सोमवार, 9 नोव्हेंबर 2026
Jaykumar Gore Diwali Celebration ( जयकुमार गोरे दिवाळी उत्सव )
याप्रसंगी आमदार बाबासाहेब देशमुख, माजी आमदार दीपक साळुंखे, चेतनसिंह केदार सावंत, उल्हास धायगुडे, बाळासाहेब एरंडे, माऊली हळणवर यांच्यासह स्थानिक लोकप्रतिनिधी, पदाधिकारी, मान्यवर, प्रशासकीय अधिकारी आणि शेतकरी बांधव मोठ्या संख्येने उपस्थित होते.
राज्यात एकीकडे दिवाळीचा उत्साह आणि आनंदाचे वातावरण असताना, दुसरीकडे दुष्काळी परिस्थितीमुळे शेतकरी, शेतमजूर आणि ऊसतोड कामगारांसमोर अनेक संकटे उभी आहेत. अशा परिस्थितीत कष्टकरी कुटुंबांनाही सणाचा आनंद घेता यावा आणि समाज त्यांच्या पाठीशी आहे, ही भावना निर्माण व्हावी, या उद्देशाने मुख्यमंत्री देवेंद्र फडणवीस यांनी मंत्र्यांनी दिवाळीतील एक दिवस गावात जाऊन शेतकऱ्यांसोबत साजरा करण्याचे आवाहन केले होते. या आवाहनाला प्रतिसाद देत पालकमंत्री जयकुमार गोरे यांनी सोनके येथे ऊसतोड कामगारांसोबत दिवाळीचा आनंद वाटून घेतला.
यावेळी पालकमंत्री गोरेंनी ऊसतोड कामगार आणि त्यांच्या कुटुंबीयांशी मनमोकळा संवाद साधला. त्यांच्या अडचणी, अपेक्षा आणि रोजच्या जगण्यातील संघर्ष जाणून घेतला. ऊसतोड कामगार माता-भगिनींना भाऊबीज देऊन आपुलकीची भावना व्यक्त केली, तर त्यांच्या चिमुकल्यांना नवीन कपडे देण्यात आले. सणासुदीच्या काळात मिळालेल्या या भेटींमुळे कामगार कुटुंबांमध्ये आनंदाचे वातावरण निर्माण झाले.
दिवाळी म्हणजे केवळ दिव्यांची रोषणाई, फराळ आणि उत्सव नव्हे, तर समाजातील शेवटच्या घटकापर्यंत आनंद पोहोचविण्याचा सण आहे. दुष्काळाच्या कठीण परिस्थितीत शेतकरी, शेतमजूर आणि कष्टकरी बांधवांना आधार देण्यासाठी शासनाच्या माध्यमातून विविध स्तरांवर प्रयत्न सुरू आहेत. सामाजिक संस्था, संघटना, लोकप्रतिनिधी आणि नागरिकांनीही या कार्यात पुढाकार घेऊन गरजूंच्या मदतीसाठी योगदान द्यावे, असे आवाहन यावेळी करण्यात आले.
