सोलापूर : सोलापूर येथील कृषी उत्पन्न बाजार समितीत १०-१५ दिवसांपूर्वी कांद्याला प्रतिक्विंटल साडेतीन हजार रुपयांचा सरासरी दर होता. सात हजारांवर दर गेला होता. परंतु आता सरासरी दर तब्बल दोन हजार रुपयांनी घसरला आहे. बुधवारी कांद्याला १८०० रुपयांचा सरासरी दर मिळाला.
सोलापूर बाजार समितीत बुधवारी ४३० गाड्या कांद्याची आवक होती. ४३ हजार ७७ क्विंटल कांद्यापैकी अवघा पाच क्विंटल कांदा चार हजार ६०० रुपये प्रतिक्विंटल दराने विकला गेला. उर्वरित ४३ हजार ६८ क्विंटल कांद्याला सरासरी दर अठराशे रुपयांपर्यंतच मिळाल्याचे दिसून आले. बुधवारी बाजार समितीत कांद्याच्या विक्रीतून पावणेआठ कोटींची उलाढाल झाली. एवढीच आवक असताना मागील दहा दिवसांपूर्वी ११ कोटींपर्यत उलाढाल होती. दरात मोठी घसरण झाल्याने शेतकऱ्यांची चिंता वाढली आहे.
पावसाळ्यात जागेवरच खराब झालेला कांदा काढून शेतकऱ्यांनी नवीन कांद्याची लागवड केली. त्यातून चार पैसे हाती पडतील, नुकसान भरून निघेल हा त्यामागील हेतू आहे. मात्र, कांद्याचे दर अचानकपणे कमी झाल्याने शेतकरी पुन्हा अडचणीत सापडला. यंदा गतवर्षीपेक्षा कांद्याची आवक निम्म्याने कमीच आहे, तरीदेखील समाधानकारक भाव मिळत नसल्याची खंत शेतकऱ्यांना आहे.
आवक वाढल्याने दरात झाली घसरण
सोलापूर बाजार समितीत समाधानकारक दर मिळत नसल्याने जिल्ह्यातील अनेक शेतकरी कांदा विक्रीसाठी बेंगलोर बाजाराकडे वळले आहेत. त्याठिकाणी जायला गाडी भाडे जास्त आहे, पण भाव देखील सरासरी तीन हजारांपर्यंत मिळत असल्याचे शेतकरी सांगतात. गुजरात, आंध्र प्रदेशातील कर्नुल, लासलगाव, पुणे आणि नगर येथे कांदा आवक मोठ्या प्रमाणावर वाढल्याने सोलापुरातील भावात घसरण झाल्याचे सांगितले जात आहे. काही दिवसांत भाव वाढेल, असा विश्वास व्यापारी व्यक्त करीत आहेत.
हे सुद्धा वाचा : सातव्या मजल्यावरून पडून बांधकाम मजुराचा मृत्यू; पुण्यातील धक्कादायक घटना
दरम्यान, किरकोळ बाजारात भाव गगनाला भिडलेले आहेत. बटाटा, कांदा, टोमॅटो या दैनंदिन वापरल्या जाणाऱ्या भाज्यांचे दर अजूनही 40 ते 60 रुपयांच्या घरात आहेत. त्याचबरोबर घाऊक बाजारात या भाज्यांचे दर सातत्याने घसरत असल्याने सर्वसामान्यांना त्याचा लाभ मिळत नाही. तसेच शेतकऱ्यांना त्यांच्या मालाच्या किमतीचा वाटा ग्राहकांकडून आकारला जात नाही. बाजारात भाजीपाल्याची आवकही तेजीत आहे. परंतु, शेतकऱ्यांकडून स्वस्त दरात शेतमाल खरेदी करूनही भाजीपाला सर्वसामान्यांपर्यंत कमी दरात पोहोचत नाही.
.png "Videos"){kind=small}
