ममता बॅनर्जींना पुन्हा मोठा धक्का! बंगालनानंतर मेघालयातही आता भाजपचं ऑपरेशन लोटस? 13 आमदार भाजपच्या संपर्कात असल्याच्या चर्चा

मेघालयात भाजपचं ‘ऑपरेशन लोटस’ जोरात असल्याची चर्चा आहे. UDP चे 9 आणि TMC चे 4 आमदार भाजपच्या संपर्कात असल्याची चर्चा असून, या 13 आमदारांनी पक्षप्रवेश केल्यास विधानसभेत भाजपची संख्या थेट 15 वर पोहोचू शकते.

• UDP चे 9 आणि TMC चे 4 आमदार भाजपच्या संपर्कात असल्याची चर्चा.
• 13 आमदारांनी प्रवेश केल्यास भाजपची संख्या 2 वरून थेट 15 होणार.
• माजी मुख्यमंत्री मुकुल संगमांचंही नाव संभाव्य पक्षांतराच्या चर्चेत.

 

शिलाँग : मेघालयच्या राजकारणात मोठ्या राजकीय उलथापालथीची शक्यता निर्माण झाली आहे. राज्याच्या 60 सदस्यीय विधानसभेत सध्या केवळ दोन आमदार असलेल्या भाजपची संख्या अचानक वाढण्याची चर्चा सुरू झाली आहे. युनायटेड डेमोक्रॅटिक पार्टी अर्थात UDP चे 9 आणि तृणमूल काँग्रेसचे 4 आमदार भाजपच्या संपर्कात असल्याचा दावा केला जात आहे. या 13 आमदारांनी भाजपमध्ये प्रवेश केल्यास पक्षाची विधानसभा सदस्यसंख्या थेट 15 वर पोहोचू शकते. यामुळे तृणमूलच्या सर्वेसर्वा ममता बॅनर्जींना पुन्हा एकदा मोठा धक्का लागल्याचे चित्र दिसत आहे.

UDP आणि TMC आमदार भाजपच्या संपर्कात?

मेघालयातील 13 विद्यमान आमदार भाजपमध्ये प्रवेश करण्याच्या तयारीत असल्याची माहिती राजकीय सूत्रांकडून समोर आली आहे. यामध्ये UDP च्या 9 आणि TMCच्या 4 आमदारांचा समावेश असल्याचं सांगितलं जात आहे. विशेष म्हणजे TMCच्या संभाव्य गटात माजी मुख्यमंत्री डॉ. मुकुल संगमा यांचंही नाव चर्चेत आहे.

काही आमदारांनी अलीकडेच केंद्रीय गृहमंत्री अमित शाह यांची भेट घेतल्याचं सांगितलं जात आहे. त्यामुळे पक्षांतराच्या चर्चेला आणखी बळ मिळालं आहे. मात्र, या संभाव्य पक्षांतराबाबत अद्याप अधिकृत घोषणा झालेली नाही.

NDA की इंडिया? आज लोकसभा निवडणूक झाली तर कोणाची सत्ता येणार? सर्व्हेत आकडे समोर, महाराष्ट्रात कोणाला किती जागा?

मंत्रिमंडळ फेरबदलानंतर UDPमध्ये नाराजी

UDP सध्या नॅशनल पीपल्स पार्टीच्या नेतृत्वाखालील मेघालय डेमोक्रॅटिक अलायन्स सरकारचा भाग आहे. मात्र, सप्टेंबर 2025 मध्ये झालेल्या मंत्रिमंडळ फेरबदलानंतर पक्षांतर्गत नाराजी वाढल्याचं बोललं जात आहे.

पर्यटनमंत्री पॉल लिंगदोह यांच्या जागी पक्षाध्यक्ष मेटबाह लिंगदोह यांना मंत्रिमंडळात स्थान मिळाल्यानंतर UDPमधील अंतर्गत मतभेद चर्चेत आले. आगामी 2028 च्या विधानसभा निवडणुकीच्या पार्श्वभूमीवर पक्षातील ही गटबाजी महत्त्वाची मानली जात आहे.

मात्र, UDPच्या सूत्रांनी भाजपमध्ये सामील होण्याच्या शक्यतेवर स्पष्ट भूमिका घेतलेली नाही. पक्षातील एका वरिष्ठ नेत्याने पक्षात फूट पडल्यास आणि पक्षांतरविरोधी कायद्याच्या निकषांनुसार आवश्यक संख्या उपलब्ध असल्यास आमदारांना रोखणं कठीण असल्याचं म्हटलं आहे.

भाजपकडून चर्चेचे संकेत

दरम्यान, मेघालय भाजपच्या एका वरिष्ठ नेत्यानेही आमदारांशी चर्चा सुरू असल्याचे संकेत दिले आहेत. राज्य भाजपकडून UDPच्या आमदारांना चर्चेसाठी आमंत्रित करण्यात आल्याचं सांगण्यात येत आहे. मात्र, आता संबंधित आमदार थेट केंद्रीय नेतृत्वाशी चर्चा करत असल्याचा दावा केला जात आहे.

भाजपने अद्याप कोणत्याही आमदाराच्या पक्षप्रवेशाची अधिकृत घोषणा केलेली नाही. त्यामुळे अंतिम निर्णय होईपर्यंत कोणताही ठोस अंदाज व्यक्त करणं योग्य ठरणार नाही, अशी भूमिका भाजपकडून घेतली जात आहे.

Eknath Khadse: ‘नाथाभाऊंनी पक्ष उभा केला’ शरद पवारांकडून एकनाथ खडसेंचं कौतुक; भाजपला दाखवला आरसा

सध्या भाजपकडे दोन आमदार

60 सदस्यांच्या मेघालय विधानसभेत सध्या भाजपचे अलेक्झांडर लालू हेक आणि सनबोर शुल्लाई हे दोन आमदार आहेत. सनबोर शुल्लाई हे राज्य सरकारमध्ये कॅबिनेट मंत्री आहेत.

जर चर्चेत असलेले 13 आमदार भाजपमध्ये दाखल झाले, तर पक्षाची ताकद दोनवरून 15 आमदारांपर्यंत वाढू शकते. त्यामुळे मेघालयातील सत्तासमीकरणावर त्याचा मोठा परिणाम होण्याची शक्यता आहे.

मात्र, पक्षांतराच्या चर्चांना संबंधित पक्षांकडून अद्याप अधिकृत दुजोरा मिळालेला नसल्याने आता पुढील राजकीय घडामोडींकडे सर्वांचं लक्ष लागलं आहे.