रविवार, 13 सप्टेंबर 2026
(Photo - Social Media)
बारामती, प्रतिनिधी : कर्नाटकातील एपीएमसीमधील व्यापाऱ्यांकडे महाराष्ट्रातील शेतकऱ्यांचे थकीत असलेले कांदा विक्रीचे तब्बल २ कोटी २४ लाख ९५ हजार १२१ रुपये मिळवून देण्यासाठी ज्येष्ठ नेते तथा माजी केंद्रीय कृषिमंत्री शरद पवार (Sharad Pawar) यांनी पुढाकार घेतला आहे. पवार यांनी कर्नाटकचे मुख्यमंत्री डी. के. शिवकुमार यांच्याशी दूरध्वनीवरून संपर्क साधून शेतकऱ्यांचे थकीत पेमेंट तातडीने मिळण्यासाठी आवश्यक कार्यवाही करण्याची विनंती केली.
शिरूर तालुक्यातील तांदळी येथील शेतकरी नानासो बाबासो कळसकर, नवनाथ खशाबा थोरात, गोरख गणपत गदादे आणि गणेश गणपत गदादे यांचे कर्नाटकातील एपीएमसीमधील व्यापाऱ्यांकडे कांदा विक्रीचे २,२४,९५,१२१ रुपये इतके पेमेंट थकीत आहे. कांदा विक्री करूनही मोठी रक्कम अडकून पडल्याने संबंधित शेतकऱ्यांसमोर आर्थिक अडचणी निर्माण झाल्या आहेत.
शेतकऱ्यांची ही अडचण लक्षात घेऊन कृषिभूषण प्रल्हाद वरे यांनी शरद पवार यांची भेट घेतली. कर्नाटकातील एपीएमसीमधील व्यापाऱ्यांकडे अडकलेले कांद्याचे पैसे शेतकऱ्यांना मिळवून देण्यासाठी हस्तक्षेप करावा, अशी मागणी त्यांनी पवार यांच्याकडे केली.
बारामती लोकअदालतीत 5627 प्रकरणे निकाली; 6.44 कोटींची मोठी वसुली
शेतकऱ्यांचा प्रश्न गांभीर्याने घेत पवार यांनी तातडीने कर्नाटकचे मुख्यमंत्री डी. के. शिवकुमार यांच्याशी दूरध्वनीवरून संवाद साधला. महाराष्ट्रातील शेतकऱ्यांचे कांदा विक्रीचे पैसे कर्नाटकातील एपीएमसीमधील व्यापाऱ्यांकडे थकीत असल्याची माहिती देत, संबंधित शेतकऱ्यांना त्यांचे पैसे लवकरात लवकर मिळतील, यासाठी आवश्यक ती कार्यवाही करण्याची विनंती त्यांनी मुख्यमंत्र्यांना केली.
या प्रकरणी पवार यांनी यापूर्वी झालेल्या भेटीदरम्यान कर्नाटकच्या मुख्यमंत्र्यांना इंग्रजी भाषेत पत्र पाठविले होते. दरम्यान, नानासाहेब कळसकर व त्यांच्या सहकारी शेतकऱ्यांची बेंगळुरू येथील एपीएमसी मार्केटमध्ये कर्नाटकचे मुख्यमंत्री डी. के. शिवकुमार यांच्याशी भेट झाली. यावेळी कळसकर यांनी पवार यांनी पाठविलेले पत्र मुख्यमंत्र्यांना दाखविले.
पत्राची माहिती घेतल्यानंतर शिवकुमार यांनी शेतकऱ्यांना त्यांचे पैसे लवकरात लवकर मिळवून देण्यासाठी व्यवस्था करण्याचे आश्वासन दिले. तसेच महाराष्ट्रातून शरद पवार यांचा या प्रकरणासंदर्भात दूरध्वनी आल्याचेही त्यांनी शेतकऱ्यांना सांगितले.
कांदा उत्पादनासाठी मोठा खर्च करून, प्रतिकूल परिस्थितीत मेहनत घेणाऱ्या शेतकऱ्यांचे विक्री केलेल्या मालाचे कोट्यवधी रुपयांचे पेमेंट रखडणे ही गंभीर बाब आहे. त्यामुळे पवार यांच्या हस्तक्षेपानंतर या प्रकरणाला गती मिळण्याची शक्यता असून, संबंधित व्यापाऱ्यांकडून थकीत रक्कम लवकरच मिळेल, अशी अपेक्षा शेतकऱ्यांनी व्यक्त केली आहे.
“आमच्या कष्टाच्या पैशांसाठी पवार साहेबांनी थेट कर्नाटकच्या मुख्यमंत्र्यांशी संपर्क साधला. त्यामुळे आमचा प्रश्न आता मार्गी लागेल आणि थकीत कांदा पेमेंट लवकर मिळेल, अशी आशा निर्माण झाली आहे,” अशी भावना नानासाहेब कळसकर व त्यांच्या सहकारी शेतकऱ्यांनी व्यक्त केली.
