fadnavis with dhananjay munde
Beed News : बीडच्या केज तालुक्यातील विलास घुले हत्या प्रकरणावरुन राजकीय वातावरण पुन्हा तापलं आहे. खासदार बजरंग सोनवणे यांनी गुरुवारी पत्रकार परिषद घेत वाल्मिक कराडवर गंभीर आरोप केले. आपल्या मुलाला या प्रकरणात अडकवण्यासाठी कट रचण्यात आल्याचा दावा सोनवणेंनी केला.
अश्यातच आता धनंजय मुंडे यांनी मुख्यमंत्री देवेंद्र फडणवीस यांची सह्याद्री अतिथीगृहात भेट घेतली. या भेटीमुळे राजकीय चर्चांना उधाण आलं. मात्र, उपलब्ध वृत्तांनुसार मुंडे यांनी या भेटीत दुष्काळी परिस्थिती आणि शेतकऱ्यांच्या मदतीचा मुद्दा मांडला.
महाराष्ट्रातील दुष्काळाच्या पार्श्वभूमीवर पीक नुकसानीचे पंचनामे आणि त्यानंतरची मदत मिळण्यासाठी वेळ लागू शकतो. तोपर्यंत केंद्राच्या पीएम किसान आणि राज्याच्या नमो शेतकरी सन्मान निधी योजनांचे किमान दोन हप्ते एकत्रितपणे पात्र शेतकऱ्यांना देण्यात यावेत, अशी मागणी धनंजय मुंडेंनी मुख्यमंत्र्यांकडे केली आहे.
पिण्याचं पाणी, जनावरांसाठी चारा, जलसंधारणाची कामं आणि शेतकरी-शेतमजुरांना मदत याबाबतही त्यांनी मुख्यमंत्र्यांशी चर्चा केल्याचं सांगण्यात आलं आहे. महाराष्ट्र सरकारने यापूर्वी 265 तालुक्यांमध्ये दुष्काळ जाहीर करत विविध तातडीच्या उपाययोजनांची घोषणा केली आहे.
दरम्यान, दुष्काळी परिस्थितीचा आढावा घेण्यासाठी महसूल मंत्री चंद्रशेखर बावनकुळे 2 ऑक्टोबर रोजी मराठवाड्याच्या दौऱ्यावर जाणार आहेत. छत्रपती संभाजीनगर आणि जालना जिल्ह्यातील दुष्काळग्रस्त भागाची पाहणी करून ते शेतकऱ्यांशी संवाद साधणार आहेत.
दुष्काळामुळे शेतीपिकांचं नुकसान, पिण्याच्या पाण्याचा प्रश्न, जनावरांचा चारा आणि शेतकऱ्यांच्या आर्थिक अडचणी यांचा प्रत्यक्ष आढावा घेण्यावर या दौऱ्यात भर राहणार आहे.
विलास घुले हत्या प्रकरणातील आरोप, बजरंग सोनवणेंनी ऐकवलेली ऑडिओ क्लिप आणि धनंजय मुंडेंची मुख्यमंत्री फडणवीसांसोबतची भेट यामुळे बीडच्या राजकारणात पुन्हा एकदा चर्चेला उधाण आलं आहे. आता सोनवणेंनी केलेल्या आरोपांची आणि त्यांनी सादर केलेल्या ऑडिओ क्लिपची अधिकृत तपासणी काय निष्कर्ष देते, याकडे लक्ष लागलं आहे.
.png "Videos"){kind=small}
