
Shivendrasinhraje Bhosale : जिल्हा बँकेच्या पराभवाचे खापर माझ्यावर नको! शिवेंद्रसिंहराजेंचा भाजप नेत्यांना इशारा
Shivendrasinhraje Bhosale : सातारा जिल्हा मध्यवर्ती सहकारी बँकेतील सत्तांतरानंतर महायुतीमधील अंतर्गत मतभेदांची ठिणगी आता भाजपच्या नेत्यांमधील आरोप-प्रत्यारोपांतून स्पष्टपणे दिसू लागली आहे. बँकेच्या अध्यक्ष-उपाध्यक्ष निवडीत भाजपला सत्तेबाहेर राहावे लागल्यानंतर या घडामोडींची जबाबदारी एकमेकांवर ढकलण्याचे राजकारण सुरू झाले आहे.
या पार्श्वभूमीवर आमदार शिवेंद्रसिंहराजे भोसले यांनी आपली भूमिका स्पष्ट करत पक्षश्रेष्ठींच्या निर्णयाशी आपण प्रामाणिक राहिलो असल्याचे ठामपणे सांगितले. तसेच, यशाचे श्रेय घ्यायचे आणि अपयशाची वेळ आली की दुसऱ्यांकडे बोट दाखवायचे, ही भूमिका योग्य नसल्याचा अप्रत्यक्ष संदेश त्यांनी ग्रामविकास मंत्री जयकुमार गोरे यांना दिला.
जिल्हा बँकेच्या निवडणूक प्रक्रियेत भाजपच्या वतीने आपल्याकडे जबाबदारी सोपवण्यात आली होती. मात्र, या संपूर्ण प्रक्रियेत आपण एकट्याने कोणताही निर्णय घेतला नसल्याचे शिवेंद्रसिंहराजे यांनी स्पष्ट केले. प्रत्येक बैठकीला धैर्यशील कदम यांना सोबत ठेवले होते. पक्षाच्या वरिष्ठांची भूमिका काय आहे, याची जाणीव ठेवूनच सर्व राजकीय हालचाली केल्या. मुख्यमंत्री आणि भाजप नेतृत्वाचा निर्णय हाच आपल्यासाठी अंतिम होता. त्यापलीकडे जाऊन कोणाशीही स्वतंत्र चर्चा अथवा तडजोड केली नसल्याचे त्यांनी सांगितले.
विशेष म्हणजे, सातारा आणि जावळी तालुक्यांतील सुमारे साडेचारशे मतांचे राजकीय महत्त्व लक्षात घेता या भागातील उमेदवारांना अडचणीत आणण्याचे प्रयत्न झाले. तरीही पक्षाच्या वरिष्ठ नेतृत्वाचा शब्द पाळण्यासाठी काही जागांवर त्यागाची भूमिका स्वीकारली.
महायुतीतील घटक पक्षांच्या नेत्यांपर्यंत भाजपची भूमिका पोहोचवण्याचे कामही केले. अध्यक्ष-उपाध्यक्ष निवडीच्या दिवशी सकाळीही वरिष्ठांचा निरोप मकरंद पाटील आणि शंभूराज देसाई यांच्यापर्यंत पोहोचवला होता. मात्र, त्यानंतरही अपेक्षित राजकीय निर्णय झाला नाही, अशी खंत शिवेंद्रसिंहराजे भोसले यांनी व्यक्त केली.
जयकुमार गोरे यांनी निवड प्रक्रियेतील घडामोडींबाबत शिवेंद्रसिंहराजेंनाच विचारा, अशी भूमिका घेतल्याने भाजपमधील समन्वयाचा प्रश्न ऐरणीवर आला आहे. यावर प्रतिक्रिया देताना शिवेंद्रसिंहराजे यांनी, ‘झालं तर आमच्यामुळे आणि नाही झालं तर बाबाराजेंना विचारा, अशी भूमिका योग्य नाही,’ असे सांगत नाराजी व्यक्त केली. गोरेंची नाराजी नेमकी कशामुळे आहे, याचे उत्तर त्यांनाच विचारावे, असेही त्यांनी स्पष्ट केले.
Indapur News : तहसीलदारांच्या कारभाराविरोधात सर्वपक्षीय एल्गार; २५ नोव्हेंबरला इंदापुरात भव्य मोर्चा
जिल्हा बँकेच्या कारभारात काही त्रुटी किंवा चुकीच्या बाबी असतील, तर संचालकांनी त्याविरोधात आवाज उठवणे आवश्यक आहे. मात्र, संस्थेचा वापर केवळ राजकीय संघर्षासाठी होऊ नये, असे मत शिवेंद्रसिंहराजे यांनी मांडले. सहकारी बँकेच्या हितापेक्षा राजकीय प्रतिष्ठेचे विषय मोठे केले जात असतील, तर ते योग्य नाही, असा त्यांच्या विधानाचा रोख होता.
पक्षासाठी काम करताना आणि देवेंद्र फडणवीस यांच्या निर्णयाला प्राधान्य देताना आपण कधीही अटी घातल्या नाहीत. पक्षाच्या भूमिकेनुसार जागांचा त्यागही केला. त्यामुळे निवडणुकीतील घडामोडींचे श्रेय घेण्याची वेळ आली की पुढे येणे आणि अपेक्षित निकाल न लागल्यास जबाबदारी दुसऱ्यांवर ढकलणे, हा प्रकार खटकणारा असल्याचे त्यांनी आपल्या वक्तव्यातून सूचित केले. ‘शांत राहून काम केले तर अनेक गोष्टी साध्य होतात; मात्र प्रत्येक वेळी बोलत राहिल्याने काहीच साध्य होत नाही,’ या विधानातूनही त्यांनी राजकीय सहकाऱ्यांना संयमाचा सल्ला दिला.
जिल्हा बँकेतील सत्तांतर हा केवळ अध्यक्ष-उपाध्यक्ष निवडीपुरता मर्यादित विषय राहिलेला नाही. या निमित्ताने भाजपमधील अंतर्गत समन्वय, महायुतीतील निर्णयप्रक्रिया आणि स्थानिक नेत्यांमधील विश्वासाचा प्रश्न पुढे आला आहे. शिवेंद्रसिंहराजे यांच्या जाहीर नाराजीमुळे साताऱ्यातील भाजपच्या आगामी राजकीय भूमिकेबाबत उत्सुकता निर्माण झाली आहे.
Ans: जिल्हा बँकेच्या अध्यक्ष-उपाध्यक्ष निवडीत भाजपला सत्तेबाहेर राहावे लागल्यानंतर या घडामोडींची जबाबदारी कोणाची, यावरून भाजप नेत्यांमध्ये मतभेद निर्माण झाले आहेत.
Ans: जिल्हा बँकेच्या निवडणूक प्रक्रियेत आपण पक्षश्रेष्ठींच्या निर्णयानुसारच काम केले. मुख्यमंत्री आणि भाजप नेतृत्वाच्या भूमिकेबाहेर जाऊन कोणताही स्वतंत्र निर्णय घेतला नाही, असे त्यांनी स्पष्ट केले.
Ans: ‘झालं तर आमच्यामुळे आणि नाही झालं तर बाबाराजेंना विचारा, अशी भूमिका योग्य नाही,’ असे म्हणत त्यांनी जयकुमार गोरे यांच्या विधानावर नाराजी व्यक्त केली.