रविवार, 25 ऑक्टोबर 2026
भरत गोगावले यांची रायगडच्या पालकमंत्रिपदी नियुक्ती झाल्यानंतर त्यांची ‘आग्रा’वरील मिश्किल टिप्पणी चर्चेत
रायगडचं पालकमंत्रिपद गेल्या काही महिन्यांपासून रिक्त होतं. या पदासाठी शिंदे गटाकडून भरत गोगावले आग्रही होते. दुसरीकडे राष्ट्रवादी काँग्रेसकडून अदिती तटकरे यांच्या नावाची चर्चा होती. त्यामुळे रायगडच्या पालकमंत्रिपदावरून महायुतीतील अंतर्गत मतभेद पुन्हा समोर आले होते.
अखेर भरत गोगावले यांची रायगडच्या पालकमंत्रिपदी नियुक्ती करण्यात आली. मात्र, नियुक्तीनंतरही या पदाचं राजकीय श्रेय कोणाला, यावरून महायुतीतील नेत्यांमध्ये आरोप-प्रत्यारोप सुरू असल्याचं चित्र आहे. यापूर्वी आमदार महेंद्र दळवी यांनी रायगडचं पालकमंत्रिपद तब्बल दीड वर्ष सुनील तटकरे यांनी अडवून ठेवल्याचा आरोप केला होता. त्यामुळे शिंदे सेना विरुद्ध राष्ट्रवादी काँग्रेस असा संघर्ष रायगडच्या पालकमंत्रिपदावरून पाहायला मिळाला.
दरम्यान, रायगडसोबतच नाशिकच्या पालकमंत्रिपदावरूनही महायुतीमध्ये तिढा निर्माण झाला होता. अखेर नाशिकची जबाबदारी गिरीश महाजन यांच्याकडे देण्यात आली, तर रायगडची जबाबदारी भरत गोगावले यांच्याकडे सोपवण्यात आली. भरत गोगावले हे त्यांच्या बेधडक आणि मिश्किल शैलीसाठी ओळखले जातात. त्यामुळे त्यांनी केलेल्या ‘आग्रा’ आणि ‘डिक्लेरेशन’च्या उल्लेखाचा नेमका राजकीय संदर्भ काय, याची चर्चा सध्या रायगडच्या राजकीय वर्तुळात रंगली आहे.
दरम्यान, मनोज जरांगे पाटील यांच्या आंदोलनाच्या मुद्द्यावरूनही गोगावले यांनी काही दिवसांपूर्वी शरद पवार यांच्यावर निशाणा साधला होता. “शरद पवारांनी निर्णय घेतला असता तर समाजाला फायदा झाला असता,” असं त्यांनी म्हटलं होतं. त्यावर जरांगे यांनीही प्रतिक्रिया देत, “हे लोक शरद पवारांनी काय केलं, काय केलं म्हणतात; मग यांनी काय दिवे लावले?” असा सवाल केला.
त्यामुळे रायगडच्या पालकमंत्रिपदाच्या नियुक्तीनंतर गोगावलेंच्या ताज्या मिश्किल वक्तव्याने महायुतीतील अंतर्गत राजकारण पुन्हा चर्चेच्या केंद्रस्थानी आलं आहे.
Operation Tiger 4: ठाकरे गटात भूकंप? ‘ १४ आमदार शिंदे गटाच्या वाटेवर, बड्या नेत्याचा दावा
