रविवार, 6 सप्टेंबर 2026
Satara Hill Half Marathon 2026
पुनीत बालन पुरस्कृत सातारा रनर्स फाउंडेशनतर्फे आयोजित स्पर्धेला रविवारी सकाळी साडेसहा वाजता पोलीस कवायत मैदानावरून जिल्हाधिकारी संतोष पाटील यांच्या हस्ते फ्लॅग ऑफ करण्यात आला. स्पर्धेच्या पंधराव्या वर्षानिमित्त यंदा देश-विदेशातील धावपटूंसह तब्बल दहा हजार धावपटूंनी सहभाग घेतला. या विक्रमी सहभागाची गिनीज वर्ल्ड रेकॉर्डमध्ये नोंद करण्यासाठी संयोजकांकडून प्रक्रिया सुरू असल्याचे सांगण्यात आले.
प्रवीण कांबळेने शर्यतीच्या सुरुवातीपासून आक्रमक वेग न घेता परिस्थितीचा अंदाज घेत गती कायम ठेवली. यवतेश्वरच्या चढणीवर ताकद राखून ठेवलेल्या प्रवीणने माघारीच्या टप्प्यात वेग वाढवला. प्रतिस्पर्ध्यांवर मिळवलेली आघाडी त्याने अखेरपर्यंत कायम ठेवली आणि विजेतेपदावर शिक्कामोर्तब केले. कोल्हापूर विद्यापीठाचा पदवीधर असलेला प्रवीण सध्या पोलीस भरतीची तयारी करत आहे. सातारा हिल मॅरेथॉनमधील या यशामुळे त्याच्या धावण्याच्या कारकिर्दीलाही नवी दिशा मिळाली आहे.
महिलांच्या गटात सांगली जिल्ह्यातील जत तालुक्यातील कोलगरे येथील राणी सदाशिव उत्तंडे हिने पहिल्याच सातारा हिल हाफ मॅरेथॉनमध्ये अव्वल कामगिरी केली. दुसऱ्या टप्प्यातील सुमारे साडेपाच किलोमीटरच्या निर्णायक टप्प्यात राणीने वेग वाढवत आघाडी घेतली आणि ती शेवटपर्यंत कायम ठेवली. राणी ही कोरेगाव येथील डी. पी. भोसले कॉलेजची विद्यार्थिनी असून, विद्यापीठ स्तरावरील चीनमधील मॅरेथॉन स्पर्धेत पाचव्या क्रमांकाची कामगिरी तिच्या नावावर आहे. विविध राष्ट्रीय मॅरेथॉनमध्ये सहभागी झालेल्या राणीचा सध्या पुणे-बालेवाडी येथे सराव सुरू आहे.
पोलीस कवायत मैदानापासून पवई नाका, शिवतीर्थ, शाहू चौक, बोगदा आणि यवतेश्वर घाटमार्गे प्रकृती हिल रिसॉर्ट असा पहिला टप्पा पार केल्यानंतर धावपटूंना त्याच मार्गाने परतीचा प्रवास करायचा होता. चढणीचा घाट, त्यानंतरचा उतार आणि अंतिम टप्प्यातील वेगाची लढत यामुळे २१ किलोमीटरची ही शर्यत धावपटूंसाठी खऱ्या अर्थाने कसोटीची ठरली.
पहाटेच्या गार वातावरणात सुरू झालेल्या शर्यतीदरम्यान शहरातील प्रमुख मार्गांवर सातारकरांनी गर्दी केली होती. टाळ्यांचा कडकडाट, घोषणांनी दिलेले प्रोत्साहन आणि विविध ठिकाणी उभारण्यात आलेले हेल्पिंग पॉइंट यामुळे धावपटूंचा उत्साह वाढला. पावर हाऊस परिसरातही नागरिकांनी धावपटूंचे जोशपूर्ण स्वागत केले.
हडपसर येथील सुनिधी गायकवाड हिने पारंपरिक पैठणी परिधान करून मॅरेथॉनमध्ये सहभाग घेत उपस्थितांचे लक्ष वेधले. हडपसरच्या ब्ल्यू नेचर ग्रुपचे सुमारे ५० धावपटूही स्पर्धेत सहभागी झाले. विविध वयोगटातील महिला-पुरुष धावपटूंनी सहभाग नोंदवत फिटनेसचा संदेश दिला.
यंदाच्या स्पर्धेचे घोषवाक्य ‘पीस अँड हार्मनी’ ठेवण्यात आले होते. त्यानुसार पोलीस कवायत मैदानावर शांतता आणि सलोख्याचा संदेश देणारी प्रतिकात्मक चित्रे उभारण्यात आली होती.
धावपटूंच्या सुरक्षिततेसाठी एझार कंपनीच्या माध्यमातून विशेष क्यूआर कोड विकसित करण्यात आला. कोड स्कॅन केल्यानंतर धावपटूचे लोकेशन तसेच जवळच्या पिकिंग पॉइंटला संदेश पोहोचण्याची सुविधा उपलब्ध करून देण्यात आली. आपत्कालीन परिस्थितीत तातडीने मदत मिळण्यासाठी ही यंत्रणा उपयुक्त ठरणार आहे. दरम्यान, मुंबई येथील ६४ वर्षीय धावपटूला शर्यत पूर्ण करताना नगरपालिका कार्यालयाजवळ अचानक चक्कर आली. त्यांना तातडीने खासगी रुग्णालयात दाखल करण्यात आले.
मॅरेथॉनच्या पार्श्वभूमीवर जिल्हा प्रशासन, जिल्हा पोलीस, सातारा नगरपालिका आणि महसूल विभागाने आवश्यक नियोजन केले होते. २१ किलोमीटरच्या मार्गावर विविध ठिकाणी पोलिसांचा बंदोबस्त ठेवण्यात आला. बोगदा परिसरातील वाहतूक काही काळ पर्यायी मार्गाने वळविण्यात आली. सातारा रनर्स असोसिएशनचे डॉ. संदीप काटे, शैलेश ढवळीकर, डॉ. प्रतापराव गोळे तसेच संयोजन समितीचे सदस्य उपस्थित होते. दहा हजार धावपटूंच्या सहभागाची गिनीज वर्ल्ड रेकॉर्डमध्ये नोंद करण्यासाठी प्रक्रिया सुरू असल्याचे संयोजकांनी सांगितले.
पुरुष गटात
प्रवीण कांबळे – सांगली
वेळ : सुमारे १ तास ५ मिनिटे
अंतर : २१ किलोमीटर
महिला गटात
राणी सदाशिव उत्तंडे – सांगली
वेळ : सुमारे १ तास ३० मिनिटे
अंतर : २१ किलोमीटर
