मंगळवार, 3 नोव्हेंबर 2026
( फोटो सौजन्य- सोशल मिडिया)
Psycho Ranga Trailer: गूढ स्वभावाचा नायक, अनपेक्षित संकटं, थरारक अॅक्शन आणि भावनिक गुंतागुंत… या सगळ्याचा अनोखा मेळ असलेल्या आगामी मराठी चित्रपट ‘सायको रंगा’चा दमदार ट्रेलर नुकताच प्रदर्शित झाला आहे. ट्रेलरमधून ‘रंगा’च्या आयुष्यातील संघर्ष आणि अन्यायाविरुद्ध त्याने पुकारलेली लढाई पाहायला मिळते. त्यामुळे चित्रपटाबद्दलची उत्सुकता आणखी वाढली आहे.
‘सायको रंगा’च्या कथेत एका बाजूला गावाकडची माती, शेतकऱ्यांचे प्रश्न आणि त्यांच्या आयुष्यातील संघर्ष दिसतो, तर दुसरीकडे शहरातील सत्ता आणि पैशांचे खेळ पाहायला मिळतात. या दोन वेगवेगळ्या विश्वांमधून रंगाची गोष्ट पुढे सरकताना दिसते.
अन्याय करणाऱ्यांविरोधात थेट भिडणारा रंगा नेमका कोण आहे? कोणत्या परिस्थितीमुळे तो या संघर्षात उतरतो? त्याच्या लढ्यामागचं नेमकं कारण काय? आणि या सगळ्यामागे दडलेलं गूढ काय आहे? या प्रश्नांची उत्तरं ट्रेलरमधून मिळत नसली, तरी चित्रपटाची उत्सुकता नक्कीच वाढते.
देवेंद्र चौगुले यांच्या लेखन, दिग्दर्शन आणि निर्मितीत साकारलेल्या या चित्रपटात सुबोध भावे, मिलिंद शिंदे, पुष्कर जोग, जान्हवी किल्लेकर, स्मिता गोंदकर, संजय मोहिते, आनंद काळे, उमेश बोळके, रंजना कुलकर्णी, अमोल नाईक, अनिल राबाडे, एन. डी. चौगुले, सचिन मोरे आणि प्रकाश धोत्रे यांच्या भूमिका आहेत.
ट्रेलरमध्ये वेगवेगळ्या व्यक्तिरेखांमधील संघर्ष आणि त्यांच्या नात्यांमधील गुंतागुंत पाहायला मिळते. त्यामुळे चित्रपटाच्या कथेत प्रत्येक व्यक्तिरेखेची नेमकी भूमिका काय आहे, हे जाणून घेण्याची उत्सुकता निर्माण झाली आहे.
‘रंगा’च्या व्यक्तिरेखेत अनेक पदर
दिग्दर्शक देवेंद्र चौगुले यांनी चित्रपटाबद्दल सांगितलं, “‘सायको रंगा’ ही परिस्थितीसमोर उभं राहण्याची आणि आपल्या अस्तित्वासाठी लढण्याची गोष्ट आहे. रंगाच्या व्यक्तिरेखेत अनेक पदर आहेत आणि त्याचा प्रवास जसजसा पुढे जातो, तसतसे त्याच्या आयुष्यातील काही अनपेक्षित पैलू समोर येतात. ट्रेलरमधून चित्रपटातील रंगा आणि त्यातील संघर्षाची झलक दाखवण्याचा प्रयत्न केला आहे.”
२५ सप्टेंबरला चित्रपट होणार प्रदर्शित
देवेंद्र चौगुले लिखित, दिग्दर्शित आणि निर्मित ‘सायको रंगा’च्या सहदिग्दर्शनाची जबाबदारी स्नेहलराज (दादू) यांनी सांभाळली आहे. चित्रपटाला उत्तम चोरडे यांनी संगीत दिलं आहे. थरार, अॅक्शन, भावनिक गुंतागुंत आणि रहस्याचा अनुभव देणारा हा चित्रपट २५ सप्टेंबरला प्रेक्षकांच्या भेटीला येणार आहे.
