रविवार, 25 ऑक्टोबर 2026
Chandrapur News: आश्वासनांनंतरही नेरीत विशेष ग्रामसभा रखडली; युवा ग्रामविकास संघटनेचा बेमुदत आंदोलनाचा इशारा
नेरी गावातील विविध प्रश्नांवर चर्चा व्हावी, ग्रामपंचायतीच्या कामकाजाबाबत ग्रामस्थांना स्पष्ट माहिती मिळावी आणि प्रलंबित मुद्द्यांवर उत्तरे मिळावित, यासाठी तरुणांनी विशेष ग्रामसभा घेण्याची मागणी केली आहे. मात्र, वारंवार पाठपुरावा करूनही ग्रामसभा आयोजित करण्यात विलंब होत असल्याने ग्रामपंचायतीच्या कार्यपद्धतीवर प्रश्न उपस्थित केले जात आहेत. (फोटो सौजन्य – AI Created)
३१ ऑगस्ट रोजी झालेल्या ग्रामसभेत तरुणांनी विविध प्रश्न उपस्थित केले होते. सरपंचांकडून मात्र, या प्रश्नांवर समाधानकारक उत्तरे मिळाली नसल्याचा आरोप तरुणांनी केला. त्यानंतर ४ सप्टेंबर रोजी पुन्हा ग्रामसभा घेण्याचे आश्वासन देण्यात आले होते. मात्र, निर्धारित दिवशी सभा न झाल्याने तरुणांमध्ये नाराजी वाढली. यानंतर ग्रामपंचायतीला घेराव घालून विशेष ग्रामसभा तातडीने घेण्याची मागणी केली. यावेळी गटविकास अधिकाऱ्यांनी ग्रामसभा आयोजित करण्याबाबत आश्वासन दिल्याचे संघटनेचे म्हणणे आहे.
ग्रामपंचायतीवर नवीन प्रशासक नियुक्त झाल्यानंतरही निवेदनाद्वारे मागणी करण्यात आली. विशेष ग्रामसभा घेण्याबाबत गटविकास अधिकाऱ्यांनी ग्रामपंचायत अधिकाऱ्यांना दोन पत्रे दिल्याची माहितीही तरुणांनी दिली आहे. असे असतानाही सभेची तारीख जाहीर न झाल्याने विलंबाचे कारण काय, असा सवाल उपस्थित केला जात आहे.
विशेष ग्रामसभा हे ग्रामस्थांना स्थानिक प्रश्न मांडण्यासाठी आणि ग्रामपंचायतीच्या कामकाजावर चर्चा करण्यासाठी महत्त्वाचे व्यासपीठ आहे. त्यामुळे प्रशासनाने आणखी आश्वासने न देता तातडीने ग्रामसभेची तारीख जाहीर करावी, ग्रामस्थांच्या प्रश्नांना उत्तरे द्यावीत आणि प्रकरणातील वस्तुस्थिती स्पष्ट करावी, अशी मागणी संघटनेने केली आहे. प्रशासनाने मागणीची दखल घेऊन लवकरात लवकर कार्यवाही न केल्यास बेमुदत आंदोलन छेडण्यात येईल, असा इशारा युवा ग्रामविकास संघटनेने दिला आहे. त्यामुळे नेरीतील विशेष ग्रामसभेचा प्रश्न आता कोणत्या दिशेने जाणार आणि प्रशासन यावर काय भूमिका घेणार, याकडे ग्रामस्थांचे लक्ष लागले आहे.
कल्याण-डोंबिवलीत भाजप-मनसेमध्ये पुन्हा वादाची ठिणगी; शशिकांत कांबळे यांचे केडीएमसी आयुक्तांना पत्र
ग्रामपंचायतीच्या कामकाजासंदर्भात माहितीच्या अधिकारांतर्गत मागविलेल्या माहितीच्या उपलब्धतेस विलंब होत असल्याचा आरोपही युवा ग्रामविकास संघटनेने केला आहे. ग्रामपंचायतीच्या कामकाजातील विविध बाबी स्पष्ट व्हाव्यात आणि ग्रामस्थांना वस्तुस्थिती समजावी, अशी तरुणांची भूमिका आहे. दरम्यान, या आरोपांबाबत संबंधित प्रशासनाची अधिकृत भूमिका अद्याप स्पष्ट झालेली नाही.
