सोमवार, 21 सप्टेंबर 2026
(फोटो सौजन्य- सोशल मीडिया)
Jayanti 2 Box Office Collection: मराठी मनोरंजनसृष्टीत काही वर्षांपूर्वी प्रदर्शित झालेल्या ‘जयंती’ या चित्रपटाला प्रेक्षकांचा चांगला प्रतिसाद मिळाला होता. आता या चित्रपटाचा दुसरा भाग ‘जयंती २’ प्रेक्षकांच्या भेटीला आला आहे. कॉलेजमधील भेदभावाचा गंभीर विषय मांडणाऱ्या या चित्रपटाला बॉक्स ऑफिसवरही चांगला प्रतिसाद मिळत आहे. ११ सप्टेंबर रोजी प्रदर्शित झालेल्या ‘जयंती २’च्या दुसऱ्या आठवड्यात थिएटर्समधील शोजमध्ये मोठी वाढ झाली असून, चित्रपटाने आतापर्यंत २ कोटी रुपयांचा व्यवसाय केल्याची माहिती समोर आली आहे.
‘जयंती २’च्या पहिल्या आठवड्यात राज्यभरातील सुमारे १५० थिएटर्समध्ये शोज सुरू होते. मात्र, चित्रपटाला मिळणारा प्रतिसाद आणि त्याची होत असलेली चर्चा पाहता दुसऱ्या आठवड्यात चित्रपटाचे शोज मोठ्या प्रमाणात वाढवण्यात आले आहेत.
सध्या २५०हून अधिक थिएटर्समध्ये ५००पेक्षा जास्त शोज सुरू असल्याची माहिती निर्मात्यांनी दिली आहे. यासोबतच चित्रपटाने बॉक्स ऑफिसवर २ कोटी रुपयांचा टप्पा पार केला आहे.
पायलच्या संघर्षाची कथा
‘जयंती २’मध्ये चंद्रपूरसारख्या भागातून उच्च शिक्षणासाठी शहरात येणाऱ्या पायल या तरुणीची कथा मांडण्यात आली आहे. उच्च शिक्षण घेऊन शेती करण्याचं स्वप्न पायल पाहते. मात्र, कॉलेजमध्ये प्रवेश घेतल्यानंतर तिला रॅगिंगचा सामना करावा लागतो.
या त्रासाला पायलने केलेल्या विरोधातून संघर्ष उभा राहतो. या संघर्षात पुढे तिच्यासोबत काय होतं आणि तिला न्याय मिळतो का, हे चित्रपटातून दाखवण्यात आलं आहे.
मात्र, कथा केवळ पायलच्या संघर्षापुरती मर्यादित राहत नाही. कॉलेज प्रशासनाचा दृष्टिकोन, शिक्षक आणि विद्यार्थ्यांकडून मिळणारी वागणूक तसेच सरकारची भूमिका अशा विविध मुद्द्यांवरही चित्रपट भाष्य करतो. आजच्या काळातही शिक्षणाच्या ठिकाणी भेदभावाचे प्रश्न कसे निर्माण होतात, यावर ‘जयंती २’मधून प्रश्न उपस्थित करण्यात आले आहेत.
२०२१ मध्ये प्रदर्शित झालेल्या ‘जयंती’ या चित्रपटानेही प्रेक्षकांचे लक्ष वेधून घेतले होते. आता त्याच कथाविश्वाला पुढे नेत ‘जयंती २’मध्ये शिक्षण क्षेत्रातील भेदभाव आणि त्यामागचं राजकारण यांसारखे विषय मांडण्यात आले आहेत.
आजूबाजूला घडणाऱ्या घटनांशी संबंधित गंभीर विषय आणि विचार करायला लावणारी कथा प्रेक्षकांच्या पसंतीस उतरल्याचं निर्मात्यांचं म्हणणं आहे. त्यामुळेच पहिल्या आठवड्याच्या तुलनेत दुसऱ्या आठवड्यात चित्रपटाच्या शोजमध्ये वाढ झाल्याचं सांगण्यात येत आहे.
ऋतुराज वानखेडे मुख्य भूमिकेत
‘जयंती २’मध्ये अभिनेता ऋतुराज वानखेडे मध्यवर्ती भूमिकेत आहे. त्याच्यासोबत पायल जाधव, प्रियदर्शनी इंदलकर, रोहिणी हट्टंगडी, देविका दफ्तरदार, विजय निकम, राजकुमार जरांगे आणि मानसी सुभाष यांच्या भूमिका आहेत.
चित्रपटाची निर्मिती मेलिओरिस्ट फिल्म स्टुडिओने केली आहे. कथा, संवाद आणि दिग्दर्शन शैलेश बळीराम नरवाडे यांचं आहे. संजीवकुमार हिल्ली यांनी छायांकन केलं असून फैसल महाडिक यांनी संकलनाची जबाबदारी सांभाळली आहे. गीतांना ओंकारस्वरूप यांचं संगीत असून पार्श्वसंगीत मंगेश धाकडे यांचं आहे.
