शनिवार, 3 ऑक्टोबर 2026
Maharashtra Drought Representative image (Photo - Social Media)
Wardha News : यंदाच्या खरीप हंगामात ऐन पावसाळ्यात पावसाने दडी मारल्याने वर्धा जिल्ह्यावर दुष्काळजन्य परिस्थिती ओढावली आहे. पावसाचा खंड आणि अल्प पर्जन्यमानाचा थेट फटका शेतपिकांना बसला असून शासनाने कारंजा वगळता जिल्ह्यातील उर्वरित सात तालुक्यांचा दुष्काळ ट्रिगर-१ मध्ये समावेश केला आहे.
दुष्काळी परिस्थितीच्या पार्श्वभूमीवर शासनाकडून नुकसानीचे पंचनामे करण्याचे निर्देश जिल्हा प्रशासनाला देण्यात आले आहेत. त्यानंतर महसूल, कृषी आणि ग्रामविकास विभागाच्या अधिकाऱ्यांकडून संयुक्तपणे युद्धपातळीवर पंचनामे सुरू करण्यात आले आहेत. आतापर्यंत जिल्ह्यातील ८,८८३ हेक्टर क्षेत्रावरील पिकांचे पंचनामे पूर्ण करण्यात आले आहेत.
सुरुवातीला पावसाने हुलकावणी दिल्यानंतर काही प्रमाणात पाऊस झाल्याने शेतकऱ्यांनी पेरणीला वेग दिला होता. मात्र, त्यानंतर पुन्हा पावसाने दडी मारल्याने खरीप पिकांची अवस्था बिकट झाली.
कृषी विभागाने शासनाच्या मार्गदर्शक सूचनांनुसार १४ सप्टेंबरपर्यंतचे पर्जन्यमान, पावसाचा खंड, पिकांची परिस्थिती आणि उत्पादनातील संभाव्य घट यासह विविध निकषांचा अभ्यास केला. या अभ्यासानंतर वर्धा जिल्ह्यातील सात तालुक्यांचा दुष्काळ ट्रिगर-१ मध्ये समावेश करण्यात आला.
कृषी विभागाच्या अंदाजानुसार यंदा जिल्ह्यात ४ लाख ६ हजार ५५५ हेक्टर क्षेत्रावर खरीप पिकांची लागवड अपेक्षित होती. प्रत्यक्षात त्यापेक्षा जास्त म्हणजे सुमारे ४ लाख १९ हजार ५७५ हेक्टर क्षेत्रावर खरीप पिकांची लागवड झाली आहे.
यामध्ये सोयाबीन, कपाशी आणि तूर या प्रमुख पिकांचा समावेश आहे. सोयाबीनचे १,१९,७३३ हेक्टर, कपाशीचे २,३२,३५३ हेक्टर, तर तुरीचे ६०,४१३ हेक्टर क्षेत्र आहे.
अल्प पर्जन्यमान आणि पावसाच्या खंडामुळे झालेल्या नुकसानीची माहिती प्रशासनाकडून गोळा केली जात आहे. महसूल, कृषी आणि ग्रामविकास विभागाकडून संयुक्त पंचनामे पूर्ण करून त्याचा अहवाल तयार केला जाणार आहे. जिल्हा प्रशासनाकडून नुकसानीचा संपूर्ण अहवाल १० ऑक्टोबरपर्यंत शासनाला सादर केला जाणार आहे.
‘शासनाच्या मार्गदर्शक सूचनांनुसार शेतपिकांच्या नुकसानीचे संयुक्त पंचनामे युद्धपातळीवर केले जात आहेत. जिल्ह्यातील नुकसानीची माहिती गोळा करून ती १० ऑक्टोबरपर्यंत शासनाला पाठविली जाणार आहे,’ अशी माहिती जिल्हा अधीक्षक कृषी अधिकारी अरविंद उपरिकर यांनी दिली.
