आई येडेश्वरी देवीच्या यात्रेला उसळला भाविकांचा जनसागर! सोलापूर-धुळे हायवे जाम (Photo Credit-X)
सोशल मीडियावर सध्या या महामार्गावरील ट्रॅफिक जॅमचे धक्कादायक ड्रोन व्हिडिओ व्हायरल होत आहेत. या व्हिडिओंमध्ये जिथपर्यंत नजर जाईल तिथपर्यंत केवळ वाहनांच्या रांगाच रांगा दिसत आहेत. तासनतास एकाच जागी उभी असलेली ही वाहने आणि भाविकांची गर्दी यामुळे प्रशासकीय नियोजनावर मोठा ताण निर्माण झाला आहे. कडाक्याच्या उन्हात लहान मुले आणि वृद्ध प्रवाशांचे प्रचंड हाल होत आहेत.
येडेश्वरी यात्रा में उमड़ा 15 लाख श्रद्धालुओं का जनसैलाब, सोलापुर-धुले हाईवे पर करीब 40 किलोमीटर लंबा जाम लगा!#Maharashtra pic.twitter.com/GxDSu6AGk6 — NDTV India (@ndtvindia) April 3, 2026
या भीषण वाहतूक कोंडीचा फटका केवळ सर्वसामान्यांनाच नाही, तर अनेक महत्त्वाच्या व्यक्तींनाही (VIP) बसला आहे. मिळालेल्या माहितीनुसार, भाजपचे एक ज्येष्ठ नेते या महामार्गावर सुमारे अडीच तास अडकून पडले होते. प्रशासनाकडून रस्ता मोकळा करण्याचे प्रयत्न युद्धपातळीवर सुरू असले, तरी भाविकांचा ओघ पाहता वाहतूक सुरळीत होण्यास मोठा वेळ लागण्याची शक्यता आहे.
येडेश्वरी देवीची ही वार्षिक यात्रा ३० मार्चपासून सुरू झाली असून ती ७ एप्रिलपर्यंत चालणार आहे. विशेषतः चैत्र पौर्णिमेनिमित्त होणाऱ्या पालखी सोहळ्यासाठी भाविकांनी विक्रमी गर्दी केली आहे. दरवर्षी या यात्रेला लाखो भाविक येतात, मात्र यंदा हा आकडा १५ लाखांच्या पुढे गेल्याने सर्व व्यवस्था अपुरी पडत असल्याचे चित्र आहे.
सोलापूर-धुळे हायवेवर निर्माण झालेली ही कोंडी पाहता, प्रवाशांनी पर्यायी मार्गांचा अवलंब करावा किंवा शक्य असल्यास प्रवास टाळावा, असे आवाहन जिल्हा प्रशासन आणि पोलीस विभागामार्फत करण्यात येत आहे. गर्दीवर नियंत्रण मिळवण्यासाठी अतिरिक्त पोलीस कुमक तैनात करण्यात आली असून, स्वयंसेवी संस्थांच्या मदतीने भाविकांना पिण्याचे पाणी पुरवण्याचे काम सुरू आहे.
.png "Videos"){kind=small}
