RTI : पश्चिम मुंबईत दोन वर्षांत एकाही शाळेची तपासणी नाही? शिक्षण विभागाच्या कारभारावर प्रश्नचिन्ह

RTI : पश्चिम मुंबईतील वांद्रे ते दहिसर परिसरातील सुमारे 185 माध्यमिक शाळांची 2024-25 आणि 2025-26 या दोन शैक्षणिक वर्षांत तपासणी झाली नसल्याचा आरोप करण्यात आला आहे. माहिती अधिकारातून (RTI) मिळालेल्या माहितीनंतर हा मुद्दा समोर आला आहे.

•  पश्चिम मुंबईतील सुमारे 185 शाळांच्या तपासणीबाबत गंभीर आरोप
• विद्यार्थ्यांची सुरक्षा, शाळांतील सुविधा आणि अनुदानाच्या वापराच्या पडताळणीचा प्रश्न
• संबंधित अधिकाऱ्यांवर कारवाई आणि सात दिवसांत विशेष तपासणीची मागणी

पश्चिम मुंबईतील वांद्रे ते दहिसर परिसरातील सुमारे 185 माध्यमिक शाळांची 2024-25 आणि 2025-26 या दोन शैक्षणिक वर्षांत तपासणी झाली नसल्याचा आरोप करण्यात आला आहे. माहिती अधिकारातून (RTI) मिळालेल्या माहितीनंतर हा मुद्दा समोर आला असून, शिक्षण विभागाच्या कार्यपद्धतीवर प्रश्न उपस्थित केले जात आहेत.

ग्लोबल पेरेंट्स टीचर्स असोसिएशनचे अध्यक्ष रोहित दंडवते यांनी यासंदर्भात मुख्यमंत्री देवेंद्र फडणवीस यांच्यासह संबंधित यंत्रणांकडे तक्रार दाखल केली आहे. पश्चिम मुंबईतील माध्यमिक शाळांच्या तपासणीबाबत आवश्यक माहिती उपलब्ध नसल्याचा मुद्दाही या प्रकरणात उपस्थित करण्यात आला आहे.

शाळांच्या तपासणीची जबाबदारी कोणाची?

शाळा संहितेतील नियम आणि शासन निर्णयांनुसार शिक्षण विभागाच्या अधिकाऱ्यांनी शाळांची नियमित तपासणी करणे अपेक्षित आहे. शिक्षण निरीक्षकांनी वर्षाला 10 ते 15, तर उपनिरीक्षकांनी 25 ते 30 शाळांची तपासणी करावी, असे तक्रारदारांचे म्हणणे आहे. मात्र, संबंधित कालावधीत शाळांची तपासणी झाली नसल्याचा आरोप करण्यात आला आहे.

Accident News: ‘हेल्प… हेल्प…’च्या आर्त हाका! इम्पेरियल हाइट्सच्या आगीत दोन महिलांचा मृत्यू

विद्यार्थ्यांच्या सुरक्षेचा प्रश्न

शाळांच्या तपासणीदरम्यान सीसीटीव्ही यंत्रणा, स्वच्छतागृहे, शिक्षक व शिक्षकेतर कर्मचाऱ्यांची संख्या, विद्यार्थी पटसंख्या, भौतिक सुविधा आणि शाळांना मिळणाऱ्या अनुदानाच्या वापराची पडताळणी महत्त्वाची असते. तपासणी झाली नसल्यास या सुविधांच्या स्थितीबाबत प्रश्न निर्माण होतात. त्यामुळे विद्यार्थ्यांच्या सुरक्षिततेच्या दृष्टीने नियमित तपासणीची मागणी करण्यात येत आहे.

‘बाल दृष्टी’मधून नेत्रआरोग्याला दृष्टी! ३ वर्षांत महापालिकेच्या १,२०० शाळांतील ३ लाख विद्यार्थ्यांच्या नेत्रतपासणीचे उद्दिष्ट

सात दिवसांत विशेष तपासणीची मागणी

या प्रकरणी शिक्षण निरीक्षक (पश्चिम) संजय जावीर आणि संबंधित उपनिरीक्षकांवर कारवाई करावी, तसेच सात दिवसांच्या आत सर्व संबंधित शाळांची विशेष तपासणी मोहीम राबवावी, अशी मागणी तक्रारदारांनी केली आहे. आता शिक्षण विभाग या आरोपांवर काय भूमिका घेतो आणि तपासणीचे अधिकृत अभिलेख काय सांगतात, याकडे लक्ष लागले आहे.