गुरुवार, 8 ऑक्टोबर 2026
ठाण्यात १०८ ॲम्ब्युलन्स ठरली जीवनदायिनी! रस्त्यातच गर्भवतीची सुरक्षित प्रसूती; वैद्यकीय पथकाचे कौतुक
गुरुवारी सकाळी ६ वाजून २२ मिनिटांनी आशा वर्कर सीमा यांनी गर्भवती महिलेला तातडीने वैद्यकीय मदत मिळावी यासाठी १०८ आपत्कालीन क्रमांकावर संपर्क साधला. कॉल मिळाल्यानंतर अवघ्या तीन मिनिटांत म्हणजे सकाळी ६.२५ वाजता ॲम्ब्युलन्स घटनास्थळाकडे रवाना झाली. सकाळी ६.३६ वाजता ॲम्ब्युलन्स संबंधित ठिकाणी पोहोचली. म्हणजेच ॲम्ब्युलन्स रवाना झाल्यानंतर अवघ्या ११ मिनिटांत गर्भवती महिलेला वैद्यकीय मदत उपलब्ध झाली. त्यानंतर महिलेला सुरक्षितपणे ॲम्ब्युलन्समध्ये घेऊन सोनावला प्राथमिक आरोग्य केंद्राकडे नेण्यात येत होते.
Lifestyle News: सिगारेट ओढता? मग रक्तवाहिन्यांवरही होऊ शकतो ‘हा’ मोठा परिणाम; तज्ज्ञांचा इशारा
महिलेला प्राथमिक आरोग्य केंद्रात नेत असताना सकाळी ७.१५ वाजण्याच्या सुमारास तिच्या प्रसूतीच्या कळा अचानक तीव्र झाल्या. त्यामुळे रुग्णालयात पोहोचण्यापूर्वीच प्रसूती करणे आवश्यक झाले. परिस्थितीचे गांभीर्य ओळखून ॲम्ब्युलन्समध्ये उपस्थित असलेले ऑन-ड्युटी ईएमएसओ डॉ. अजय भागवत आणि इमर्जन्सी असिस्टंट अरुण धुमाळ यांनी तातडीने आवश्यक वैद्यकीय मदत उपलब्ध करून दिली. त्यांच्या देखरेखीखाली ॲम्ब्युलन्समध्येच महिलेची सुरक्षित प्रसूती करण्यात आली.
प्रसूतीनंतर डॉक्टरांनी आई आणि नवजात बाळाच्या प्रकृतीची तपासणी केली. दोघांचीही प्रकृती स्थिर असल्याचे आढळून आले. त्यानंतर आई आणि बाळाला पुढील उपचार व वैद्यकीय निरीक्षणासाठी सोनावला प्राथमिक आरोग्य केंद्रात नेण्यात आले. तेथे उपस्थित वैद्यकीय कर्मचाऱ्यांकडे दोघांनाही सुरक्षितपणे सुपूर्द करण्यात आले. आई आणि बाळाच्या आरोग्याची आवश्यक काळजी घेण्यासाठी पुढील वैद्यकीय निरीक्षण सुरू करण्यात आले.
या संपूर्ण घटनेत १०८ ॲम्ब्युलन्स सेवेची तत्परता महत्त्वाची ठरली. मदतीचा कॉल आल्यानंतर अवघ्या काही मिनिटांत ॲम्ब्युलन्स घटनास्थळी पोहोचली. त्यानंतर रुग्णालयाकडे जात असताना अचानक उद्भवलेल्या प्रसूतीच्या परिस्थितीत वैद्यकीय पथकाने योग्य निर्णय घेत आवश्यक उपचार केले. डॉ. अजय भागवत आणि अरुण धुमाळ यांनी दाखवलेल्या प्रसंगावधानामुळे महिलेला वेळेवर वैद्यकीय मदत मिळाली आणि बाळाचा सुरक्षित जन्म झाला. ग्रामीण आणि दुर्गम भागात आपत्कालीन वैद्यकीय सेवा वेळेत उपलब्ध होणे अत्यंत महत्त्वाचे असते. सोनावला येथील या घटनेत १०८ ॲम्ब्युलन्स सेवेच्या माध्यमातून गर्भवती महिलेला वेळेवर मदत मिळाल्याने आई आणि बाळ दोघेही सुखरूप आहेत.
