सोमवार, 19 ऑक्टोबर 2026
( फोटो सौजन्य- सोशल मिडिया)
Tujhya Aayla Movie: पॅनोरमा स्टुडिओज, कल्ट डिजिटल आणि प्रकाश फिल्म्स यांच्या प्रादेशिक चित्रपटांच्या धोरणात्मक भागीदारीअंतर्गत निर्मिती होणाऱ्या पहिल्या चित्रपटाची घोषणा करण्यात आली आहे. दोन वेळा राष्ट्रीय पुरस्कार विजेते दिग्दर्शक सुजय डहाके दिग्दर्शित ‘तुझ्या आयला’ या चित्रपटाचे उत्सुकता वाढवणारे मोशन पोस्टर नुकतेच प्रदर्शित करण्यात आले. आगळंवेगळं शीर्षक आणि वेगळ्या विषयामुळे हा चित्रपट आधीपासूनच चर्चेत आहे.
पॅनोरमा स्टुडिओज, कल्ट डिजिटल आणि प्रकाश फिल्म्स यांच्यात गेल्या आठवड्यात धोरणात्मक भागीदारीची घोषणा करण्यात आली होती. या भागीदारीअंतर्गत प्रेक्षकांच्या भेटीला येणारा ‘तुझ्या आयला’ हा पहिला चित्रपट ठरला आहे.
‘शाळा’ आणि ‘श्यामची आई’ यांसारख्या चित्रपटांसाठी ओळखले जाणारे सुजय डहाके या चित्रपटाच्या दिग्दर्शनाची धुरा सांभाळत आहेत. २५ सप्टेंबर रोजी हा चित्रपट महाराष्ट्रभर प्रदर्शित होणार आहे.
‘तुझ्या आयला’ हा शाब्दिक हिंसा आणि त्याचा मुलांच्या कोवळ्या मनावर होणारा परिणाम यावर भाष्य करणारा कमिंग-ऑफ-एज चित्रपट आहे. ट्रोलिंग आणि शाब्दिक हिंसेच्या पार्श्वभूमीवर या चित्रपटाची कथा एका जिज्ञासू १२ वर्षांच्या मुलाभोवती फिरते.
आईलाच अनेकदा शाब्दिक हिंसेचं केंद्र का बनवलं जातं, याचा शोध घेण्यासाठी हा मुलगा एका अनोख्या प्रवासाला निघतो. खेळकर आणि विचार करायला लावणाऱ्या शैलीतून चित्रपटात दैनंदिन आयुष्यात शाब्दिक हिंसा कशी सामान्य होत जाते आणि त्याचा मुलांवर नेमका काय परिणाम होतो, याचा वेध घेण्यात आला आहे.
चित्रपटाची ‘शिवी नाय खेळाचं नाव हाय ते’ ही टॅगलाइनही लक्ष वेधून घेत आहे. या टॅगलाइनमधून चित्रपटाचा मध्यवर्ती विषय स्पष्टपणे समोर येतो. मोशन पोस्टरमधूनही चित्रपटाच्या वेगळ्या विश्वाची झलक पाहायला मिळत असल्याने प्रेक्षकांची उत्सुकता वाढली आहे.
राजश्री देशपांडे, रोहिणी हट्टंगडींसह बालकलाकार
‘तुझ्या आयला’मध्ये राजश्री देशपांडे, रोहिणी हट्टंगडी, संभाजी भगत, अभिजित थिटे, सोहम बाबर आणि अभिषेक झेंडे यांच्यासह अनेक गुणी बालकलाकार महत्त्वाच्या भूमिका साकारताना दिसणार आहेत.
पॅनोरमा स्टुडिओजच्या वतीने कुमार मंगत पाठक, अभिषेक पाठक आणि मुरलीधर छतवानी, कल्ट डिजिटलच्या वतीने सुनील जैन, आदित्य जोशी आणि मोहित अरोरा, तर प्रकाश फिल्म्सच्या वतीने राजेश सिंह यांनी या चित्रपटाची निर्मिती केली आहे. सुशांत वेंगुर्लेकर आणि मेघना प्रमाणिक सहनिर्माते आहेत.
आगळावेगळा विषय, बालविश्वाचा संवेदनशील वेध आणि सुजय डहाके यांची वैशिष्ट्यपूर्ण कथनशैली यामुळे ‘तुझ्या आयला’ या भागीदारीतील महत्त्वाचा चित्रपट ठरणार आहे. आता २५ सप्टेंबरला हा चित्रपट प्रेक्षकांच्या पसंतीस किती उतरतो, हे पाहणं उत्सुकतेचं ठरणार आहे.
