बुधवार, 23 सप्टेंबर 2026
(फोटो सौजन्य- सोशल मीडिया)
अभय जोधपूरकर याला बेस्ट मेल प्लेबॅक सिंगर या श्रेणीत रजत कमळ हा राष्ट्रीय चित्रपट पुरस्कार प्रदान करण्यात आला. राष्ट्रपती द्रौपदी मुर्मू यांच्या हस्ते हा पुरस्कार देण्यात आला.
काही महिन्यांपूर्वीच ७२ व्या राष्ट्रीय चित्रपट पुरस्कारांची घोषणा करण्यात आली होती. आता पुरस्कार सोहळ्यात अभय जोधपूरकर यांनी हा मानाचा पुरस्कार स्वीकारला आहे. त्यांच्या या यशामुळे मराठी चित्रपटसृष्टीच्या शिरपेचात आणखी एक मानाचा तुरा रोवला गेला आहे.
यंदाच्या राष्ट्रीय चित्रपट पुरस्कारांमध्ये मराठी चित्रपटसृष्टीला आणखी एक मोठा सन्मान मिळाला आहे. ‘मुक्काम पोस्ट बोबिंलवाडी’ या मराठी चित्रपटाला सर्वोत्कृष्ट मराठी चित्रपटाचा राष्ट्रीय पुरस्कार मिळाला आहे.
त्यामुळे अभय जोधपूरकर यांचा पुरस्कार आणि ‘मुक्काम पोस्ट बोबिंलवाडी’चा सन्मान यामुळे मराठी सिनेसृष्टीसाठी हा सोहळा खास ठरला.
‘घरत गणपती’ हा चित्रपट २०२४ मध्ये प्रदर्शित झाला होता. या चित्रपटातील ‘नवसाची गौरी माझी’ हे गाणं रिलीज झाल्यापासूनच प्रेक्षकांच्या पसंतीस उतरलं. विशेष म्हणजे आजही या गाण्याची लोकप्रियता कायम आहे.
गौरी-गणपतीच्या दिवसांमध्ये हे गाणं अनेक ठिकाणी आवर्जून ऐकायला मिळतं. सोशल मीडियावरही या गाण्यावर रील्स बनवण्याचा ट्रेंड पाहायला मिळतो. आता याच लोकप्रिय गाण्याच्या गायकाला राष्ट्रीय पुरस्कार मिळाल्याने चाहत्यांमध्येही आनंदाचं वातावरण आहे.
‘घरत गणपती’मध्ये दिसली स्टारकास्ट
‘घरत गणपती’ या चित्रपटात निकिता दत्ता, भूषण प्रधान, अश्विनी भावे, अजिंक्य देव, शुभांगी लाटकर, राजसी भावे, शुभांगी गोखले, संजय मोने, रुपेश बने आणि समीर खांडेकर यांच्या प्रमुख भूमिका आहेत.
‘नवसाची गौरी माझी’ या गाण्याला मिळालेला राष्ट्रीय सन्मान हा अभय जोधपूरकर यांच्या संगीतप्रवासातील महत्त्वाचा टप्पा ठरला आहे.
