University Of मुंबई : रखुमाई आणि संत तुकाराम महाराजांची पत्नी आवली यांच्यातील संवाद रसिकांसमोर मांडणाऱ्या ‘संगीत देवबाभळी’ नाटकाचा विद्यार्थी आता अभ्यास करणार आहेत. भद्रकाली प्रॉडक्शन्सच्या (Bhadrakali Production) संगीत देवबाभळी (Sangeet Devbabhali) या मराठी रंगभूमीवरील नाटकाचा या वर्षीपासून मुंबई विद्यापीठाच्या बी.ए. अभ्यासक्रमाच्या मराठी विषयात समावेश करण्यात आला आहे.
या नाटकाच्या लेखन आणि दिग्दर्शनाची धुरा प्राजक्त देशमुखने (Prajakt Deshmukh) सांभाळली आहे. या नाटकाचा बी ए अभ्यासक्रमात समावेश होणं ही मराठी नाट्यसृष्टीसाठी आनंदाची बाब आहे.
एकांकिकेच्या माध्यमातून हे नाटक रंगमंचावर आलं. शुभांगी सदावर्ते आणि मानसी जोशी या नाटकात मुख्य भूमिकेत आहेत. ‘संगीत देवबाभळी’ हे नाटक मराठी रंगभूमीवरील सर्वाधिक पुरस्कार प्राप्त नाटक आहे. या नाटकाचं दिग्गजांनीही कौतुक केलं आहे.
[read_also content=”आतुरतेने प्रतिक्षा करणाऱ्या ओबीसींना न्याय मिळाला; पंकजाताई मुंडे म्हणतात… https://www.navarashtra.com/maharashtra/obcs-eagerly-waiting-got-justice-says-pankaja-munde-on-political-reservation-for-obc-nrvb-306280.html”]
मुंबई विद्यापीठाच्या अभ्यासक्रमात ‘संगीत देवबाभळी’ नाटकाचा समावेश झाल्याने प्राजक्त देशमुख म्हणाला, ‘संगीत देवबाभळी’ नाटकाचा मुंबई विद्यापीठाच्या बी. ए. अभ्यासक्रमाच्या मराठी विषयात समावेश करण्यात आल्याने खूप आनंद होत आहे. आपल्या कलाकृतीला साहित्याचा दर्जा मिळणे ही खूप आनंददायी बाब आहे. आता आणखी जबाबदारीने काम करणं गरजेचं आहे. झी गौरव, मटा सन्मान, शासनाचे असे अनेक पुरस्कार या नाटकाला मिळाले आहेत पण अभ्यासक्रमात समावेश होणं हा पुरस्कार या सगळ्या पुरस्कारांपेक्षा वेगळा आहे.
‘संगीत देवबाभळी’ या नाटकाचे निर्माते प्रसाद कांबळी म्हणाले, “मुंबई विद्यापीठात मी अभियांत्रिकीचे शिक्षण घेतले आणि आज त्याच विद्यापीठाच्या अभ्यासक्रमात ‘संगीत देवबाभळी’ नाटकाचा समावेश झाला आहे. ही माझ्यासाठी खूप महत्त्वाची बाब आहे. मराठी रंगभूमीचं पुढे काय होणार असे म्हटले जात असताना अशी एखादी गोष्ट घडणं ही मोठी गोष्ट आहे. प्राजक्त देशमुखसह या नाटकातील प्रत्येकाचं अभिनंदन. नाटकाची घौडदौड पुढे अशीच सुरू राहू देत”.
[read_also content=”हिरो मोटोकॉर्पकडून नवीन एक्सपल्स २०० ४व्ही – रॅली एडिशनच्या लाँचसह त्यांच्या प्रिमिअम श्रेणीमध्ये अधिक वाढ https://www.navarashtra.com/automobile/hero-motocorp-further-boosts-its-premium-range-with-the-launch-of-the-new-xpuls-2004v-rally-edition-nrvb-306236.html”]
भद्रकाली प्रॉडक्शन्सच्या ‘संगीत देवबाभळी’ या नाटकाचे नेपथ्य प्रदीप मुळ्ये यांनी केलं आहे. तर संगीत आनंद ओक यांनी केलं आहे. प्रफ्फुल्ल दिक्षीत याने प्रकाशयोजना केली आहे. सध्या या नाटकाचे रंगभूमीवर मोठ्या प्रमाणावर प्रयोग सुरू आहेत. हे नाटक प्रेक्षकांच्या पसंतीस उतरत आहे.
