सध्या राजभरात परतीचा पाऊस धुमाकूळ घालत असून महाराष्ट्रातील अनेक जिल्ह्यात शेतकऱ्यांना परतीच्या पावसाचा मोठा फटका बसला आहे. शेतकऱ्यांचं हाती आलेलं पीक परतीच्या पावसामुळे पूर्णतः निस्तानाभूत झाल्यामुळे शेतकरी आता हवालदिल झाला आहे. परतीच्या पावसामुळे सोयाबीनच्या शेतीच नुकसान आणि खासगी फायनान्सचं घेतलेलं कर्ज कसे फेडायचे या विवंचनेतून परभणी जिल्ह्यातील एका शेतकऱ्यानं आत्महत्या करून त्याचं आयुष्य संपवलं.
परभणी (Parbhani) जिल्ह्यातील कौसडी येथील आत्महत्या केलेल्या शेतकऱ्याचे नाव गुलाब जीवने असून त्याचे वय अवघे २४ वर्ष होते. तरुण शेतकरी गुलाब जीवने यांच्याकडे अडीच एकर शेती आहे. या शेतात त्यांनी सोयाबीन लावले होते. मात्र, परतीच्या पावसाने हे सोयाबीन वाया गेले. त्यातच खासगी फायनान्स कंपनीकडून घेतलेले कर्ज डोक्यावर आणि नुकसान पाहता हे कर्ज फेडायचे कसे आणि आपला प्रपंच चालवायचा कसा या विवंचनेत गुलाब जीवने यांनी विषारी औषध प्राशन केले. या घटनेनंतर तत्काळ गावकऱ्यांनी त्यांना बोरी येथील ग्रामीण रुग्णालयात दाखल केले. प्रथमोपचार करुन त्यांना परभणी येथील रुग्णालयात हलवण्यात आले होते. मात्र, त्या ठिकाणी गुलाब जीवने यांचा मृत्यू झाला. आत्महत्या केलेल्या या तरुण शेतकऱ्याच्या पश्चात लहान भाऊ आणि आई आहे.
स्वाभिमानी शेतकरी संघटनेचे नेते रविकांत तुपकर यांनी सरकारवर जोरदार टीका केली आहे. ह्रदय पिळवटून टाकणारी ही घटना आहे. सत्तेची धुंदी आणि एकमेकांचा पक्ष संपवण्याच्या नादात व्यस्त असलेल्या राजकारणी आणि सरकारला अन्नदात्या शेतकऱ्यांकडे पाहायला वेळ नाही. त्यांच्या डोळ्यात झणझणीत अंजन घालायलाच हवे असा इशारा तुपकरांनी दिली आहे. आमच्या शेतकरी दादाची ही आहुती वाया जाऊ देणार नाही. माझी भावपूर्ण श्रद्धांजली! असं तुपकर यांनी म्हटलं आहे.
