शनिवार, 24 ऑक्टोबर 2026
कोणाची सत्ता येणार? ‘गोकुळ’च्या 25 जागांसाठी निवडणूक; 18 ऑक्टोबरला मतदान, तर 19 ऑक्टोबरला निकाल (फोटो सौजन्य-ChatGPT)
निवडणुकीसाठी उमेदवारी अर्ज दाखल करण्याची प्रक्रिया 15 सप्टेंबरपासून सुरू होणार आहे. 15, 16, 17, 21 आणि 22 सप्टेंबर या पाच दिवशी इच्छुक उमेदवारांना अर्ज दाखल करता येतील. तसेच दाखल झालेल्या अर्जांची 23 सप्टेंबर रोजी छाननी केली जाणार आहे. त्यानंतर 25 सप्टेंबर ते 8 ऑक्टोबर या कालावधीत उमेदवारांना अर्ज मागे घेता येणार आहेत. माघारीची मुदत संपल्यानंतर निवडणुकीच्या रिंगणात राहणाऱ्या उमेदवारांची अंतिम यादी जाहीर करून त्यांना निवडणूक चिन्हांचे वाटप केले जाईल.
Gokul Election: गोकुळ निवडणुकीत महायुतीचा दावा; ‘२५-०’ मतांनी सत्ता मिळवणार
गोकुळ दूध संघाच्या संचालक मंडळातील एकूण 25 जागांसाठी ही निवडणूक होणार आहे. अंतिम उमेदवार निश्चित झाल्यानंतर प्रचाराला वेग येण्याची शक्यता आहे. 18 ऑक्टोबरला मतदान प्रक्रिया पार पडल्यानंतर 19 ऑक्टोबरला मतमोजणी होईल आणि गोकुळवर पुढील पाच वर्षे कोणाचे वर्चस्व राहणार, याचे चित्र स्पष्ट होईल.
गोकुळ हा केवळ दूध उत्पादकांचा सहकारी संघ नसून कोल्हापूर जिल्ह्याच्या सहकार क्षेत्रातील महत्त्वाचे सत्ताकेंद्र मानला जातो. त्यामुळे गोकुळची निवडणूक ही सहकार क्षेत्राबरोबरच जिल्ह्याच्या राजकीय समीकरणांच्या दृष्टीनेही महत्त्वाची ठरणार आहे. निवडणूक कार्यक्रम जाहीर होताच राजकीय आणि सहकार क्षेत्रातील हालचालींना वेग आला आहे. निवडणुकीत कोणते गट एकत्र येणार, कोणाची कोणासोबत आघाडी होणार आणि कोणते पॅनेल एकमेकांसमोर उभे ठाकणार, याबाबत उत्सुकता वाढली आहे.
गोकुळच्या संचालक मंडळाचा कार्यकाळ संपल्यानंतर प्राधिकृत अधिकारी मंडळाची नियुक्ती करण्यात आली होती. या नियुक्तीला तत्कालीन सत्ताधारी गटाकडून विरोध करण्यात आला होता. आता प्रत्यक्ष निवडणूक कार्यक्रम जाहीर झाल्यामुळे संघावरील वर्चस्वासाठी राजकीय संघर्ष अधिक तीव्र होण्याची शक्यता आहे. अर्ज भरण्यापासून माघारीपर्यंतचा महत्त्वाचा कार्यक्रम: 15 सप्टेंबरपासून उमेदवारी अर्ज दाखल होतील, 23 सप्टेंबरला छाननी, 25 सप्टेंबर ते 8 ऑक्टोबर अर्ज माघारी, 18 ऑक्टोबर मतदान आणि 19 ऑक्टोबरला निकाल जाहीर होणार आहे.
