लोणावळ्यात मुसळधार पाऊस
मुंबईत आणि उपनगरात रात्रभर मुसळधार पावसाची बॅटिंग सुरु आहे. त्यामुळे अनेक ठिकाणी जनजीवन विस्कळीत झाले आहे. मुंबईतील हिंदमाता, सायन, दादर यांसारख्या सखल भागांत रस्त्यांवर पाणी साचले आहे. त्यामुळे नागरिकांना साचलेल्या पाण्यातून वाट काढावी लागत आहे. त्यासोबतच मुंबई लोकल उशिराने सुरु आहे. मुंबईतील पश्चिम, मध्य आणि हार्बर रेल्वेची वाहतूक १० ते १५ मिनिटे उशिराने सुरु आहे. ईस्टर्न हायवे, वेस्टर्न हायवेसह सर्व वाहतूक संथ गतीने सुरू आहेत. मुसळधार पाऊसामुळे, जलमय रस्त्यांमुळे आणि लोकल उशिरा धावत असल्याने कर्मचाऱ्यांना कामावर पोहोचण्यास उशीर होण्याची शक्यता आहे.
बोरिवली–ठाणे दुहेरी भुयारी रस्ता प्रकल्पाला वेग; प्रकल्पासाठी बाधित कुटुंबियांना MMRDA चे तीन पर्याय
पावसाचा जोर दक्षिण मुंबईत अधिक पाहायला मिळत आहे. नरिमन पॉइंटवर ४० ते ५० किलोमीटर प्रतितास वेगाने वारे वाहत आहेत. पावसाची संततधार आणि वाऱ्यामुळे दृश्यमानता मोठ्या प्रमाणात खालावली आहे. तसेच रस्त्यांवर पाणी साचल्याने अनेक वाहने पाण्यातून मार्ग काढतांना बंद पडत आहे. ज्यामुळे वाहनचालकांना मोठ्या अडचणींचा सामना करावा लागत आहे.
मुंबईत किती पाऊस?
मुंबईत गेल्या २४ तासांत अनेक भागांत जोरदार पावसाची नोंद झाली आहे. फोर्ट परिसर हा सर्वाधिक पावसाचा अनुभवलेला भाग असून तिथं ७४ मिमी पावसाची नोंद झाली आहे. त्यापाठोपाठ बांद्रा ६२ मिमी, मलबार हिल ६० मिमी, लोअर परळ ५८ मिमी आणि हाजी अली ५७ मिमी पावसासह पुढे आहेत.
यासोबतच इतर प्रमुख भागांत –
ग्रँट रोड व सांताक्रुझ – प्रत्येकी ४७ मिमी
दादर – ४१ मिमी
चर्चगेट – ३८ मिमी
अंधेरी – ३३ मिमी
मुंबई सेंट्रल – ३० मिमी
मुंबई उपनगरांमध्येही मध्यम ते जोरदार स्वरूपाचा पाऊस झाला असून:
बोरिवली – २८ मिमी
वरळी – २६ मिमी
वांद्रे कुर्ला संकुल – २५ मिमी
वर्सोवा – २३ मिमी
दिंडोशी – २२ मिमी
कल्याण-डोंबिवलीतही पावसाचा जोर
कल्याण आणि डोंबिवली परिसरात सकाळपासून वातावरण ढगाळ आहे आणि रिमझिम पावसाने सुरुवात झाली आहे. सकाळी कामावर निघालेल्या नागरिकांना काहीशी अडचण झाली आहे. दुपारनंतर पावसाचा जोर अधिक वाढण्याची शक्यता हवामान खात्याने व्यक्त केली आहे.
हवामान विभागाचा अलर्ट काय सांगतो?
सध्या महाराष्ट्रातील बहुतांश जिल्ह्यांत पावसाचे आगमन झाले असून त्यामुळे कमाल तापमानात घट झाली आहे. हवामान विभागाने दिलेले अलर्ट काय सांगतात?
रायगड जिल्ह्यासाठी ‘रेड अलर्ट’ – मुसळधार ते अतिमुसळधार पावसाची शक्यता.
रत्नागिरी आणि सिंधुदुर्ग – ‘ऑरेंज अलर्ट’
मुंबई आणि ठाणे – ‘यलो अलर्ट’, काही भागांत जोरदार पावसाचा इशारा.
पुणे, कोल्हापूरच्या घाट परिसर व सातारा – आज ‘ऑरेंज अलर्ट’
विदर्भात मान्सूनचा प्रवेश
नागपूरसह विदर्भ परिसरात अनेक दिवसांपासून प्रतीक्षा असलेला मान्सून आज दाखल होण्याची शक्यता आहे. सोमवार ते गुरुवार या कालावधीत विजांसह पावसाचा अंदाज हवामान विभागाने दिला आहे.
