भाजप नेते परिणय फुके यांचे शिवसेनेबाबत वादग्रस्त विधान समोर आले आहे (फोटो - सोशळ मीडिया)
Parinay phuke on shivsena : भंडारा : भंडारामधील कार्यकर्ता मेळाव्यामध्ये भाजप नेते परिणय फुके यांनी भाषण केले. यावेळी मात्र त्यांनी केलेल्या वक्तव्याची राजकीय वर्तुळामध्ये जोरदार चर्चा सुरु आहे. शिवसेनेचा बाप मीच असे भाजप नेते परिणय फुके म्हणाले आहेत. यामुळे महायुतीमध्ये मीठाचा खडा पडण्याची शक्यता आहे.भाजप नेत्यांच्या या वक्तव्यामुळे शिवसेनेच्या नेत्यांच्या भावना दुखावल्या गेल्या आहेत.
काय म्हणाले परिणय फुके?
भंडाऱ्यामधील मेळाव्यामध्ये परिणय फुके म्हणाले की, “काही लोकांनी माझ्यावर आरोप केले. पण मी माझ्यावर काही आरोप झाले त्यावर शांत बसलो. तुमच्या घरी जर काही चांगलं झालं तर कुणी केले? समजा पोरगा दहावीत पास झाला तर पोराने चांगलं केलं, आईने चांगलं केलं असं म्हणतात. काही खराब गोष्ट घडली तर म्हणतात हे बापाने केलं. त्या दिवशी मला हे पक्कं माहीत झालं की शिवसेनेचाही बाप मीच आहे. कारण ते खापर माझ्यावरच फोडत आहेत. या सगळ्या आरोपांकडे लक्ष न देता आपण आपलं काम ताकदीने सुरु ठेवलं पाहिजे आणि पक्ष वाढवण्याचं काम केले पाहिजे, असे भाजप नेते परिणय फुके म्हणाले आहेत.
राजकीय बातम्या वाचण्यासाठी क्लिक करा
पुढे ते म्हणाले की, लोकं आपला विरोध करत असतील तर आपण ते सगळ्यांपुढे सांगतो. आज मी इथे मान्य करतो आणि आभारही मानतो की मला विधान परिषदेवर नेण्याचं काम हे चंद्रशेखर बावनकुळे यांनी केले. मी त्यांचे मनःपूर्वक आभार मानतो.” असं परिणय फुके म्हणाले आहेत. मात्र भाषणावेळी मीच शिवसेनेचा बाप आहे असा म्हटल्यामुळे वाद निर्माण होण्याची शक्यता आहे.
भाजप नेते परिणय फुके यांच्या वक्तव्यामुळे आता वाद निर्माण होण्याची शक्यता आहे. मात्र परिणय फुके यांनी केवळ शिवसेनेचा उल्लेख केला आहे. शिवसेनेतील ठाकरे गट किंवा शिंदे गट याबाबत त्यांनी कोणताही उल्लेख केलेला नाही. यावर आता ठाकरे गटाचे नेते अंबादास दानवे म्हणाले की, परिणय फुके काय बोलले आणि कुठल्‌या शिवसेनेबाबत बोलले ते मला माहीत नाही. मला फार काही बोलायचं नाही, असे अंबादास दानवे म्हणाले आहेत.
महाराष्ट्रसंबंधित बातम्या वाचण्यासाठी क्लिक करा
यावर शिंदे गटाचे नेते व मंत्री दीपक केसरकर यांनी या प्रकरणावर प्रतिक्रिया दिली आङे. दीपक केसरकर म्हणाले की, एखाद्याच्या विधानाला पक्षाचं विधान म्हणून बघता कामा नये. परिणय फुके माझे मित्रच आहेत. पण लोकांची सेवा कशी होईल ते पाहिलं पाहिजे. दरम्यान परिणय फुकेंनी माफी मागितली पाहिजे अशी मागणी एकनाथ शिंदेच्या शिवसेनेकडून करण्यात आली आहे. स्थानिक नेत्यांनी पत्रकार परिषद घेतली आणि ही मागणी केली आहे.
