बुधवार, 4 नोव्हेंबर 2026
Chandrapur News: चिमूर बसस्थानकात खड्ड्यांचे साम्राज्य! एसटी चालकांची कसरत, प्रवाशांच्या सुरक्षिततेचा प्रश्न निर्माण
एकीकडे महामंडळाकडून लालपरी आणि राजमाता जिजाऊ यांसारख्या नव्या बसेस प्रवाशांच्या सेवेत दाखल केल्या जात आहेत, तर दुसरीकडे या बसेसना चिमूर बसस्थानकातील खड्ड्यांतून मार्ग काढावा लागत आहे. त्यामुळे नव्या बसेस आणि मोडकळीस आलेली बसस्थानक व्यवस्था, असे विरोधाभासी चित्र दिसून येत आहे. (फोटो सौजन्य – AI Created)
बसस्थानकात प्रवेश करताना तसेच बाहेर पडताना चालकांना खड्यांचा अंदाज घेत बसेस चालवाव्या लागत आहेत. खड्ड्यांमुळे बसेसना मोठे धक्के बसत असून, वाहनांचे नुकसान होण्याची शक्यताही वाढली आहे. त्याचा थेट त्रास बसमधील प्रवाशांना सहन करावा लागत आहे.
विशेषतः वृद्ध नागरिक, आजारी रुग्ण, शाळकरी विद्यार्थी आणि लहान मुलांसाठी बसस्थानकातील हा प्रवास त्रासदायक ठरत आहे. बसमध्ये चढताना उतरतानाही प्रवाशांना अडचणींचा सामना करावा लागत आहे. पावसाचे पाणी खड्ड्यांत साचल्यास त्यांची खोली लक्षात येत नसल्याने अपघाताचा धोकाही निर्माण होतो. प्रवाशांची गैरसोय आणि बसेसच्या सुरक्षिततेचा प्रश्न लक्षात घेता संबंधित एसटी बसस्थानक परिसरातील खड्डे बुजवून रस्त्याची दुरुस्ती करावी, अशी मागणी होत आहे. अन्यथा एखादी दुर्घटना प्रशासनाने तातडीने घडल्यानंतरच प्रशासनाला जाग येणार का, असा संतप्त सवालही प्रवासी उपस्थित करीत आहेत.
चिमूर हे तालुक्याचे महत्त्वाचे केंद्र असल्याने ग्रामीण भागातील नागरिक दररोज शिक्षण, उपचार, नोकरी आणि अन्य कामांसाठी बसस्थानकात येतात. मात्र, प्रवाशांची मोठी वर्दळ असूनही मूलभूत सुविधांकडे दुर्लक्ष होत आहे. नव्या बसेस आणि आधुनिक प्रवासाच्या घोषणा केल्या जात असताना बसस्थानकातील खड्डे बुजविण्यासाठी प्रशासनाला मुहूर्त कधी मिळणार, असा संतप्त सवाल प्रवाशांकडून उपस्थित होत आहे.
चिमूर बसस्थानकाच्या डांबरीकरणासाठी विभागीय कार्यालयाकडे प्रस्ताव पाठविण्यात आला आहे. यासंदर्भात वरिष्ठ अधिकाऱ्यांनाही माहिती देण्यात आली असून, पुढील कार्यवाहीसाठी पाठपुरावा सुरू आहे. – इमरान शेख, प्रभारी आगार व्यवस्थापक, चिमूर
