हृदयविकार आता फक्त वृद्धांपुरता मर्यादित नाही, तज्ञांनी दिला गंभीर इशारा
मेटाबॉलिक आजार यामुळे तरुणांमध्येही हृदयविकाराचे प्रमाण वाढताना दिसत आहे. पूर्वी हृदयविकार हा वृद्धापकाळाशी संबंधित मानला जात होता, मात्र आता तो 20 ते 30 वयोगटातील तरुणांमध्येही आढळत आहे.
Heart disease is no longer limited to the Elderly : आजच्या काळात निष्क्रिय जीवनशैली, वाढता ताण आणि लवकर सुरू होणारे मेटाबॉलिक आजार यामुळे तरुणांमध्येही हृदयविकाराचे प्रमाण वाढताना दिसत आहे. पूर्वी हृदयविकार हा वृद्धापकाळाशी संबंधित मानला जात होता, मात्र आता तो 20 ते 30 वयोगटातील तरुणांमध्येही आढळत आहे तेही अनेकदा कोणतीही पूर्वलक्षणे न दिसता. चांगली गोष्ट म्हणजे योग्य वेळी जीवनशैलीत बदल केल्यास हा धोका टाळता येऊ शकतो. याबाबत अधिक माहिती BDR Pharmaceuticals चे टेक्निकल डायरेक्टर डॉ. Aravind Badiger यांनी दिली.
हृदयाचे आरोग्य राखण्यासाठी संतुलित आहार अत्यंत महत्त्वाचा आहे. प्रोसेस्ड फूड, ट्रान्स फॅट, मीठ आणि साखर यांचे सेवन कमी करा. त्याऐवजी संपूर्ण धान्ये, फळे, भाज्या, प्रथिनयुक्त पदार्थ तसेच सुकामेवा आणि बिया यांचा आहारात समावेश करा. यामुळे कोलेस्टेरॉल, रक्तदाब आणि वजन नियंत्रणात राहते.
नियमित शारीरिक हालचाल ठेवा
नियमित व्यायामामुळे हृदय मजबूत होते आणि रक्ताभिसरण सुधारते. आठवड्याला किमान 150 मिनिटे मध्यम स्वरूपाचा व्यायाम करणे आवश्यक आहे. यात जलद चालणे, सायकलिंग किंवा पोहणे यांचा समावेश होऊ शकतो. त्याचा फायदा शरीर तंदुरुस्त राहायला होतो.
ताणतणावाचे योग्य व्यवस्थापन
ताण हा हृदयाच्या आरोग्यावर परिणाम करणारा महत्त्वाचा घटक आहे, जो अनेकदा दुर्लक्षित केला जातो. जास्त ताणामुळे रक्तदाब वाढू शकतो आणि जास्त खाणे किंवा धूम्रपान यांसारख्या वाईट सवयी लागू शकतात. त्या वाईट सवयींपासून दूर राहण्यासाठी ताणतणावाचं व्यवस्थापन योग्य पद्धतीने करणं गरजेचं आहे.
महत्त्वाचे आरोग्य निर्देशक तपासत रहा
विशेषतः ज्यांच्या कुटुंबात हृदयविकाराचा इतिहास आहे अशा तरुणांनी नियमित हेल्थ चेकअप करणे आवश्यक आहे. रक्तदाब, रक्तातील साखर आणि कोलेस्टेरॉल यांचे वेळोवेळी परीक्षण केल्यास गंभीर आजार टाळता येतात. त्यामुळे वेळोवेळी योग्य आरोग्याची तपासणी केली तर या धोक्यापासून वाचता येऊ शकतं.
थकवा, छातीत अस्वस्थता, श्वास घेण्यास त्रास किंवा चक्कर येणे ही लक्षणे हलक्यात घेऊ नयेत. तरुणांमध्ये ही लक्षणे अनेकदा दुर्लक्षित होतात, परंतु योग्य वेळी डॉक्टरांचा सल्ला घेतल्यास गंभीर समस्या टाळता येऊ शकतात.
वजन नियंत्रणात ठेवा
स्थूलता ही उच्च रक्तदाब, मधुमेह आणि हृदयविकारांसाठी मोठा जोखीम घटक आहे. योग्य आहार आणि व्यायामाद्वारे वजन नियंत्रणात ठेवणे आवश्यक आहे.
पुरेशी झोप घ्या आणि वाईट सवयी टाळा
झोपेची कमतरता आणि धूम्रपान किंवा मद्यपान यांसारख्या सवयी हृदयाच्या आरोग्यावर वाईट परिणाम करतात. दररोज 7-8 तासांची चांगली झोप घेणे आणि अशा सवयी टाळणे गरजेचे आहे.
.png "Videos"){kind=small}
