मुंबई – लोकसभा निवडणूक जवळ आलेली असताना कल्याण मतदारसंघातील उमेदवारीवरुन महायुतीमध्ये सस्पेंन्स होता. बऱ्याच प्रतिक्षेनंतर श्रीकांत शिंदे यांची कल्याण मतदारसंघाची उमेदवारी देवेंद्र फडणवीस यांनी जाहीर केली. आपल्या मुलाची उमेदवारी एकनाथ शिंदे जाहीर करतील अशी अपेक्षा असताना देवेंद्र फडणवीस यांनी जाहीर केली. यानंतर राजकीय चर्चांना उधाण आले आहे. यावर काँग्रेस प्रवक्ते सचिन सावंत यांनी शिवसेना शिंदे गटावर टिकास्त्र सोडलंय. कमळाबाईंच्या रिमोट कंट्रोलने शिंदेंची शिवसेना चालते, अशी टीका सावंत यांनी केली आहे.
सोशल मीडियावर ट्वीट करत सचिन सावंत यांनी भाजप व शिंदेसेनावर टिकास्त्र डागलं आहे. सचिन सावंत यांनी आपल्या ट्वीटर अकाउंटवर एक पोस्ट शेअर करत लिहिलं आहे की, “महायुतीची महाशक्ती भाजपा आहे, यात कधीच शंका नव्हती. त्यामुळेच आता शिवसेनेचे उमेदवार कोण असावेत, विद्यमान खासदारांची उमेदवारी कापली जाणे हे निर्णयही भाजपा घेताना दिसत आहे. आता मुख्यमंत्र्यांच्या सुपुत्राची उमेदवारीही फडणवीसजींनी घोषित केलीये. शिवसेनाप्रमुख बाळासाहेब ठाकरे यांच्या रिमोट कंट्रोलने एकेकाळी चालणाऱ्या कमळाबाईच्या रिमोट कंट्रोलने आता एकनाथ शिंदे यांची शिवसेना चालते आहे हे स्पष्ट आहे,” अशा शब्दांत सचिन सावंत यांनी शिंदेसेना व भाजपवर निशाणा साधला आहे.
काय म्हणाले देवेंद्र फडणवीस?
“भाजपकडून श्रीकांत शिंदे यांना विरोध नाही. श्रीकांत शिंदे कल्याणमधले शिवसेनेचे उमेदवार महायुतीचे उमेदवार असणार आहेत. भाजप पूर्ण ताकदीने श्रीकांत शिंदे यांच्या पाठीशी उभे राहणार आहे. मागच्या वेळी जितकी मतं मिळाली त्यापेक्षा जास्त मतांनी श्रीकांत शिंदे यांना महायुती निवडून आणेल.”, असं देवेंद्र फडणवीसांनी ठामपणे सांगितलं.
.png "Videos"){kind=small}
