सोमवार, 2 नोव्हेंबर 2026
टायर फुटल्याने भरधाव कार उलटली, दोनशे फूट पुढे गेली अन्...; कारमधील तिघे जखमी (संग्रहित फोटो)
छत्रपती संभाजीनगर : भरधाव वेगातील कारचे टायर फुटून एक अपघात झाला. यामध्ये कारने दोनशे फूट जाऊन एका शेतात पलटी झाली ही घटना धुळे-सोलापूर राष्ट्रीय महामार्गावरील मुरमा (ता. पैठण) फाट्यावर बोरेश्वर मंदिराजवळ मंगळवारी (दि.३१) रोजी दुपारी चारच्या सुमारास घडली. या अपघातात कार चालक गंभीर जखमी झाला तर दोघे किरकोळ जखमी झाले आहे.
याविषयी अधिक माहिती अशी की, बीड येथील ओमकार सानप हे खाजगी कामानिमित्त आपल्या दोन मित्रांसोबत बीड येथून छत्रपती संभाजीनगरकडे एमएच १४ एफएक्स १८२५ या क्रमांकाच्या कारने जात होते. मुरमा फाट्याजवळील बोरेश्वर मंदिरासमोर आले असता अचानक कारचा टायर फुटला. टायर फुटल्यामुळे चालकाचे वाहनावरील नियंत्रण पूर्णपणे सुटले आणि कार रस्त्याच्या कडेला असलेल्या नालीत जाऊन अनेक पलट्या घेत सुमारे २०० फूट अंतरावर शेतात घुसली. वेग अधिक असल्याने कार शेवटी झाडावर जाऊन आदळली.
हा अपघात इतका भीषण होता की, कारचे मोठे नुकसान झाले. अपघातानंतर घटनास्थळी काही काळ नागरिकांची गर्दी झाली होती. स्थानिकांनी तत्काळ धाव घेत जखमींना मदत केली आणि भोकरवाडी येथील टोलनाक्यावर माहिती दिली. माहिती मिळताच रुग्णवाहिका तातडीने घटनास्थळी दाखल झाली. रुग्णवाहिकेवरील कर्मचारी महेश जाधव, आत्माराम गाडेकर, रवी गाढे यांनी जखमींना तात्काळ पाचोड येथील ग्रामीण रुग्णालयात उपचारासाठी दाखल केले.
घाटीत उपचार सुरू
यावेळी वैद्यकीय अधिकारी डॉ. नोमान शेख यांनी जखमींवर प्राथमिक उपचार केले. ओमकार सानप याची प्रकृती गंभीर असल्याने पुढील उपचारासाठी त्यांना छत्रपती संभाजीनगर येथील रुग्णालयात हलवण्यात आले. या अपघाताची नोंद पाचोड पोलीस ठाण्यात करण्यात आली आहे. या घटनेचा पुढील तपास पोलीस निरीक्षक सचिन पंडित यांच्या मार्गदर्शनाखाली पोलीस उपनिरीक्षक गोविंद राऊत, विष्णू सानप आणि ताराचंद घडे हे करत आहेत.
रत्नागिरीत टेम्पोची दुचाकीला धडक
दुसऱ्या एका घटनेत, शहरातील मारुती मंदिर ते आठवडा बाजार जाणाऱ्या मुख्य रस्त्यावर रुद्र हॉटेलसमोर एक भीषण अपघात झाला. भरधाव टेम्पोने दुचाकीला धडक दिल्याने ७३ वर्षीय वृद्ध दुचाकीस्वार गंभीर जखमी झाले आहेत. याप्रकरणी रत्नागिरी शहर पोलीस ठाण्यात टेम्पो चालकाविरुद्ध गुन्हा दाखल करण्यात आला. राजन जयवंत जाधव (वय ७३, रा. शंखेश्वर गार्डन, आरोग्य मंदिर, रत्नागिरी) असे या अपघातात गंभीर जखमी झालेल्या व्यक्तीचे नाव आहे.
Accident News: भीषण ट्रक अपघात चालकाचा मृत्यू; राजापूरमधील घटना
