शुक्रवार, 9 ऑक्टोबर 2026
(Photo - X)
शिंदेंच्या शिवसेनेतील ज्येष्ठ नेते आणि माजी खासदार गजानन कीर्तिकर (Gajanan Kirtikar) हे नाराज असून लवकरच शिवसेना शिंदे गटाला ‘जय महाराष्ट्र’ करणार असल्याच्या चर्चाना उधाण आले होते. तसेच, ते पुन्हा उद्धव ठाकरेंच्या शिवसेनेत प्रवेश करणार असल्याच्या बातम्या समोर येत होत्या. आता मात्र यावर स्वतः गजानन कीर्तिकारांनी स्पष्टीकरण दिल असून पक्ष सोडण्याच्या चर्चाना त्यांनी पूर्णविराम दिला आहे.
कीर्तिकर यांनी आपण पक्ष सोडणार नसल्याचं स्पष्ट केलं आहे. तसेच उपमुख्यमंत्री एकनाथ शिंदे यांच्या नेतृत्वाखाली आपण समाधानी असल्याचं त्यांनी सांगितल.
शिवसेना सोडून दुसऱ्या पक्षात जाण्याची आपली कोणतीही इच्छा नसल्याचं कीर्तिकर यांनी स्पष्ट केलं. आपण पक्ष सोडणार असल्याच्या बातम्या पाहून धक्का बसल्याचंही त्यांनी सांगितलं. एकनाथ शिंदे यांनी फोन करून विचारपूस केली होती. त्यावेळी आपण त्यांना वस्तुस्थिती सांगितल्याचं कीर्तिकर यांनी नमूद केलं.
एकनाथ शिंदे यांच्या नेतृत्वावर आपला विश्वास असल्याचं सांगत, शिवसेनेला महाराष्ट्रात पहिल्या क्रमांकावर आणण्यासाठी प्रयत्न करणार असल्याची भूमिकाही त्यांनी मांडली.
गजानन कीर्तिकर यांनी पक्षातील संपर्कव्यवस्थेचा मुद्दाही उपस्थित केला. माजी खासदार म्हणून व्याधिग्रस्त आणि अन्यायग्रस्त लोकांची कामं करण्यासाठी कार्यकर्ते आणि नागरिकांशी संपर्क ठेवणं आवश्यक असल्याचं त्यांनी सांगितलं.
तातडीच्या कामांसाठी मुख्यमंत्री किंवा पक्षप्रमुखांशी संपर्क साधता आला पाहिजे, अशी अपेक्षा त्यांनी व्यक्त केली. संपर्कातील अडचणी दूर करण्यासाठी व्यवस्था करण्याचं आश्वासन एकनाथ शिंदे यांनी दिल्याचं कीर्तिकर यांनी सांगितलं.
याशिवाय, महिन्यातून किमान एक बैठक व्हावी, अशी मागणीही त्यांनी केली. एनडीएचा घटक म्हणून काम करताना शिवसेना पक्षासाठीही पुरेसा वेळ द्यायला हवा, अशी सूचना आपण केल्याचं त्यांनी स्पष्ट केलं.
उद्धव ठाकरे यांच्या नेतृत्वाखालील शिवसेना काँग्रेसधार्जिणी होत होती आणि पक्षाचा मराठी बाणा हरवत असल्याची भावना झाल्यामुळे आपण पक्ष सोडल्याचं गजानन कीर्तिकर यांनी सांगितलं.
दरम्यान, गजानन कीर्तिकर हे शिवसेनेतील ज्येष्ठ नेते असून ठाकरे गटाचे मुंबईतील नेते अमोल कीर्तिकर यांचे वडील आहेत. त्यामुळे ते पुन्हा ठाकरे गटात जाणार असल्याच्या चर्चांना राजकीय महत्त्व प्राप्त झालं होतं.
मात्र, आपण शिंदेंची शिवसेना सोडणार नसल्याचं कीर्तिकर यांनी स्पष्ट केल्याने या चर्चांना आता पूर्णविराम मिळाला आहे. पक्षातील नेत्यांशी नियमित संवाद आणि कार्यकर्त्यांच्या कामांसाठी प्रभावी संपर्कव्यवस्था असावी, हीच आपली अपेक्षा असल्याचं त्यांच्या वक्तव्यावरून स्पष्ट होतं.
