Graduate Election : मुख्यमंत्री फडणवीस-शरद लाड भेटीने पुणे पदवीधरची चर्चा तापली!
पुणे पदवीधर मतदारसंघातून शरद लाड यांच्या नावाची भाजपमध्ये गेल्या काही दिवसांपासून जोरदार चर्चा आहे. लाड यांनी यापूर्वीही आपण या मतदारसंघातून निवडणूक लढविण्यास इच्छुक असल्याचे जाहीर केले आहे. सप्टेंबरमध्ये त्यांनी सांगली, मिरज परिसरातील लोकप्रतिनिधींच्या भेटीगाठी घेत मतदार नोंदणी व निवडणूक नियोजनाबाबत चर्चा केली होती.
दरम्यान, पुणे पदवीधर मतदारसंघावर महायुतीतील राष्ट्रवादी काँग्रेस (अजित पवार गट)कडूनही दावा करण्यात येत असून प्रताप ऊर्फ भैय्या माने यांच्या नावाची चर्चा आहे. त्यामुळे या जागेच्या उमेदवारीकडे महायुतीतील सर्व घटकांचे लक्ष लागले आहे.
विशेष म्हणजे, भाजप प्रदेशाध्यक्ष रवींद्र चव्हाण यांनी पुणे पदवीधर व शिक्षक मतदारसंघातील जागावाटपाचा अंतिम निर्णय मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार घेतील, अशी भूमिका स्पष्ट केली आहे. त्यामुळे फडणवीस-लाड भेटीला राजकीयदृष्ट्या महत्त्व प्राप्त झाले आहे.
शरद लाड यांनी यापूर्वी मुख्यमंत्री फडणवीस यांनी आपल्याला पुणे पदवीधर मतदारसंघासाठी उमेदवारीबाबत शब्द दिल्याचा दावा केला होता. मात्र, भाजपकडून अधिकृत उमेदवारीची घोषणा अद्याप झालेली नाही, त्यामुळे शुक्रवारी झालेल्या भेटीत नेमकी काय चर्चा झाली, याबाबत अधिकृत माहिती समोर आलेली नाही.
पुणे विभाग पदवीधर मतदारसंघासाठी उमेदवारी अर्ज दाखल करण्याची अंतिम तारीख ६ ऑक्टोबर असून ७ ऑक्टोबरला छाननी, ९ ऑक्टोबरला माघारीची अंतिम मुदत आहे. मतदान २३ ऑक्टोबरला होणार आहे.
.png "Videos"){kind=small}
