File Photo : Prakash Jaiswal
नागपूर : मुख्यमंत्री देवेंद्र फडणवीस यांनी राज्यातील पालकत्वाची परंपरा खंडीत करत मुख्यमंत्री असतानाही गडचिरोलीचे पालकमंत्रिपद स्वतःकडे ठेवले. तर, प्रथमच याच जिल्ह्याला सहपालकमंत्रिपद देत त्यांचे निकटवर्तीय व राज्यमंत्री असलेले आशिष जयस्वाल यांच्याकडे दिले. तर, नेहमीप्रमाणे विदर्भातील 4 जिल्ह्यांना दुसऱ्या जिल्ह्यातील मंत्र्यास पालकमंत्रिपद देण्यात आले. यात गोंदिया व भंडारा या दोन जिल्ह्यांच्या नशीबी कायम बाहेरचेच आले, हे विशेष.
हेदेखील वाचा : छत्रपती संभाजीनगरमध्ये आज जनआक्रोश मोर्चा, संतोष देशमुख कुटुंबियांसाठी लोटला जनसमुदाय
वाशिम जिल्ह्याचे पालकमंत्रिपद राष्ट्रवादी अजित पवार गटाचे नेते व कोल्हापूरचे हसन मुश्रीफ यांना देण्यात आले. गोंदिया या अगदी टोकावरच्या जिल्ह्यात अहमदनगरचे व राज्याचे सहकार व पणन मंत्री बाळासाहेब पाटील यांच्याकडे जबाबदारी देण्यात आली. भंडारा जिल्ह्याचे पालकत्व भुसावळचे व राज्याचे वस्त्रोद्योग मंत्री संजय सावकारे यांच्याकडे देण्यात आले. बुलढाण्यात सातारा जिल्ह्याचे व राष्ट्रवादी अजित पवार गटाचे मकरंद जाधव पाटील यांच्याकडे पालकमंत्री आले.
विदर्भातील अमरावती, वाशिम, भंडारा, चंद्रपूर, बुलढाणा, गडचिरोली, वाशिम या सात जिल्ह्याला मंत्रिमंडळात प्रतिनिधीत्व मिळाले नाही. त्यामुळे यातील चार जिल्ह्यांना दुसऱ्या जिल्ह्यातील मंत्र्यांकडे जबाबदारी देण्यात आली. तर, चंद्रपूरचे पालकमंत्रिपद यवतमाळचे व राज्यात आदिवासी विकासमंत्री डॉ. अशोक उईके, बुलढाण्यातील खामगावचे व राज्याचे कामगारमंत्री आकाश फुंडकर यांच्याकडे अकोल्याचे पालकमंत्रिपद सोपविण्यात आले. वर्ध्याचे पालकमंत्रिपद अपेक्षेप्रमाणे राज्यमंत्री पंकज भोयर यांच्याकडे आले.
धनंजय मुंडेंना डच्चू
राज्यातील अनेक बड्या नेत्यांना पालकमंत्री होण्याची संधी मिळाली आहे. मात्र, या सर्वात धनंजय मुंडेंना पालकमंत्रिच्या यादीतून वगळण्यात आले आहे. तर त्यांची बहीण पंकजा मुंडे यांना मराठा आरक्षणासाठी झालेल्या आंदोलनाचे केंद्र असलेल्या जालना जिल्ह्याचे पालकमंत्रिपद देण्यात आले आहे.
सरकारमधील त्रिकूटांकडेही जबाबदारी
सरकारमधील त्रिकूट म्हणजेच देवेंद्र फडणवीस, एकनाथ शिंदे आणि अजित पवार यांच्यावर देखील पालकमंत्रिपदाची जबाबदारी असणार आहे. फडणवीसांकडे गडचिरोली, शिंदेंकडे मुंबई शहर आणि ठाणे, तर अजित दादांकडे पुणे आणि बीड या दोन जिल्ह्यांचे पालकमंत्रिपद असणार आहे.
हेदेखील वाचा : Kolkata Doctor Case: अखेर न्याय मिळाला! आरजी कार अत्याचार-हत्या प्रकरणी आरोपी संजय रॉय दोषी, कोर्टाने दिला निर्णय
