Crime News: बस थांबली अन् वृद्ध महिलेची बॅग गायब; १.७८ लाखांची चोरी करणाऱ्या चार महिला जाळ्यात
वाशिम : बसमधून प्रवास करणाऱ्या वृद्ध महिलेच्या बॅगेतून सोन्याचे दागिने आणि रोख रक्कम चोरणाऱ्या चार महिलांच्या टोळीला पोलिसांनी अटक केली आहे. मंगरूळपीर येथून अकोल्याकडे जाणाऱ्या बसमध्ये ही चोरी झाली. या घटनेत ७० वर्षीय महिलेच्या बॅगेतून सोन्याचे जुने वापरातील दागिने आणि २८ हजार रुपये रोख असा एकूण सुमारे १ लाख ७८ हजार रुपयांचा मुद्देमाल चोरीला गेला. मिळालेल्या माहितीनुसार, संबंधित वृद्ध महिला मंगरूळपीरहून अकोल्याच्या दिशेने बसने प्रवास करत होत्या. प्रवासादरम्यान गर्दीचा फायदा घेत चार महिलांनी त्यांच्या बॅगेतील दागिने आणि रोकड असलेली पिशवी लांबवली. शेलूबाजार येथे चारही महिला बसमधून उतरल्या. बस पुढे गेल्यानंतर वृद्ध महिलेने आपली बॅग तपासली असता दागिने आणि रोख रक्कम असलेली पिशवी गायब असल्याचे त्यांच्या लक्षात आले. त्यांनी तातडीने आरडाओरड करत घटनेची माहिती दिली. त्यानंतर स्थानिक पोलिसांनी तत्काळ हालचाली सुरू केल्या.
बसमधून उतरलेल्या चारही महिला एका रिक्षातून जात असल्याची माहिती पोलिसांना मिळाली. त्यानंतर पोलिसांनी संबंधित रिक्षाचा पाठलाग सुरू केला. काही अंतरावर रिक्षा थांबवून पोलिसांनी महिलांना ताब्यात घेतले. दरम्यान, तक्रारदार वृद्ध महिलेलाही घटनास्थळी बोलावण्यात आले. चौकशीदरम्यान संबंधित महिलांनी चोरी केल्याची कबुली दिल्याची माहिती पोलिसांनी दिली आहे. या प्रकरणी पोलिसांनी गुन्हा दाखल केला असून, पुढील तपास सुरू आहे.
अटक करण्यात आलेल्या चारही महिलांची पोलिसांकडून चौकशी सुरू आहे. या टोळीने यापूर्वी अशाच पद्धतीने बसमधील प्रवाशांना लक्ष्य केले आहे का, इतर कोणत्या ठिकाणी चोरीचे गुन्हे केले आहेत का, याचाही तपास पोलिसांकडून केला जात आहे. बसमधील गर्दीचा फायदा घेत प्रवाशांच्या बॅगा हेरून चोरी करणाऱ्या टोळीचा पर्दाफाश झाल्याने पोलिसांच्या कारवाईचे कौतुक होत आहे.
.png "Videos"){kind=small}
