मंगळवार, 11 ऑगस्ट 2026
शास्त्रीनगर रुग्णालयात धक्कादायक प्रकार; अल्पवयीन मुलीचा प्रेग्नन्सी रिपोर्ट पॉझिटिव्ह, बाहेरील टेस्ट निगेटिव्ह
कुटुंबीयांच्या म्हणण्यानुसार, रुग्णालयात मुलीची एक-दोन नव्हे तर तीन वेळा गर्भधारणा चाचणी करण्यात आली. या चाचण्यांमध्ये पॉझिटिव्ह रिपोर्ट आल्याचा दावा आहे. याशिवाय कृष्णा डायग्नोस्टिक सेंटरमध्ये करण्यात आलेल्या तपासणीचा अहवालही पॉझिटिव्ह असल्याचे कुटुंबीयांचे म्हणणे आहे. सोनोग्राफी अहवालही पॉझिटिव्ह असल्याचा दावा करण्यात आला आहे.
रुग्णालयातील अहवालावर कुटुंबीयांना विश्वास न बसल्याने मुलीच्या वडिलांनी बाहेरून प्रेग्नन्सी टेस्ट किट आणून तपासणी केली. या चाचणीचा निकाल निगेटिव्ह आल्याचा कुटुंबीयांचा दावा आहे. यानंतर कुटुंबीयांनी पुन्हा संबंधित निदान केंद्राशी संपर्क साधला. या संपूर्ण प्रकारामुळे रुग्णालयातील तपासणी आणि बाहेरील चाचणीच्या निकालांमध्ये कथित तफावत असल्याचा मुद्दा समोर आला आहे.
या प्रकारामुळे संबंधित मुलीला मोठा मानसिक धक्का बसल्याचे कुटुंबीयांनी सांगितले. जवळपास २४ तास ती मानसिक तणावाखाली होती, असा दावा करण्यात आला आहे. ‘मी काही केलेले नसताना माझ्यासोबत असा रिपोर्ट का आला?’ असा सवाल करत ती रडत असल्याचे कुटुंबीयांनी सांगितले.
भाजप नगरसेवक दीपेश म्हात्रे यांनी या प्रकरणाचा मुद्दा उपस्थित केला असून, संपूर्ण प्रकरणाची चौकशी करण्याची मागणी केली आहे. वैद्यकीय तपासण्यांचे अहवाल, सोनोग्राफी आणि प्रयोगशाळेतील प्रक्रिया यांची पडताळणी करण्याची मागणी करण्यात आली आहे.
या प्रकरणात नेमका अहवाल कसा तयार झाला, विविध चाचण्यांचे निकाल वेगवेगळे का आले आणि सोनोग्राफीच्या अहवालात नेमके काय नमूद करण्यात आले होते, याची सखोल चौकशी होण्याची आवश्यकता आहे.
केडीएमसीच्या आरोग्य विभागाने या प्रकरणाची चौकशी केल्यास चाचणी प्रक्रिया, नमुना तपासणी, प्रयोगशाळेचे अहवाल आणि संबंधित वैद्यकीय नोंदी यांची पडताळणी होणे अपेक्षित आहे.
या कथित प्रकारामुळे केडीएमसीच्या आरोग्य व्यवस्थेवर प्रश्न उपस्थित झाले आहेत. आता केडीएमसी आयुक्त अभिनव गोयल, शास्त्रीनगर रुग्णालय प्रशासन आणि संबंधित निदान केंद्र या प्रकरणावर काय स्पष्टीकरण देतात, याकडे लक्ष लागले आहे.
Raj Thackeray on KDMC: कल्याण-डोंबिवलीच्या स्थितीवरून राज ठाकरेंचा संताप; “बाळासाहेब आज असते तर…”
