गुरुवार, 5 नोव्हेंबर 2026
साहिल वाकोडे प्रकरणी मुंबई युवक काँग्रेसचं IIT बॉम्बेच्या बाहेर आंदोलन
IIT Bombay Student Suicide : मुंबईतील IIT बॉम्बेचा विद्यार्थी साहिल वाकोडे याच्या आत्महत्येप्रकरणी आता राजकीय वातावरणही तापू लागलं आहे. साहिलला न्याय मिळावा आणि या प्रकरणाची सखोल चौकशी व्हावी, या मागणीसाठी मुंबई युवक काँग्रेसने IIT बॉम्बेच्या बाहेर जोरदार आंदोलन केलं. युवक काँग्रेसच्या मुंबई अध्यक्षा झीनत शबरीन यांच्या नेतृत्वाखाली हे आंदोलन करण्यात आलं.
साहिल वाकोडेच्या मृत्यूनंतर IIT बॉम्बे कॅम्पसमध्ये विद्यार्थ्यांकडूनही आंदोलन सुरू आहे. विद्यार्थ्यांनी विविध मागण्या मांडल्या असून, त्यात संस्थात्मक उत्तरदायित्व, मानसिक आरोग्य आणि तक्रार निवारण व्यवस्थेत सुधारणा यांसारख्या मुद्द्यांचा समावेश आहे. IIT-बॉम्बे प्रशासनाने विद्यार्थ्यांच्या 18 मागण्यांवर चर्चा केली असून त्याबाबत पुढील प्रक्रिया सुरू आहे.
झीनत शबरीन यांच्या नेतृत्वाखाली शेकडो कार्यकर्ते आंदोलनात सहभागी झाले. यावेळी साहिल वाकोडेला न्याय मिळालाच पाहिजे, अशी जोरदार घोषणाबाजी करण्यात आली. ‘जब जब सरकार डरती है, पुलिस को आगे करती है’, अशा घोषणाही कार्यकर्त्यांनी दिल्या. दरम्यान, आंदोलनादरम्यान पोलिसांनी कार्यकर्त्यांना ताब्यात घेतलं आणि त्यांना पोलीस ठाण्यात नेण्यात आलं.
झीनत शबरीन यांनी साहिल वाकोडे प्रकरणाची निष्पक्ष आणि पारदर्शक चौकशी करण्याची मागणी केली. विद्यार्थ्यांनी मांडलेल्या 18 मागण्यांना युवक काँग्रेसचा पाठिंबा असल्याचं त्यांनी सांगितलं.
तसंच IIT बॉम्बेमध्ये जातीय भेदभावाच्या आरोपांचीही चौकशी झाली पाहिजे, अशी मागणी त्यांनी केली. साहिलच्या कुटुंबीयांनीही जातीय भेदभाव आणि छळाचे आरोप केले आहेत. मात्र, IIT बॉम्बेने यापूर्वी अशा तक्रारी संस्थेकडे करण्यात आल्याचं नाकारलं आहे. त्यामुळे या आरोपांची चौकशी होणं महत्त्वाचं ठरणार आहे.
युवक काँग्रेसने प्रा. सूर्यनारायण दुल्ला यांच्यावर कठोर कारवाईची मागणी केली आहे. शबरीन यांनी त्यांना सेवेतून बरखास्त करण्याची मागणी केली. दरम्यान, दुल्ला यांच्यावर आत्महत्येस प्रवृत्त केल्याचा गुन्हा दाखल झाल्याचं वृत्त आहे आणि IIT बॉम्बेने त्यांचं डीनपद निलंबित केलं आहे. मात्र, विद्यापीठातील फॅकल्टीच्या एका गटाने दुल्ला यांना पाठिंबा देत आरोपांची योग्य चौकशी व्हावी, अशी भूमिका घेतली आहे.
साहिल वाकोडे प्रकरणाचा तपास आता मुंबई पोलिसांच्या गुन्हे शाखेकडे वर्ग करण्यात आला आहे. त्यामुळे या तपासातून नेमकी कोणती माहिती समोर येते आणि पुढे काय कारवाई होते, याकडे सर्वांचं लक्ष लागलं आहे.
