मंगळवार, 3 नोव्हेंबर 2026
Congress (Photo - X)
मुंबई : राज्यात विधान परिषदेच्या शिक्षक आणि पदवीधर मतदारसंघाच्या निवडणुका नुकत्याच पार पडल्या. पाच जागांवर झालेल्या या निवडणुकीत काँग्रेसला फक्त नागपूर पदवीधर मतदारसंघात विजय मिळवता आला. महाविकास आघाडीला या निवडणुकीत चांगलं यश मिळालं असलं तरीही काँग्रेसला वैयक्तिकरित्या साजेसे यश न मिळाल्याचं चित्र आहे.
त्याच अनुषंगाने, महाराष्ट्र काँग्रेसने आता आत्मपरीक्षणाची तयारी सुरू केली आहे. नागपूर पदवीधर, पुणे पदवीधर आणि अमरावती शिक्षक मतदारसंघातील निवडणूक निकालांचा सखोल अभ्यास करण्यासाठी प्रदेश काँग्रेसकडून चार सदस्यीय समिती नियुक्त करण्यात आली आहे.
या समितीमध्ये ज्येष्ठ नेते बाळासाहेब थोरात यांच्यासह चार महत्त्वाच्या नेत्यांचा समावेश करण्यात आला असून या समितीला विधानपरिषद निवडणुकीतील चुका आणि पराभवाची कारणं शोधण्याची जबाबदारी देण्यात आली आहे. (Congress Review Committee)
‘तुझा बाप सरड्यासारखे रंग बदलतो’, थोरवेंच्या आक्रमक वक्तव्याने राजकीय वर्तुळात खळबळ
अखिल भारतीय काँग्रेस कमिटीच्या निर्देशानुसार आणि महाराष्ट्र प्रदेश काँग्रेस कमिटीचे अध्यक्ष हर्षवर्धन सपकाळ यांच्या सूचनेवरून ही समिती स्थापन करण्यात आली आहे.
या समितीमध्ये काँग्रेस कार्यकारिणीचे सदस्य बाळासाहेब थोरात, खासदार चंद्रकांत हंडोरे, आरिफ नसीम खान आणि अखिल भारतीय काँग्रेस कमिटीचे सचिव बी. एम. संदीप यांची नियुक्ती करण्यात आली आहे.
या समितीवर केवळ निकालांचा आढावा घेण्याची जबाबदारी नसून, संपूर्ण निवडणूक प्रक्रियेचा अभ्यास करण्याची जबाबदारी देण्यात आली आहे. संबंधित मतदारसंघांमध्ये पक्षाची प्रचार रणनीती कशी होती, स्थानिक पातळीवर समन्वय कसा होता आणि विजय अथवा पराभवामागची नेमकी कारणं काय होती, याचा शोध समिती घेणार आहे.
निवडणुकीदरम्यान पक्षाकडून काही त्रुटी राहिल्या होत्या का, प्रचारात अपेक्षित ताकद लावली गेली होती का आणि स्थानिक नेत्यांमध्ये योग्य समन्वय होता का, याचीही तपासणी केली जाणार आहे. याशिवाय मागील निवडणुकांमधील घडामोडींचा सध्याच्या निकालांवर काही परिणाम झाला का, याचाही अभ्यास केला जाणार आहे.
समितीला आपला सविस्तर अहवाल तीन आठवड्यांच्या आत महाराष्ट्राचे प्रभारी डॉ. सिरीवेल्ला प्रसाद यांच्याकडे सादर करायचा आहे. या अहवालाची प्रत प्रदेशाध्यक्ष हर्षवर्धन सपकाळ यांनाही दिली जाणार आहे.
या अहवालातून निवडणुकीतील त्रुटी, संघटनात्मक कमतरता आणि भविष्यात करावयाच्या बदलांबाबत शिफारसी केल्या जाणार आहेत. त्यामुळे आगामी निवडणुकांच्या पार्श्वभूमीवर काँग्रेस या अहवालातून कोणते धडे घेते आणि आपल्या रणनीतीत काय बदल करते, हे पाहणं महत्त्वाचं ठरणार आहे.
Ans: महाराष्ट्र प्रदेश काँग्रेसने चार सदस्यीय समिती नियुक्त केली आहे.
Ans: बाळासाहेब थोरात, खासदार चंद्रकांत हंडोरे, आरिफ नसीम खान आणि बी. एम. संदीप यांचा समावेश आहे.
Ans: समिती तीन आठवड्यांच्या आत आपला सविस्तर अहवाल डॉ. सिरीवेल्ला प्रसाद यांच्याकडे सादर करणार आहे. त्याची प्रत प्रदेशाध्यक्ष हर्षवर्धन सपकाळ यांनाही दिली जाणार आहे.
