील सर्वांचे सोने गहाण ठेवण्यात आले होते. आपले सोने काढून घेतल्याची तक्रार वैष्णवी यांनी केलेली नाही. त्यांचे एका तरुणासोबतचे चॅटिंग शशांक यांना मिळाले होते. त्यातून त्यांच्यात वाद झाले होते, याबाबत तपास पोलिसांनी केलेला नाही, असा युक्तिवाद ॲड. दुशिंग यांनी केला.

हगवणे कुटुंबीयांच्या पोलीस कोठडीत वाढ

दोन्ही पक्षांचा युक्तिवाद ऐकून घेत प्रथमवर्ग न्यायदंडाधिकारी व्ही. पी. खंदारे यांनी आरोपींच्या पोलीस कोठडीत वाढ केली आहे. शशांक, लता आणि करिष्मा हगवणे यांच्या पोलिस कोठडीत एक दिवस तर राजेंद्र आणि सुशील यांच्या पोलिस कोठडीत ३१ मेपर्यंत वाढ करण्यात आली आहे. वरिष्ठ पोलिस निरीक्षक अनिल विभूते या गुन्ह्याचा तपास करत आहे. आत्तापर्यंत केलेल्या तपासाची माहिती त्यांनी न्यायालयास दिली.

यांना मिळाला जामीन 

फरार झालेला दीर आणि सासरा यांना आश्रय दिल्याप्रकरणी अटक केलेल्या प्रीतम वीरकुमार पाटील (वय ४७, रा. कोगनोळी, ता. चिकोडी, जि. बेळगाव, कर्नाटक), मोहन ऊर्फ बंडू उत्तम भेगडे (वय ६०, रा. वडगाव मावळ), बंडू लक्ष्मण फाटक (वय ५५, रा. लोणावळा), अमोल विजय जाधव (वय ३५, रा. पुसेगाव, ता. खटाव, जि. सातारा), राहुल दशरथ जाधव (वय ४५, रा. पुसेगाव, ता. खटाव, जि. सातारा) यांना जामीन मंजूर झाला आहे. तर वैष्णवी यांच्या मुलाचा ताबा घेण्यासाठी गेलेल्या कस्पटे कुटुंबीयांना पिस्तुलाचा धाक दाखवत धमकी दिल्याप्रकरणी दाखल गुन्ह्यातील आरोपी नीलेश चव्हाण हा अद्याप फरार आहे.

Web Title: Shocking information has been revealed from the investigation into vaishnavi hagavanes death

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News only on Navarashtra.com