अतिवृष्टीग्रस्त शेतकरी मदतीच्या प्रतीक्षेत; केंद्रीय पथकाच्या दौऱ्याचा निष्कर्ष काय? एक महिना उलटूनही अहवाल नाही!

अतिवृष्टीने बाधित मराठवाड्यातील शेतकऱ्यांना मदत जाहीर नाही. केंद्रीय पाहणी पथक येऊन एक महिना झाला तरी केंद्राकडे अहवाल सादर झाला नाही. मदतीसाठी शेतकरी प्रतीक्षेत."

• फक्त शांत करण्यासाठी दौरा?
• मराठवाड्यातील शेतकरी मदतीविना मेटाकुटीला
• मदतीसाठी शेतकरी प्रतीक्षेत

छत्रपती संभाजीनगर: यंदा झालेल्या अतिवृष्टीमुळे होत्याचे नव्हते झालेल्या शेतकऱ्याला धीर देण्यासाठी आणि नुकसानीची पाहणी करण्यासाठी केंद्रीय पथक नोव्हेंबरच्या पहिल्या आठवड्यात मराठवाड्यात येऊन गेले. या पथकाला येऊन एक महिना उलटला तरी केंद्राला काय अहवाल दिला आणि त्या दौऱ्याचे फलित काय, हा विषय अजूनही अनुत्तरित आहे. त्यामुळे शेतकऱ्यांना आलेला दौरा हा केवळ त्यांना शांत करण्यासाठी होता काय, असा सवाल आता उपस्थित केला जात आहे.

मराठवाड्यावर पावसाचा मोठा कहर

यंदा पावसाने राज्याच्या तुलनेत मराठवाड्यामध्ये अधिक कहर माजवला. शेतांना तळ्याचे स्वरूप आले, शेतीपिके पाण्याखाली गेली आणि जमीन खरडून निघाली. हातातोंडाशी आलेला घास या अस्मानी संकटाने हिरावून घेतला. संभाजीनगरमधील पैठण, धाराशिव (उस्मानाबाद) आणि लातूर सारख्या भागांत केंद्रीय पथकाने बांधावर जात पाहणी केली होती. शेतकऱ्यांनी आपली झालेली दयनीय अवस्था पथकातील अधिकाऱ्यांना दाखवली होती.

हे देखील वाचा: CM Devendra Fadnavis: फडणवीस सरकारची ऐतिहासिक कामगिरी, एका महिन्यात ४५,९११ सौर पंप लावून ‘गिनीज वर्ल्ड रेकॉर्ड’ मध्ये नोंद

केंद्रीय पथकात कोण होते?

सदरील पथकाचे नेतृत्व केंद्रीय गृह मंत्रालयाचे सहसचिव आर. के. पांडेय यांनी केले होते. अतिवृष्टीग्रस्तांना एनडीआरएफच्या (NDRF) निकषानुसार मदत दिली जाते. केंद्रीय पथकाच्या पाहणीनंतर केंद्र सरकार मदतीची ही रक्कम राज्य सरकारला देईल.

अहवालाची प्रतीक्षा

जिल्हा प्रशासनाने युद्धपातळीवर पंचनामे करून अहवाल राज्य सरकारला सादर केला. राज्य सरकारनेही सर्व निकष बाजूला ठेवत मदत जाहीर केली. त्यानंतर केंद्राने मराठवाड्यातील नुकसानीची पाहणी करण्यासाठी हे पथक पाठवले.

• पथकातील सदस्यांनी भेटी दिल्यावर लवकरच अहवाल सादर करणार असल्याचे सांगत काढता पाय घेतला.
• हा दौरा केवळ औपचारिकता पूर्ण करण्यासाठी होता, असा आरोप विरोधकांकडून केला जात होता.
• दरम्यान, राज्यात सर्वाधिक नुकसान मराठवाड्यात झाले असल्याने, केंद्रीय पाहणी पथकाचा अहवाल केंद्राकडे सादर झाला की नाही, याबद्दल एक महिना उलटूनही स्पष्टता नाही, यावर प्रश्नचिन्ह उपस्थित होत आहे.

हे देखील वाचा: Chhatrapati Sambhajinagar: ‘स्मार्ट सिटी’ प्रकल्पातून ५ महत्त्वाच्या रस्त्यांचा विकास; १५ कोटी रुपयांचा निधी मंजूर