सोमवार, 2 नोव्हेंबर 2026
( फोटो सौजन्य- सोशल मिडिया)
Maha Sakthi Teaser: दाक्षिणात्य चित्रपटसृष्टीची ‘लेडी सुपरस्टार’ नयनतारा आता देवी महाशक्तीच्या दिव्य आणि रौद्र अवतारात मोठ्या पडद्यावर प्रेक्षकांच्या भेटीला येण्यासाठी सज्ज झाली आहे. २०२० मध्ये प्रदर्शित झालेल्या सुपरहिट तमिळ चित्रपट ‘मुकुथी अम्मान’चा सिक्वेल असलेल्या ‘मुकुथी अम्मान २ – राइज ऑफ महाशक्ती’चा टीझर नुकताच प्रदर्शित करण्यात आला आहे. जवळपास अडीच मिनिटांच्या या टीझरमध्ये पौराणिक कथा, भक्ती आणि अॅक्शनचा जबरदस्त संगम पाहायला मिळतो.
‘राइज ऑफ महाशक्ती’ या शीर्षकाने प्रदर्शित झालेल्या टीझरमध्ये एका प्राचीन जगाची झलक पाहायला मिळते. गावात अशांतता पसरलेली असते आणि एका तरुण राजकुमाराच्या जीवाला धोका निर्माण झालेला असतो. शत्रू राजकुमाराला ठार करण्यासाठी गावाच्या दिशेने कूच करत असल्याचे दिसते.
आपल्या मुलाचा जीव वाचावा यासाठी एक आई देवी मुकुथी अम्मान अर्थात महाकालीच्या मूर्तीसमोर प्रार्थना करते. ती देवीकडे आपल्या मुलाला वाचवण्याची विनवणी करते आणि त्यासाठी स्वतःच्या प्राणांचा त्याग करण्याची तयारी दर्शवते.
यानंतर टीझरमध्ये एक धक्कादायक प्रसंग पाहायला मिळतो. मुलाचा जीव वाचावा यासाठी ती आई स्वतःचे जीवन देवीला अर्पण करते. या त्यागानंतर कथानक एका मोठ्या युद्धाच्या दिशेने जात असल्याचे दिसते.
टीझरच्या शेवटच्या काही सेकंदांमध्ये नयनताराचा महाकालीच्या रूपातील दिव्य आणि रौद्र अवतार समोर येतो. आईच्या भक्ती आणि त्यागामुळे देवीचा अवतार प्रकट होतो आणि कुटुंबाला धोका देणाऱ्या शक्तींविरोधात ती उभी ठाकते. या काही सेकंदांमध्ये दिसणारी दृश्यात्मक भव्यता आणि अॅक्शन प्रेक्षकांचे लक्ष वेधून घेत आहे.
टीझरमध्ये रणांगण, राजसिंहासन, घोडदळ आणि मोठ्या युद्धाची दृश्ये पाहायला मिळतात. त्यामुळे चित्रपटात चांगल्या आणि वाईट शक्तींमधील मोठा संघर्ष पाहायला मिळणार असल्याचे संकेत मिळतात.
नयनताराचा २०२० मध्ये आलेला ‘मुकुथी अम्मान’ हा देवी आणि सामान्य माणसांच्या नात्यावर आधारित कॉमेडी-ड्रामा होता. मात्र, सिक्वेलमध्ये निर्मात्यांनी भक्तीसोबत अॅक्शन आणि पौराणिक कथेचा भव्य मेळ साधला आहे.
दिग्दर्शक सुंदर सी. यांनी फ्रँचायझीला यावेळी मोठ्या व्यावसायिक चित्रपटाचे स्वरूप दिल्याचे टीझरवरून दिसून येते. पौराणिक कथा, भव्य सेट्स, अॅक्शन आणि नयनताराचा महाशक्ती अवतार यामुळे चित्रपटाबद्दल उत्सुकता वाढली आहे.
विशेष म्हणजे, टीझरसोबतच निर्मात्यांनी चित्रपटाच्या प्रदर्शनाची तारीखही जाहीर केली आहे. ‘मुकुथी अम्मान २ – राइज ऑफ महाशक्ती’ हा चित्रपट ६ नोव्हेंबर २०२६ रोजी दिवाळीच्या मुहूर्तावर प्रदर्शित होणार आहे. हिंदीसह इतर भारतीय भाषांमध्ये हा चित्रपट जगभरात प्रदर्शित केला जाणार असल्याचे सांगण्यात आले आहे.
याच दिवशी रणबीर कपूर आणि साई पल्लवी यांच्या बहुप्रतिक्षित ‘रामायणम्’शी या चित्रपटाची बॉक्स ऑफिसवर टक्कर होणार आहे. त्यामुळे दोन मोठ्या पौराणिक आणि भक्तीप्रधान चित्रपटांमधील हा सामना प्रेक्षकांसाठी आणि बॉक्स ऑफिससाठी विशेष ठरणार आहे.
