शुक्रवार, 23 ऑक्टोबर 2026
Khashaba Jadhav Book : ऑलिम्पिकवीर खाशाबांच्या चरित्रातून मल्लांना प्रेरणा; संजय दुधाणे यांचे प्रतिपादन
भारतीय कुस्तीला ऑलिम्पिक पदक मिळवून देणारे पहिले कुस्तीपटू खाशाबा जाधव यांच्या प्रेरणादायी जीवनप्रवासाची माहिती नव्या पिढीतील मल्लांना मिळावी, या उद्देशाने लोकनेते सदाशिवराव मंडलिक राष्ट्रीय कुस्ती संकुलातील कुस्तीगीरांना ‘ऑलिम्पिकवीर खाशाबा’ या चरित्र पुस्तकाची भेट (Khashaba Jadhav Book) देण्यात आली. या वेळी, खाशाबा जाधव यांच्यानंतर महाराष्ट्राला कुस्तीत ऑलिम्पिक पदक मिळालेले नाही. आता खाशाबांचे वारसदार मुरगुडमधून चमकतील, असा विश्वास पुस्तकाचे लेखक संजय दुधाणे यांनी व्यक्त केला.
मुरगुड येथे झालेल्या कार्यक्रमात जागतिक स्पर्धेत रौप्यपदक जिंकणाऱ्या अमृता पुजारी हिच्यासह तालमीतील सात राष्ट्रीय आणि आंतरराष्ट्रीय स्तरावरील कुस्तीगीरांचा संजय दुधाणे यांच्या हस्ते सत्कार करण्यात आला. यावेळी उपनगराध्यक्षा रेखाताई मांगले, माजी नगराध्यक्ष नामदेवराव मेंडके, माजी उपनगराध्यक्ष जयसिंगराव भोसले, माजी नगरसेवक राहुल शिंदे, दीपक शिंदे, राजेंद्र कांबळे, नगरसेवक दत्तात्रय मंडलिक, माजी प्राचार्य महादेव कानकेकर, प्रकाश तिराळे, दयानंद खतकर आणि राजेंद्र मकोटे आदी मान्यवर उपस्थित होते.
कार्यक्रमाच्या सुरुवातीला संजय दुधाणे यांनी खाशाबा जाधव यांच्या पदकविजयाच्या कामगिरीला उजाळा दिला. त्यानंतर त्यांनी पदकविजेत्या महिला कुस्तीपटू अमृता पुजारी, नंदिनी साळुंखे, स्वाती शिंदे आणि तन्वी मगदूम यांच्याशी संवाद साधला.
खेळात यश मिळवण्यासाठी शारीरिक क्षमतेसोबतच मानसिक कणखरता आणि सकारात्मकताही तितकीच महत्त्वाची असते. प्रत्येक खेळाडू आणि प्रशिक्षकाने हे पैलू लक्षात ठेवावेत, असा सल्ला दुधाणे यांनी दिला. कुस्ती प्रशिक्षक दादासो लवटे यांनीही खाशाबा जाधव यांच्या चरित्राचे महत्त्व अधोरेखित केले. केवळ खेळाडूच नव्हे, तर जीवनात संघर्ष करणाऱ्या प्रत्येक व्यक्तीसाठी खाशाबांचे जीवनचरित्र प्रेरणादायी ठरेल, असे त्यांनी सांगितले.
‘ऑलिम्पिकवीर खाशाबा’ या पुस्तकात खाशाबा जाधव यांची दुर्मिळ छायाचित्रे समाविष्ट करण्यात आली आहेत. 166 पानांच्या या पुस्तकाला ज्येष्ठ लेखक दिवंगत य. दि. फडके यांनी प्रस्तावना लिहिली आहे. प्रा. संजय दुधाणे यांनी सखोल संशोधन करून खाशाबांचा जीवनप्रवास शब्दबद्ध केला आहे.
महाराष्ट्रातील नामवंत तालमींमधील खेळाडूंना हे पुस्तक भेट देण्याचा उपक्रम सुरू करण्यात आला आहे. कोल्हापूर, पुणे, कराड आणि सातारा येथील खेळाडूंनाही या उपक्रमांतर्गत पुस्तक भेट देण्यात आले आहे.
कार्यक्रमाचे स्वागत आणि प्रास्ताविक दादासो लवटे यांनी केले. बटू जाधव यांनी सूत्रसंचालन केले, तर स्वाती शिंदे यांनी आभार मानले.
Asian Para Games : सुमित अंतिलचा भालाफेकीत ‘गोल्डन’ थ्रो! भारताची पदकांची विक्रमी शंभरी पार
