Ashok Chavan News: नांदेड भाजपच्या कोअर कमिटीपासून अशोक चव्हाणांना दूर का ठेवले? समर्थकांमध्ये नाराजी अन् चर्चांना उधाण

Ashok Chavan News: अलीकडच्या काळात नांदेड महानगरपालिकेची निवडणूक नसताना अशोक चव्हाण यांना महानगर कोअर कमिटीपुरते मर्यादित ठेवण्यात आल्याचे दिसत आहे.

• भाजप प्रदेशाध्यक्ष रवींद्र चव्हाण यांनी नांदेड जिल्ह्याची कोअर कमिटी केली जाहीर
• नांदेड उत्तर व नांदेड दक्षिण मतदारसंघांच्या कमिटीत खासदार अशोक चव्हाणांना स्थान नाही
• अशोक चव्हाण यांच्या समर्थक कार्यकर्त्यांमध्ये तीव्र नाराजी आणि संभ्रमाचे वातावरण

Nanded BJP Politics: नांदेडच्या राजकीय वर्तुळात संध्या भाजपने जाहीर केलेल्या कोअर कमिटीची जोरदार चर्चा सुरू आहे. भाजपचे प्रदेशाध्यक्ष आमदार रवींद्र चव्हाण यांनी नांदेड जिल्ह्यासाठी कोअर कमिटी जाहीर केली. पण माजी मुख्यमंत्री आणि भाजप खासदार अशोक चव्हाण यांना नांदेड उत्तर आणि नांदेड दक्षिण विधानसभा मतदारसंघातील कोअर कमिटीत त्यांना स्थान न मिळाल्याने त्यांच्या समर्थक कार्यकर्त्यांमध्ये नाराजीचा सूर उमटू लागला आहे.

आगामी काळात जिल्हा परिषद आणि पंचायत समित्यांच्या निवडणुकांच्या पार्श्वभूमीवर ही कमिटी जाहीर करण्यात आली. पण अशोक चव्हाण यांचा ग्रामीण भागासह संपूर्ण नांदेड जिल्ह्यातील संपर्क आणि राजकीय प्रभाव पाहता त्यांना उत्तर आणि दक्षिण विधानसभा मतदारसंघांच्या कमिटीत स्थान दिले गेले नाही का, असा प्रश्न आता राजकीय वर्तुळात प्रश्न उपस्थित केले जात आहेत.

Pune Tribal Students Protest : मुंबई उच्च न्यायालयाने घेतली आंदोलनाची दाखल, आंदोलनावर फडणवीसांची मोठी घोषणा

आगामी स्थानिक स्वराज्य संस्थांच्या निवडणुकांवर परिणाम?

गेल्या काही वर्षांत नांदेड जिल्ह्यातील विविध नगरपरिषदा, नांदेड महानगरपालिका, नांदेड जिल्हा मध्यवर्ती बँक आणि विधान परिषद निवडणुकांमध्ये अशोक चव्हाण यांचे वर्चस्व कायम राहिले आहे. अशोक चव्हाण यांच्या प्रभावामुळे या निवडणुकांमध्ये भाजपला यश मिळाले होते. त्यामुळे आगामी जिल्हा परिषद आणि पंचायत समित्यांच्या निवडणुकांचे नेतृत्वही अशोक चव्हाण यांच्याकडेच राहील, अशी अपेक्षा त्यांच्या समर्थकांकडून व्यक्त केली जात होती.

पण नांदेड दक्षिण आणि नांदेड उत्तर विधानसभा मतदारसंघांच्या कोअर कमिटीतच चव्हाण यांना स्थान का दिले गेले नाही यावरून पक्षाच्या रणनीतीबाबत वर्तवितर्क काढले जात आहे. चव्हाण यांना ग्रामीण भागातील पक्ष संघटनेतून दूर ठेवण्यामागे पक्षाची नेमकी भूमिका काय, असा सवालही उपस्थित केला जात आहे.

समर्थक कार्यकर्त्यांमध्ये अस्वस्थता

अशोक चव्हाण यांचे अनेक समर्थक कार्यकर्ते आगामी जिल्हा परिषद आणि पंचायत समिती निवडणुकांमध्ये संधी मिळण्याच्या प्रतीक्षेत आहेत. मात्र, प्रदेश पातळीवरून चव्हाण यांच्या ग्रामीण भागातील राजकीय अधिकारांवर मर्यादा आणण्याचे प्रयत्न सुरू असल्याच्या चर्चेमुळे कार्यकर्त्यांमध्ये अस्वस्थता असल्याचे बोलले जात आहे.

Sangli Politics: सांगली राजकीय वर्तुळात खळबळ! जतमध्ये दोन माजी आमदारांसह ४० जणांवर पोलिसांत गुन्हा

लोहा-कंधार मतदारसंघालाही स्थान नाही

दरम्यान, लोहा-कंधार विधानसभा मतदारसंघाबाबतही भाजपच्या नव्या संघटनात्मक रचनेबाबतही प्रश्न उपस्थित केले जात आहेत. या मतदारसंघात जिल्हा परिषदेचे नऊ सर्कल असतानाही कोअर कमिटीत या मतदारसंघातील एकाही पदाधिकाऱ्याला स्थान मिळालेले नाही. तसेच जिल्हा कार्यकारिणीतही या मतदारसंघातील कोणत्याही कार्यकर्त्याला महत्त्वाची जबाबदारी देण्यात आलेली नसल्याची चर्चा आहे.

महानगरातील जबाबदारीवरूनही आश्चर्य

अलीकडच्या काळात नांदेड महानगरपालिकेची निवडणूक नसताना अशोक चव्हाण यांना महानगर कोअर कमिटीपुरते मर्यादित ठेवण्यात आल्याचे दिसत आहे. त्याचबरोबर ग्रामीण जिल्हाध्यक्षपदाची तीन टर्म जबाबदारी सांभाळलेले राम पाटील रातोळीकर यांचाही महानगर कोअर कमिटीत समावेश करण्यात आला आहे. या निर्णयामुळे भाजपच्या स्थानिक राजकारणात विविध चर्चांना उधाण आले आहे.

आगामी जिल्हा परिषद आणि पंचायत समित्यांच्या निवडणुकांच्या पार्श्वभूमीवर अशोक चव्हाण यांची ग्रामीण भागातील भूमिका नेमकी काय राहणार, तसेच भाजपची स्थानिक निवडणूक रणनीती कोणाच्या नेतृत्वाखाली आखली जाणार, याकडे आता नांदेडच्या राजकीय वर्तुळाचे लक्ष लागले आहे.