शनिवार, 31 ऑक्टोबर 2026
पुण्यात दिवाळीनंतर पाणी कपात? (फोटो- सोशल मिडिया)
पाणी पुरवठ्यावरून जलसंपदा विभाग आणि पुणे महापालिका यांच्यात सातत्याने वाद निर्माण होत आहे. खडकवासला धरण साखळीतून पुणे शहराला किती टीएमसी पाण्याचा पुरवठा करावा, गरज किती, त्यापोटी महापालिकेकडून जलसंपदा विभागाला कोट्यवधी रुपयांची येणी बाकी असे अनेक मुद्द्यांवर वाद होत आहेत. राज्यात सध्या दुष्काळाची स्थिती आहे. खडकवासला धरण साखळीत पुरेसा जलसाठा असतानाही पुणेकरांवर पाणी कपातीचे संकट उभे राहिले आहे. राज्य सरकारने दिलेल्या आदेशानुसार ही कपात केली गेली आहे. परंतु ही कपात करताना, कालवा समितीच्या बैठकीत नेहमीप्रमाणे शहरी आणि ग्रामीण असा भेदभाव केला गेला. या बैठकीला पुणे शहरातील केवळ तीनच आमदार उपस्थित होते, तसेच पुण्याच्या महापौर देखील उपस्थित नव्हत्या. पुण्याची वाढती पाण्याची गरज याबाबत योग्य बाजू मांडली गेली नसल्याचे दिसत आहे.
उपमुख्यमंत्री तथा पालकमंत्री सुनेत्रा पवार यांच्या अध्यक्षतेखाली आणि जलसंपदामंत्री राधाकृष्ण विखे पाटील व कृषिमंत्री दत्तात्रय भरणे यांच्या उपस्थितीत झालेल्या कालवा समितीच्या बैठकीत पुणे शहराला १३.५ टीएमसी पाणी कोटा मंजूर करण्यात आला. विशेष म्हणजे, या मंजूर कोट्यातील ६.३५ टीएमसी पाणी आतापर्यंत वापरण्यात आले आहे. त्यामुळे ३० जून २०२७ पर्यंत पुणेकरांसाठी केवळ ७.१५ टीएमसी पाणी उपलब्ध राहणार आहे. वास्तविक शहराची वाढती लोकसंख्या, महापालिका क्षेत्राची वाढलेली हद्द याचा विचार करणे गरजेचे होते. पुणे शहराची प्रति वर्षाला पाण्याची गरज ही २२ टीएमसीपर्यंत पोहोचली आहे. त्याचवेळी वर्षभरासाठी केवळ तेरा टीएमसी एवढेच पाणी दिले जाणार आहे. परिणामी, दिवाळीनंतर पुणेकरांना एक दिवसाआड पाणीपुरवठ्याला सामोरे जावे लागण्याची शक्यता आहे.
महापालिकेत नव्याने गावे समाविष्ट झाल्यानंतर पुण्यासाठी दरवर्षी १६.५० टीएमसी पाणी कोटा मंजूर करण्यात आला होता. मात्र, शहराची लोकसंख्या आता सुमारे ८० लाखांवर पोहोचली आहे. महापालिकेला दरमहा सुमारे १.६५ टीएमसी पाण्याची गरज असून, वार्षिक गरज २० टीएमसीपेक्षा अधिक आहे. त्या तुलनेत मंजूर झालेला १३.५ टीएमसी कोटा अत्यंत अपुरा आहे. सध्या शहराला पाणीपुरवठा करणाऱ्या धरणांमध्ये सुमारे २४ टीएमसी पाणीसाठा असला, तरी त्यातून शेती, ग्रामीण भागातील पिण्याच्या पाण्याची गरज, बाष्पीभवन आणि गळती यांचाही विचार करावा लागणार आहे.
या बैठकीला उपस्थित असलेल्या पुणे शहरातील जनप्रतिनिधींकडून आक्रमकपणे बाजू मांडली गेली नाही. पुण्याची वाढती पाण्याची गरज स्पष्ट करता आली नाही. यासंदर्भात स्थायी समितीचे अध्यक्ष श्रीनाथ भिमाले यांनी पिण्याच्या पाण्याला प्राधान्य देण्याची गरज व्यक्त केली. पुणेकरांना पाणी उपलब्ध करून देण्यासाठी मुख्यमंत्री देवेंद्र फडणवीस यांना भेटून वस्तुस्थिती सांगितली जाईल, असे पत्रकारांना सांगितले.
पुणेकरांना दिलासा ! शहरातील पाणीकपात तूर्त शिथिल; महापालिकेचा महत्त्वपूर्ण निर्णय
महापालिकेच्या अतिरिक्त आयुक्त पवनीत कौर यांनीही उपलब्ध पाणी आणि प्रत्यक्ष गरज यामध्ये मोठी तफावत असल्याचे स्पष्ट केले. दिवाळीनंतर शहरात एक दिवसाआड पाणीपुरवठा करावा लागणार असल्याचे त्यांनी सांगितले. याबाबत महापौर आणि सर्वपक्षीय नेत्यांच्या बैठकीत अंतिम निर्णय घेतला जाणार आहे. शहरातील सर्व भागांना समान दाबाने पाणीपुरवठा करणे आणि पाण्याची बचत करण्यासाठी प्रशासन प्रयत्नशील राहणार असून, नागरिकांचे सहकार्य आवश्यक असल्याचेही त्यांनी स्पष्ट केले.
Ans: पुणेकरांना पाणी उपलब्ध करून देण्यासाठी मुख्यमंत्री देवेंद्र फडणवीस यांना भेटून वस्तुस्थिती सांगितली जाईल, असे भिमाले म्हणाले.
Ans: पुण्याच्या महापौर या कळवा समितीची बैठकीला उपस्थित नसल्याचे समजते आहे.
