Washim farmers financial crisis
यंदाच्या पावसाळ्यात सुरुवातीला पावसाने ओढ दिली, तर त्यानंतर पडलेल्या पावसातही सातत्य राहिले नाही.त्यामुळे खरिपातील पिकांवर त्याचा मोठा परिणाम झाला आहे. जिल्ह्यात सरासरी ७५० ते ८१० मिमी पाऊस पडतो. यंदा मात्र आतापर्यंत सुमारे ४५० मिमी पावसाची नोंद झाल्याने अनेक भागांत पिकांची वाढ खुंटली आहे. सोयाचीनचे दाणे बारीक राहिल्याने उत्पादनात मोठी घट होण्याची शक्यता शेतकरी व्यक्त करीत आहेत. त्यातच गेल्या काहीदिवसांपासून तापमानात सातत्याने वाढ होत असल्याने सोयाबीनचे पीक झपाट्याने वाळत आहे.
कडक उन्हामुळे शेंगा फुटून दाणे शेतातच गळण्याची भीती निर्माण झाली. त्यामुळे शेतकऱ्यांनी काढणीला वेग दिला. मजुरांची टंचाई आणि वाढलेली मजुरी यामुळे अनेक ठिकाणी यंत्राच्या साहाय्याने सोयाबीनची काढणी केली जात आहे, तर काही शेतकरी कुटुंबीयांच्या मदतीने काढणीची कामे उरकताना दिसत आहेत. दरम्यान, पावसाच्या अनियमिततेमुळे भूजलपातळीवरही परिणाम झाला. खरिपातील नुकसान भरून काढण्यासाठी आता रब्बी हंगाम तरी चांगला जावा, अशी शेतकऱ्यांची अपेक्षा आहे. त्यासाठी परतीचा पाऊस होणे अत्यंत गरजेचे आहे. सोयाबीन, मका आणि ज्वारीची काढणी झाल्यानंतर परतीचा पाऊस वेळेवर आणि समाधानकारक झाल्यास हरभरा, गहू आदी रब्बी पिकांची पेरणी करता येणार आहे. खरिपातील कमी पाऊस, घटलेले उत्पादन आणि वाढत्या उन्हामुळे बळीराजा चिंतेत आहे. आता परतीचा पाऊस बरसून कोरड्या पडलेल्या शेतांना संजीवनी मिळणार का, याकडे संपूर्ण बुलढाणा जिल्ह्यातील शेतकन्यांचे लक्ष लागले आहे.






